Kotasælubollur

Ég bakaði þessar bollur í síðustu viku og, my oh my, þær eru dásamlegar. Mjúkar inní, stökkar að utan, svolítið saltar, svolítið safaríkar...

Og þær eru svo auðveldar í bakstri! Bingó! Þessar bollur fá stóra vinninginn.

Þessa uppskrift er að finna í bókinni minni góðu Stóru bakstursbókinni. Síðan fann ég sambærilega uppskrift á síðunni Eldhússystur og ákvað að fara eftir innihaldi hennar en taka leiðbeingarnar úr bókinni.

HVAÐ
1 msk smjör/smjörvi
0,5 l mjólk
50 g pressuger (eða 13 g þurrger)
1 tsk sykur
550 g hveiti
150 g heilhveiti
1 tsk salt
3 msk ólívuolía
200 g kotasæla
Sesamfræ

HVERNIG
1. Bræðið 1 msk af smjöri í potti, hellið svo mjólkinni út í og hitið upp í 35-37°C.
2. Myljið pressugerið í skál, bætið við sykrinum og hellið hluta af mjólkinni yfir. Hrærið þar til allt gerið hefur leysts upp.
3. Takið fram víða og góða skál. Hellið allri mjólkinni í hana, líka þeirri með uppleysta gerinu. Setjið því næst allt þurrefni saman við og hrærið.
4. Bætið olíunni og kotasælunni saman við og hrærið þar til deigið tekur að sleppa skálinni.
5. Stráið smá hveiti yfir, leggið viskustykki yfir og leyfið að lyfta sér í 30 mín.
6. Hellið deiginu á hveitistráðan flöt. Hnoðið og passið að hnoða ekki of miklu hveiti til viðbótar í deigið.
7. Skiptið deiginu í tvennt, rúllið því upp í sívalning og skerið hvorn sívalning í 12 bita.
8. Mótið kúlur úr hverjum bita fyrir sig og leggið á pappírsklædda ofnplötu. Leggið viskustykki yfir og leyfið að lyfta sér í 30-40 mín.
9. Hitið ofninn í 200°C.
10. Penslið bollurnar með mjólk og stráið sesamfræjum yfir. Stingið inn í ofn í 20-25 mín.

Tweet

Berjasmoothie

 

Næringarríkur, bragðgóður og fljótlegur smoothie sem hentar í hvaða málsverð sem er:

Banani, frosin berjablanda, hvítt skyr/kesam og lífrænt hunang.

Í blandarann á gott spinn þar til allt er orðið silkimjúkt.

Svo góðir svona smoothíar.

Tweet

Spínat-cheddar möffins

 

Jæja, þá er komið að þessari flottu uppskrift! Spínat-cheddar möffins. Mmm, þær eru mjúkar og svolítið saltar. Góðar með súpum, en líka einar og sér.

Himnaríki lyktar ekki af rósum og jasmínum, heldur af lauk og hvítlauk sem er verið að steikja hægt upp úr smjöri. Ég komst að því þegar ég bakaði þessar möffins!

Ég fékk 12 möffins úr þessari uppskrift. Uppskriftin er runnin undan rifjum Fanny á Foodbeam.

HVAÐ
30 g smjör
1 lítill laukur, fínt saxaður
1 stór hvítlauksgeiri, pressaður
1 rauður chili, fínt saxaður
350 g hveiti
2,5 tsk lyftiduft
Svartur pipar, nýmalaður
200 g cheddar ostur, rifinn
250 g mjólk
1 egg
130 g ferskt spínat, saxað smátt

HVERNIG
1. Hitið ofninn í 170°C.
2. Bræðið smjörið á pönnu og eldið laukinn þar til hann er orðinn mjúkur. Bætið hvítlauknum og chili út í og hrærið vel saman við laukinn. Takið pönnuna af hita og leyfið blöndunni að kólna lítillega.
3. Hrærið hveiti, lyftiduft, pipar og cheddar ost saman í skál.
4. Takið fram aðra skál og hrærið saman mjólk og egg, og hellið síðan hrærunni út í hveiti/ostablönduna og hrærið varlega saman. Bætið því næst lauknum og spínatinu við og hrærið þar til hráefnin hafa blandast vel saman. Deigið verður ansi þétt og ef það reynist erfitt að hræra það með sleif er ráð að bretta upp ermar og nota guðsgafflana.
5. Skiptið deiginu jafnt í 12 form og bakið í 35 mín.
6. Takið múffurnar úr forminu að bakstri loknum og leyfið þeim að kólna á grind.

 

 

 

 

Tweet

Bolla! Bolla!

Í dag er öskudagur! Bolla! Bolla! Bolla! Nei, heyrðu...

