Gleðigangan

Við kíktum á Gleðigönguna með familíunni og áttum alveg yndislegan dag niðri í bæ. Bærinn var pakkfullur af fólki enda frábært veður.

Stjarnan í göngunni var að sjálfsögðu Páll Óskar á svaninum, eða litla ljóta andarunganum eins og hann kallaði hann. Gleðigangan hófst við BSÍ og sniglaðist þaðan út að Arnarhóli þar sem skemmtiatriði á sviði tóku við.

Eftir Arnarhól hélt hersinginn út í Fógetagarð á matarmarkaðinn í smá miðdegishressingu áður en haldið var austur í Hlíðar.

Ég tók saman smá vidjó frá deginum (hér að ofan) og síðan eru nokkrar myndir hér að neðan.

Tweet

Akrafjall

Haldiði að maður hafi ekki bara skellt sér upp á Akrafjall í góðra vina hópi? Pabbi plataði okkur í fjallgöngu með gönguhópnum sínum og ég plataði Maríu og Kára svo úr varð úrvalshópur því Birgitta og Emma slógust líka með í för.

Við fengum fínt veður þó smá skúrir hafi gert vart við sig. Eitthvað var líka lofthræðsla að láta á sér kræla meðal tiltekinna fjallagarpa, en með dyggum stuðningi okkar hinnar tókst að yfirbuga hana.

Uppi á toppi áðum við til að njóta útsýnisins og sáum einmitt yfir Akranesbæ. Leiðin niður sóttist síðan vel því við völdum aflíðandi brekkur. Allt í allt var gangan auðveld og skemmtileg og félagskapurinn eðal.

Tweet

Heimsókn á Akranesið

Það er alltaf gaman að koma í heimsókn til Maríu vinkonu á Akranesinu. Húsið er alltaf fullt af börnum, hundum, köttum og naggrísum. Ef manni finnst nóg um er alltaf hægt að skreppa út í garð og kíkja á jarðarberjaplönturnar.

Að þessu sinni ræddum við vinkonur um heima og geima, sem er yfirleitt okkar umræðuefni. Krakkarnir vildu líka sýna okkur Kela kött og naggrísina og þegar frumburðurinn kom heim sáum við að það er ekki langs að bíða í að hann verði hærri en Baldur.

Tweet

Sumarbústaðir

Það er greinilega vinsælt að verja Verslunarmannahelginni í bústað á þessu landi. Það er í það minnsta mín ályktun eftir afstaðna helgi.

Fyrst heimsóttum við foreldra Huldu í bústað þeirra á Reykjum. Fórum í æðislega heita pottinn sem Georg, pabbi Huldu, steypti sjálfur. Síðan gistum við í bústaðnum okkar á Grímsnesi þar sem við Baldur tókum út nýjustu viðbæturnar og vorum mjög hrifin. Loks heimsóttum við frændfólk mitt í föðurætt í bústað á Borgarfirði með viðkomu í sundlauginni á Varmalandi.

 

Tweet

Bæjarferð

Við fórum í skemmtilega bæjarferð með pabba og Huldu í gær, þar sem við m.a. fengum okkur ramen súpu á Ramen Momo á Hafnargötu, heilsuðum upp á Ernu frænku Baldurs, kíktum á fuglalífið við Tjörnina og fengum okkur kaffipásu á Cafe Babalú.

Tweet