Ég held ég hafi aldrei borðað eins mikið af jarðarberjum og þetta sumarið. Það er auðvitað ekkert nema viðeigandi, jarðarberið verandi upprunið af þessum slóðum. Við höfum verið að úða í okkur belgískum jarðarberjum fram til þessa en núna er litla búðin á eyjunni full af norskum jarðarberjum og það verður að segjast eins og er að berin úr heimabyggð bera algjörlega af. Rauð og sæt í gegn. Berin fara í smoothies, ofan á tyrkneska jógúrt eða vanillukesam, borðast beint upp úr boxinu og jafnvel sem meðlæti með sætindum eins og kladdkaka og banoffie pie.
Á meðan á göngu/hlaupatúr dagsins stóð hugsaði ég mér gott til glóðarinnar að koma heim og bíta í nokkur ber áður en ég réðist í kvöldmatinn. Iðulega gef ég mér tíma til að á í lítilli laut sem ég hef fundið á gönguleið minni og hef gert að uppáhaldi og í dag var enginn breyting þar á, þvert á móti hlýt ég að hafa áð í hálftíma. Fyrst sólaði ég mig á berjalynginu en engdist aðeins um vegna mauranna sem sumir hverjir bitu. Svo kúrði ég smá eftir að hafa farið aftur í peysuna til að varna maurunum aðgang. Stóð svo á fætur þegar ég heyrði í Baldri og Kim koma niður af fjalli en þegar ég sá ekki til þeirra tók ég að skokka heim á leið. Baldur kom síðan hlaupandi á eftir mér í þungum gönguskónnum, klonk-klonk, hafði séð mig fara framhjá fyrir neðan húsið hans Kims og tekið á rás.
Þegar við komum svo heim að húsi voru nágrannarnir Mads og Anja búin að draga fram borð og stóla, dúka og diska og buðu okkur í vatnsmelónur og jarðarber í sólinni. Fyrir var Trish við borðið svo við bættumst bara við í gestahópinn, og í kringum okkur hlupu þrjár stelpur og ein sem sat í fanginu á mömmu sinni, og svo kúrði einn lítill kútur í maganum á Trish. Fáum að sjá hann eftir tvær vikur. Við sátum í góðan hálftíma og nutum selskapsins og þess að fá tækifæri til að tala norsku en gang imellom og hvíla sig á sænskunni. Svo vildi litlu stelpurnar drífa sig á nýju baðströndina sem lögð hefur verið í víkinni sem við búum við í sumar, svo mamman og pabbinn drifu sig af stað og við fórum inn í hús í kvöldmat og almennt kos.
Engin ummæli:
Skrifa ummæli