Ég var lasin um helgina og því fóru plön mín um að baka rjómabollur á sunnudaginn út um þúfur. Þegar ég loks gerði tilraun til að baka bollur á sjálfan bolludag misheppnaðist deigið. Það varð of þunnt og ekki hægt að fá neinar bollur úr þeim.

Það var ekki fyrr en í gær að mér tókst að baka þær, og þá heppnuðust þær líka vel! Ég verð að segja að ég er montin af útkomunni. Eftir brösuga byrjun reyndist svo eftir allt létt að baka vatnsdeigsbollur. Ég hafði ímyndað mér að vatnsdeigsbakstur væri ferlega flókinn en sú er ekki rauninn.

Besta trixið?

Að hella eggjahrærunni í mjög litlum skömmtum út í deigið og hræra á milli. Deigið þarf að vera svo þétt í sér að það haldi formi þegar maður leggur það á bökunarplötu.

Ég notaðist við uppskrift og leiðbeiningar sem ég fann á heimasíðu Unnar Karenar. Ég vísa þeim sem vilja þangað því ég kem ekki til með að  betrumbæta leiðbeiningarnar hennar.

Svo er bara að þeyta rjóma og smyrja smá jarðarberjasultu á botninn og jömm.

Bolla! Bolla!

 

 

 

 

Tweet

Hvítkálssúpa með hvítum baunum

 

Hér er á ferðinni ekta vetrarsúpa, kjörin fyrir köld febrúarkvöld. Sú sem setti út uppskriftina mælti með því að saxa allt grænmetið fínt og þó það sé svolítil handavinna þá mæli ég líka með því. Þannig eldast grænmetið hraðar og í hverjum munnbita fær maður smakk af öllu góðgætinu.

Ég fann uppskriftina á síðunni FOOD52.

HVAÐ



2 msk matarolía
1 meðalstór laukur, saxaður
1 meðalstór gulrót, fínt skorin
2 sellerístilkar, fínt skornir
1 blaðlaukur (aðeins hvíti + ljósgræni hlutinn), fínt skorinn
1 tsk óregano
1 kvistur af rósmarín, laufin hökkuð
3 hvítlauksgeirar, pressaðir
1 msk tómat purée
2 dósir niðursoðnir tómatar
1 l. grænmetissoð
1/2 hvítkálshöfuð, fínt skorið
2 bollar hvítar baunir (forsoðnar)
1 handfylli steinselja, söxuð
salt + pipar

HVERNIG
1. Hitið olíuna í stórum potti við meðalhita. Bætið við lauk, gulrótum, sellerí og blaðlauk og hrærið. Steikið þar til laukurinn hefur mýkst, u.þ.b. 5 mín.
2. Bætið tómat purée, óreganói, rósmaríni og hvítlauki út í. Hrærið þar til allt hefur blandast vel saman og óreganóið og hvítlaukurinn eru farin að ilma. Saltið og piprið.
3. Bætið tómötum í dós út í ásamt grænmetissoðinu og hrærið saman. Látið súpuna ná suðu og bætið þá hvítkálinu út í. Leyfið súpunni að malla í 15-20 mín.
4. Bætið hvítu baununum útí og látið suðuna koma upp aftur. Bætið saxaðri steinselju við,  hrærið saman við. Smakkið súpuna til. Berið fram heita.

Eins og með allar súpur er kjörið að bera gott brauðmeti fram með þessari súpu.

Tweet

Steikt grjón með eggjum

Á ferðalögum um Indland og Suðaustur Asíu hef ég ánetjast steiktum grjónum. Maður borðar á veitingastöðum á hverjum degi og í Indlandi t.d. er alltaf það sama á boðstólum á öllum veitingastöðum: indverskt, ítalskt eða kínverskt. Svo ég róteraði á milli nokkurra rétta og steikt grjón urðu yfirleitt fyrir valinu þegar ég var komin með nóg af masala og langaði í eitthvað svolítið salt en ókryddað.

Ég hef oft reynt að herma eftir þessum steiktu grjónum sem maður fékk á hinum ýmsu veitingastöðum á ferðalögunum, með misjöfnum árangri þó. Um daginn átti ég soðin grjón inn í ísskáp, og í staðinn fyrir að búa til grjónagraut eins og ég geri nánast undantekningalaust við grjón sem ég á inní ísskáp, þá ákvað ég að steikja grjónin.

Ég fylgdi leiðbeiningum sem ég fann á netinu um hvernig best er að bera sig að, en að öðru leyti notaði ég það sem ég átti í ísskápnum. Þetta kom alveg ljómandi vel út.

Þetta er sniðugur réttur ef maður á soðin grjón, að ég tali nú ekki um ferskt grænmeti. Gulrætur eru klassískar í þetta kombó. Sesamolían er ómissandi. Ekki halda að einhver önnur olía dugi til, bara sesamolían færir rétta bragðið í réttinn.

HVAÐ
2 msk sesamolía
1 rauðlaukur, fínt saxaður
2 gulrætur, í þunnum sneiðum
1 sellerístilkur, í þunnum sneiðum
Nokkur brokkolíblóm, smátt skorin
3 hvítlauksgeirar, marðir
3 egg, hrærð
2 msk tamari/sojasósa
2 bollar soðin grjón (helst dagsgömul)

HVERNIG
1. Hitið olíuna á pönnu.
2. Hendið út á lauk, gulrótum, sellerí og brokkolí. Leyfið að mýkjast aðeins í olíunni. Hafið heitt undir pönnunni (t.d. 5/6)
3. Bætið hvítlauknum útí og hrærið vel saman við.
4. Ýtið grænmetinu til hliðar á pönnunni og hellið eggjunum út á. Hrærið stöðugt í.
5. Þegar eggin eru því sem næst elduð í gegn, blandið þeim saman við grænmetið.
6. Bætið útí tamari/sojasósunni og hrærið saman við.
7. Hendið soðnu grjónunum út á, blandið vel saman við og hafið á hellunni þar til grjónin hafa hitnað í gegn (tekur bara örfáar mínútur).

Berið fram strax, gjarnar með ferskmeti eins og niðurskorinni papríku og gúrku og auka dash af tamari.

Tweet

Linsutaco í pítubrauði

 

Hér kemur uppskrift sem er búin að halda í okkur lífinu í vetur.

 

Ok, kannski svolitlar ýkjur hér á ferð. 'Halda í okkur lífinu'... það væri kannski réttara að lýsa uppskriftinni sem uppáhaldi vetrarins.

 

Þegar við bjuggum á Lovund kynntumst við því hvernig Norðmenn borða taco. Í pítubrauðum! Það þótti okkur sérkennilegt, en eftir að hafa prófað það erum við forfallnar pítubrauðsætur.

 

Hér áður fyrr bjuggum við alltaf til tacoið úr sveppamassa frá Quorn en síðan fórum við að lenda í vandræðum með að verða okkur út um hann. Þegar sveppamassinn góði hafði ekki fengist í búðum í fleiri vikur tók mín til sinna ráða, bretti upp ermar og henti sér af fullum krafti í að búa til massa úr linsubaunum sem gæti komið í staðinn.

 

Og viti menn, það gekk! Síðan þá höfum við ekki keypt sveppamassann.

 

HVAÐ

200 g brúnar linsur, þurrar (litlar, brúnar linsur með mattri áferð)

1 stór sveppur (50 g), saxaður

1 lítill laukur, saxaður

2 hvítlauksgeirar, marðir

2 tsk papríkuduft

smá season all

ca 1 bolli vatn,

1 pakki Taco krydd úr pakka

 

Meðlæti: Rifinn ostur, sýrður rjómi, fínt söxuð gúrka, maísbaunir, avókadó í bitum, taco sósa.

 

HVERNIG

1. Leggið linsurnar í bleyti í 2-6 tíma. Þetta styttir eldunartíma og vatnsmagn í uppskrift miðar við að linsur hafi verið lagðar í bleyti. Skolið linsurnar síðan vel og tínið frá þær sem eru ljótar að sjá.

2. Steikið laukinn á pönnu í 4-6 mín. Bætið þá við hvítlauknum og steikið áfram í 2-3 mín.

3. Bætið út í sveppnum/sveppunum og hrærið vel saman við laukinn.

4. Setjið út á papríkuduft og season all, blandið og leyfið að steikjast áfram í 2 mín.

5. Hellið sem samsvarar einum bolla af vatni út á linsurnar, þangað til rétt flýtur yfir þær. Látið suðu koma upp undir loki, lækkið svo á meðalhita og sjóðið undir loki í 20 mín.

6. Smakkið linsurnar til að 20 mín. liðnum. Ef þær eru mjúkar eru þær tilbúnar. Síðasta skrefið er að bæta taco kryddinu út í og leyfa því að ganga inn í linsurnar í 10 mín. á vægum hita. Ef linsurnar eru þurrar er ráð að bæta 1-2 dl af vatni með kryddinu og hræra vel saman.

7. Hitið pítur í ofninum. Raðið svo öllu sem á að fara ofan í á disk, hrærið vel saman og skellið ofan í pítuna.

 

Ekta laugardags!

 

 

 

 

 

Tweet

Gulrótakaka

Föstudagsuppskriftin að þessu sinni er gulrótakaka. Þessa bakaði ég fyrir viku á bóndadag og hún sló í gegn. Þétt í sér, vel krydduð, mjúk, djúsí og sæt. Og kremið! Ó, elsku krem.

Það er best að vara við einu. Þessi uppskrift er huge! Ég var eitthvað utan við mig og gleymdi að helminga hana eins og ég hafði ætlað mér. Ég endaði með tvo botna og tíu möffins! Möffinsin fóru inní frysti en kökuna setti ég saman úr botnunum tveimur.

Gulrótakökur eru svolítið vesen í samanburði við aðrar hrærðar kökur því maður þarf að rífa þessar blessuðu gulrætur. Ég get ekki notað rifjárnið á matvinnsluvélinni minni til að auðvelda mér verkið og því geri ég þetta allt handvirkt. En að öðru leyti er þetta ísí písí og afraksturinn er svo innilega vinnunnar virði.

Uppskriftin kemur frá Evu Laufey.

HVAÐ
Í deigið:
4 egg
2 bollar púðursykur
3 bollar rifnar gulrætur
1,5 bolli matarolía
1 tsk vanilla
2 bollar hveiti
2 tsk matarsódi
2 tsk kanill
1 tsk múskat
1 tsk salt

Í kremið:
250 g flórsykur
200 g rjómaostur, við stofuhita
20 g smjör, við stofuhita
1 tsk vanilla
2-3 sítrónudropar (ef vill)

Til skrauts: Valhnetur (ef vill)

HVERNIG
1. Hitið ofninn í 170°C. Skrælið og rífið niður gulræturnar. Smyrjið tvö kringlótt form (20 sm).
2. Þeytið saman egg og sykur þar til blandan er létt og ljós.
3. Bætið við gulrótum, olíu og vanillu.
4. Blandið saman hveiti, matarsóda, kryddi og salti og sigtið út í hræruna. Hrærið þar til allt hefur gengið vel saman.
5. Hellið deiginu í form. Bakið í 30-40 mín. eða þar til kantarnir hafa losnað frá forminu og hnífur, sem stungið er í kökuna, kemur hreinn út.
6. Leyfið kökunni að kólna alveg eftir að hún kemur úr ofninum.
7. Útbúið kremið: blandið öllu saman og  hrærið vel saman.
8. Smyrjið kreminu milli botna, ofan á og á hliðarnar. Gaman er að skreyta með hökkuðum valhnetum, sem koma einstaklega vel út með kökunni.

Þessi kaka er betri daginn eftir og því kjörin að baka fyrir afmæli þegar maður þarf að geta forunnið sem mest.

Tweet

Eplakaka

Gleðilegan bóndadag! Hvernig væri að nú að baka fyrir bóndann?

Ég bakaði eplaköku fyrr í vikunni. Þegar snjóar og kalt er í veðri kallar dagurinn hreinlega á eplaköku. Sem betur fer nema eyru mín þetta mjúka ákall.

Þessi uppskrift er mjög einföld og þægileg og útkoman er ægilega gómsæt. Mjúk kaka með góðu kanilbragði. Mmm...

Uppskriftin kemur frá vinkonu minni Salome.

HVAÐ
90 gr sykur
80 gr smjör, við stofuhita
1 egg
175 gr hveiti
2 tsk lyftiduft
¼ tsk salt
½ bolli mjólk
1 tsk vanilludropar
1-2 epli
Kanilsykur

HVERNIG
1. Hitið ofninn í 175°C.
2. Hrærið saman smjör og sykur.
3. Hrærið eggið út í og hrærið vel saman.
4. Blandið hveiti, salti og lyftidufti saman og bætið út í í smá skömmtum, til skiptist við mjólkina og vanilludropana.
5. Hellið deiginu í vel smurt form.
6. Afhýðið eplin, skerið í skífur og raðið snyrtilega ofan á deigið. Stráið kanilsykri yfir.
7.  Bakið neðarlega í ofninum í 40-50 mín. eða þangað til kantar eru farnir að losna frá forminu og hnífur, sem stungið er í, kemur hreinn út.

Eplakakan er best heit úr ofninum, með vanilluís eða smá slettu af þeyttum rjóma.

 

Tweet

Rjómakaramellur

Fyrir jólin pantaði ég sælgætishitamæli af netinu því mig hefur lengi langað að prófa að búa til karamellur. Síðast þegar ég bjó til karamellur, sem var fyrir áratug því við bjuggum á Digranesveginum þá, kom út úr því hörð karamella eins og í Daim. Sem er ekki svo slæmt í mínum bókum, en mig langaði að prófa að búa til mjúkar karamellur og öruggasta leiðin til þess er að nota hitamæli.

 

Það er í rauninni afskaplega auðvelt að búa til karamellur, en mér fannst svolítið stressandi að standa yfir kraumandi pottinum og bíða eftir að karamellan næði réttu hitastigi. Það tók miklu lengri tíma en ég hélt og það var meira en að segja það að ætla sér að sjá nákvæmt hitastig á mælinum.

Þessar karamellur eru þó biðarinnar virði. Vá! Bestu karamellur sem ég hef smakkað, hands down.

Uppskriftina fann ég á síðunni Joy of Baking. Hér eru nokkrar ráðleggingar frá Stephanie: Notið viðarsleif til að hræra með, sjóðið karamelluna í þykkbotna potti og notið hitamæli.

Áður en við hefjumst handa: Það er mjög mikilvægt er að hræra stöðugt í rjóma-sykurblöndinni fram að suðu til að tryggja að sykurinn bráðni alveg. Ellegar getur karamellan orðið kornótt. Í staðinn fyrir að hræra í blöndunni má mjúklega hreyfa pottinn á hellunni þannig að blandan fari af stað. Svo er ráð að þerra burt sykurinn sem slettist upp á hliðar pottsins með hitaþolnum bursta (dýfa honum í heitt vatn fyrst).
  

HVAÐ
360 ml rjómi
200 g sykur
140 g ljós púðursykur
80 ml ljóst síróp
1,5 tsk vanilludropar
1,5 tsk salt
13 g smjör (1 msk)

 

HVERNIG
1. Takið fram 20x20 sm form, klæðið með álpappír og smyrjið pappírinn með smjöri.
2. Takið fram rúmgóðan og þykkbotna pott (passið að hafa hann nægilega háan því blandan á eftir að freyða upp við suðu og haldast þannig þar til æskilegu hitastigi er náð). Hafið helluna undir á miðlungshita. Setjið saman rjómann, sykurinn og sírópið, hrærið vel.
3. Látið suðu koma upp og hrærið fram að því stöðugt í blöndunni með viðarsleif.
4. Þegar suðan kemur upp þerrið hliðar pottsins með vatnsbleyttum bursta og skellið hitamælinum ofan í pottinn. Passið að hann snerti ekki botn pottsins. Ekki hræra í blöndunni með sleifinni héðan af.
5. Sjóðið karamelluna á miðlungshita þar til karamellan hefur náð 121°C (eða 124°C fyrir harðari karamellu). Þetta tekur svolítinn tíma (ca 20 mín.). Hreyfið af og til pottinn þannig að blandan fari í rólega hringi í pottinum.
6. Þegar réttu hitistigi er náð takið þá pottinn af  hellunni og bætið strax út í vanillu, salti og smjöri. Hrærið saman.
7. Hellið karamellunni í formið og leyfið henni að kólna þar til hún hefur stífnað (allavega 2 tímar).
8. Takið fram beittan  hníf eða pizzahjól og skerið karamelluna í ferninga, ferhyrninga eða sívalninga. Vefjið hverri karamellu í bökunarpappír svo hún geymist betur (annars verður hún fyrr kornótt).
9. Geymið í loftþéttum umbúðum inní ísskáp í allt að viku.

Nú þarf maður ekki að kaupa sér Mackintosh dós fyrir næstu jól. Maður býr bara til besta molann sjálfur!

 

 

 

 

 

 

 

 

 

Tweet

Ofnbakaður lax & rjómapestó

Þennan rétt bjó Baldur til handa okkur um daginn. Við áttum flotta laxabita sem við vorum að renna út á tíma með. Baldur fann uppskrift sem honum leist vel á og áður en ég vissi var kominn þessi fíni lax á diskinn minn.

Nú er ég lítið fyrir lax svona allra jafna, en það hefur komið fyrir að ég hafi fengið lax sem var bara svo vel matreiddur að ég borðaði með bestu lyst. Þessi réttur fellur algjörlega undir þann flokkinn.

Þessi uppskrift kemur af síðunni Ljúfmeti og lekkerheit.

HVAÐ
0,5 kg lax
1 dl rjómi
2,5 dl sýrður rjómi
1 teningur fiskikraftur
3-4 msk rautt pestó
pipar og salt

HVERNIG
1. Hitið ofninn í 180°C.
2. Skerið laxinn í bita og leggið í eldfast mót.
3.  Setjið rjóma, sýrðan rjóma, fiskikraft og rautt pestó í pott og hitið að suðu. Látið sjóða saman í nokkrar mínútur og smakkið til með salti og pipar.
4. Hellið sósunni yfir laxinn og setjið í ofninn í 25 mínútur.

Við bárum réttinn fram með grjónum og fersku grænmeti. Sérdeilis einfalt að græja þennan rétt og einkar ljúft að borða hann. Rjóminn og pestóið gera hann svolítið sunnudags og það er nú aldrei leiðinlegt.

Tweet

Daimísterta

Hér er jóladesertinn í ár! Rosalega góður og rosalega auðveldur, ef litið er til þess að maður er að búa til ístertu!

Ég biðst afsökunar á lélegri mynd. Ég gleymdi alveg að taka mynd af tertunni á aðfangadag og þessa mynd að ofan náði ég að taka í miklum flýti rétt áður en tertan kláraðist. Þetta þýðir að ég verð að taka aðra mynd seinna og uppfæra myndina, sem þýðir að ég verð að útbúa aðra svona ístertu. Ó nei.

Ég valdi að setja mína tertu í ferkantað form og skera hana í ferhyrntar sneiðar en að sjálfsögðu er hægt að setja hana í hringlaga form líka.

HVAÐ
Marengsinn:
150 gr sykur
3 eggjahvítur
1 tsk edik

Rjómaísinn:
3 eggjarauður
75 gr sykur
1 tsk vanilla
2,5 dl rjómi
4 lítil daim súkkulaði, söxuð

HVERNIG
1. Hitið ofninn í 175°C.
2. Við byrjum á marengsinum. Stífþeytið saman eggjahvítur, sykur og edik.
3. Takið fram kringlótt kökuform (eða ferkantað eldfast mót eins og ég notaði). Skellið bökunarpappír í formið og smyrjið botninn með smjöri.
4. Smyrjið stífþeyttum eggjunum á bökunarpappírinn og bakið við 175°C í 40-50 mín, eða við 150°C í 75 mín. fyrir teygjanlegan botn.
5. Þá er það rjómaísinn: Þeytið eggjarauður, sykur og vanillu vel saman. Þeytið rjómann í sérskál og blandið honum svo varlega saman við eggin ásamt súkkulaðinu.
6. Þegar marengsins hefur kólnað nægilega í forminu smyrjið þá rjómaísnum ofan á og setjið inn í frysti yfir nótt.

Þessi ís er dúnamjúkur svo tertan þarf ekki langa stund út úr frysti áður en auðvelt er að skera af henni sneiðar, svona 10 mínútur.

Tweet

Hvítlauks-parmesan kartöflumús

Við ákváðum fyrir jól að prófa að hafa eitthvað alveg nýtt á boðstólum þessi jólin. Við höfum alltaf haft hnetusteik í öll mál yfir öll jólin, og líka á gamlárskvöld, en eftir þriðja skammt er maður kominn með nokkuð gott af hnetusteik.

Hér í Noregi er hægt að kaupa marineraða kalkúnabringu sem er tilbúin á borð eftir 40 mín. í ofni. Okkur hefur lengi langað að prófa kalkún fyrir jól svo við létum slag standa og sáum ekki eftir því. Besti jólamatur sem ég hef nokkurn tímann fengið.

Meðlætið spillti svo ekki fyrir. Við vorum með haricote verte í sýrðum rjóma, fansí piparsósu með sherrý og síðan þessa æðislegu kartöflumús sem Baldur vippaði saman á nóinu. Hún er svo góð að maður gæti borðað alla skálina og sleikt innan úr henni áður en maður man að það er annar matur í boði.

Og þetta er tiltölulega einfalt. Smá handavinna en til þess hefur maður hendurnar.

HVAÐ
1,5 kg kartöflur
2 msk salt
475 ml rjómi
6 hvítlauksgeirar, marðir
170 g parmesan, rifinn

HVERNIG
1. Skrælið kartöflurnar og skerið í teninga af sömu stærð.
2. Setjið í pott með vatni og salti. Náið upp suðu og látið síðan malla við vægan hita þar til kartöflubitarnir detta í sundur þegar gafli er stungið í þá.
3. Hitið rjómann og hvítlaukinn í skaftpotti á miðlungshita, þar til rjóminn er farinn að krauma. Takið þá af hellunni og leggið til hliðar.
4. Hellið af kartöflunum þegar þær eru tilbúnar. Stappið þær og bætið út í hvítlauksrjómanum og parmesan. Hrærið vel til að tryggja að allt gangi saman.
5. Látið standa í 5 mín. svo stappan fái þykknað.

Mér finnst skemmtilegt að skreyta með saxaðri steinselju.

Tweet

Kanilsnúðar með súkkulaðiglassúr

Hér kemur uppskriftin að kanilsnúðunum sem ég bakaði um daginn, þegar við vorum að skreyta tréð.

Þessir snúðar eru svolítið í seigari kantinum, ekki eins dúnamjúkir og aðrir snúðar sem ég hef bakað. En deigið er afskaplega meðfærilegt og ég hef aldrei fengið eins jafna og fallega snúða áður eins og ég fékk úr þessu deigi.

Svo skellir maður smá súkkulaðiglassúr ofaná og hellir mjólk í glas og lætur sig dreyma um jólin. Nú, eða bara það sem mann langar mest í! Það má alveg baka þessa snúða hina ellefu mánuði ársins!

Uppskriftina fékk ég hjá Evu Laufey. Ég helmingaði uppskriftina sem var mjög hæfilegt fyrir okkur tvö en ef það eru fleiri um snúðana mæli ég með að tvöfalda uppskriftina hér að neðan.

HVAÐ
Í deigið:
250 g hveiti
100 g sykur
1/2 tsk vanillusykur
1/2 tsk salt
1 1/4 tsk þurrger (12-13 g pressuger)
125 ml mjólk
35 ml ljós olía
1 egg

Í fyllinguna:
25 g púðursykur
50 g smjör
2 msk kanill

Í súkkulaðiglassúrinn:
50 g smjör, bráðið
150 g flórsykur
1/2 tsk vanillusykur
25 g kakó
1-2 msk sterkt, kælt kaffi
1/2 - 1 msk mjólk

HVERNIG
1. Blandið saman hveiti, sykri, vanillusykri og salti.
2. Hitið mjólkina í 40°C, hrærið þurrgerið út í þar til það er uppleyst.
3. Bætið út í mjólkina olíu og eggi og hrærið vel saman. Hellið yfir hveit-sykurblönduna og hrærið vel saman.
4. Breiðið rakt viskustykki yfir og leyfið að lyfta sér í 30-40 mín. á trekklausum stað.
5. Útbúið næst fyllinguna: Hitið smjör (ekki bræða) við vægan hita. Blandið saman sykri og kanil og takið af hellunni þegar smjörið er orðið mjúkt en ekki farið að bráðna alveg.
6. Hnoðið og fletjið út deigið á hveitstráðan flöt.
7. Smyrjið fyllinguna yfir og rúllið upp þannig að skurðurinn vísi niður.
8. Skerið í 2 sm snúða, raðið þeim á pappírsklædda ofnplötu, leggið rakt viskustykki yfir og leyfið að lyfta sér í 30 mín.
9. Hitið ofninn í 170°C.
10. Stingið inní ofn í 13-15 mín.
11. Á meðan snúðarnir kólna er ráð að útbúa glassúrinn: hrærið öllu saman og bætið við mjólk eða kaffi til að þynna hann eftir þörfum. Berið á snúðana og ta-da: þeir eru reddí!

Tweet

Lakkrístoppar

Það er nú meiri jólahelgin að baki. Við kláruðum helstu gjafakaupin, hlustuðum á jólatónlist, pökkuðum inn gjöfum og náðum að senda meira að segja að senda þær úr landi.

Og ég náði að baka fyrstu sortina fyrir þessi jól: lakkrístoppa.

Þegar pabbi og Hulda komu í heimsókn í síðasta mánuði komu þau færandi hendi: kaffi, lýsi, konfekt, næringarger og síðast en ekki síst, íslenskt sælgæti. Þar á meðal var lakkrískurl frá Nóa Siríus, og uppskriftin að lakkrístoppunum kemur einmitt af þeim poka.

HVAÐ
3 eggjahvítur
200 g púðursykur
150 g rjómasúkkulaði
150 g lakkrískurl

HVERNIG
1. Hitið ofninn í 150°C.
2. Stífþeytið eggjahvítur og púðursykur.
4. Saxið súkkulaðið smátt. Blandið lakkrískurli og súkkulaði varlega saman við stífþeyttu eggjahvíturnar.
5. Látið á plötu með teskeið.
6. Bakið í miðjum ofni við í 15-20 mín. Bæði hiti og tími getur verið breytilegur eftir ofnum.

Mínir toppar urðu svolítið stórir því ég fór ekki eftir leiðbeiningunum um að nota teskeið. Að sama skapi molnuðu þeir auðveldlega, svo ég legg til að hafa þá minni og sjá hvernig það kemur út.

Tweet

Kryddkaka

Nú þegar allverulega er farið að styttast í jólin finnst mér kjörið að deila með ykkur uppskrift að kryddköku sem ég bakaði fyrr í haust.

Það er fátt eins jólalegt og ilmurinn af köku í ofni og kryddum. Kanill, negull.. þetta eru jólakryddin í ár og um aldir alda.

Þessi uppskrift kemur úr Stóru bakstursbókinni sem Baldur gaf mér fyrir áratug og rúmlega það. Það er ofureinfalt að henda saman í þessa uppskrift og krefst engra sérstakra tóla. Von bráðar angar húsið af jólailmi.

HVAÐ
2 egg
2,5 dl sykur
1,5 dl súrmjólk
100 g smjör, bráðið
2,5 dl hveiti
2 tsk lyftiduft
2 tsk kanill
1 tsk engifer
1 tsk negull

HVERNIG
1. Hitið ofninn í 175°C.
2. Smyrjið 1,5 lítra form vel með smjöri (ekki bræddu því það gefur of þunnt lag).
3. Bræðið smjörið og kælið.
4. Þeytið saman egg og sykur.
5. Hrærið súrmjólk og smjör útí.
6. Setjið hveitið, lyftiduftið og krydd út í síðast og hrærið vel.
7. Hellið deiginu í formið. Bakið neðarlega í ofninum í 40-45 mín.
8. Látið kökuna kólna í nokkra stund. Hvolfið henni síðan úr forminu og hafið formið yfir henni meðan hún kólnar.

Þessi kryddkaka verður bara betri með smá smjöri.

 

 

Tweet

Kíkertublondies

Ok, kannski ertu að velta eftirfarandi spurningum fyrir þér:

Hvað eru blondies?

Svar: Þær eru eins og brownies nema ljósar. Seigar og þéttar en mjúkar og góðar.

Ok, en hvað þá með kíkertur, hvað er það?

Svar: Kíkertur eru kjúklingabaunir nema þær eru ekki kjúklingabaunir. Vildi ekki hræða neinn með því að baka smákökur úr kjúklingabaunum.

Ertu semsagt að segja að þetta eru smákökur úr baunum?

Svar: Já!

Og þær eru alveg rosalega góðar. Hveitilausar, sem er góð tilbreyting og hvíld frá hinum hefðbundnu, baunalausu smákökum.

Bara prófa. Svaka gott. Ég lofa.

Uppskriftina fékk ég frá Monique sem heldur úti síðunni Ambitious Kitchen.

HVAÐ
240 g soðnar kjúklingabaunir (1 dós)
130 g hnetusmjör
1/3 bolli hlynsýróp
2 tsk vanilla
1/2 tsk salt
1/4 tsk lyftiduft
1/4 tsk matarsódi
1/3 bolli súkkulaðidropar
2 msk súkkulaðidropar
Sjávarsalt

HVERNIG
1. Hitið ofninn í 175°C.
2. Smyrjið 20x20 sm form.
3. Setjið allt hráefnið, nema súkkulaðið, í matvinnsluvél. Blandið þar til mjúkt.
4. Bætið 1/3 bolla af súkkulaðidropum við og hrærið saman við deigið.
5. Hellið deiginu í formið. Dreifið 2 msk af súkkulaðidropum yfir.
6. Bakið í 20-25 mín. þar til kantarnir eru rétt byrjaðir að brúnast og tannstöngull kemur hreinn út.
7. Kælið í 20 mín. Dreifið smá sjávarsalti yfir og skerið í 16 bita.

 

Tweet

Súkkulaðibitakökur með hvítu & dökku súkkulaði

Ég var í stuði fyrir smákökur um daginn og fór á stúfana. Fann þessa uppskrift hjá henni Ree sem heldur úti hinni geysivinsælu síðu The Pioneer Woman. Svo ég skellti að sjálfsögðu í þær, sérstaklega þegar ég sá að það var hvítt súkkulaði í 'ðeim. Ég veit ekki hvað það er með mig og hvítt súkkulaði, en við erum BFF.

Eitt samt: Þær eru svolítið linar þessar smákökur. Jafnvel eftir að þær hafa kólnað. Svo það gæti verið ráði að auka aðeins við hveitimagnið eða minnka smjörmagnið. Eða hafa þær aðeins lengur inní ofninum. Reyndar held ég að það væri ráð að skella deiginu inn í ísskáp í svona 2 tíma og síðan móta úr því kúlur. Geri það næst!

Svo áferðin er ekki fullkomin en bragðgóðar eru þær.

Ég gerði hálfa uppskrift en hér er heil uppskrift eins og hún kemur af beljunni.

HVAÐ
300 g smjör, við stofuhita
2 bollar sykur (eða: 1 bolli sykur og 1 bolli púddari)
2 egg
3 tsk vanilludropar
2 bollar hveiti
3/4 bolli kakó
1,5 tsk matarsódi
1 tsk salt
1,5 bolli dökkir súkkulaðidropar
2 bollar hvítir súkkulaðidropar

HVERNIG
1. Hitið ofninn í 175°C.
2. Hrærið saman smjör og sykur þar til létt og ljóst. Skafið neðan úr hliðunum.
3. Bætið við eggjunum einu í einu, hrærið, bætið svo vanillunni útí.
4. Sigtið út í hveitið og kakóið og bætið salti og matarsóda út í. Hrærið varlega þar til allt hefur blandast saman (ekki hræra of mikið).
5. Bætið súkkulaðidropunum út í og hrærið þeim varlega saman við deigið.
6. Inní ísskáp með deigið í 2 tíma.
7. Mótið kúlur úr deiginu með ísskeið og leggið á bökunarpappír. Skreytið með hvítum súkkulaðidropum.
8. Bakið í 9-11 mín og kælið á grind.

Ísköld mjólk og málið er leyst!

Tweet