Tønsberg

Þó síðasti dagur septembermánaðar sé runninn upp lætur haustið enn eftir sér bíða. Veðrið og gróðurinn eru enn í síðsumargír.

Þetta síðsumar í Telemark er geisilega fallegt. Dagarnir eru flestir heiðskírir og lokka mann út. Nú þegar við erum komin á bíl höfum við uppgötvað að síðsumarið er líka fallegt í héruðunum í kring.

Við rúntuðum um Vestfold í gær og skoðuðum náttúruna með sínum trjám og ám. Stoppuðum líka stutt í Tønsberg og röltum um bryggjuna. Þar lá knörr við landfestar sem við skoðuðum forvitnum augum.

Tweet

Epli og kartöflur frá bóndanum í Gvarv

Við fórum í bíltúr til Bø í gær. Á leiðinni áðum við hjá eplabónda í Gvarv sem selur epli og eplamost auk ýmssa tegunda kartafla.

Eftir að hafa smakkað ólíkar gerðir af eplum og prófað ólíka safa keyptum við tíu kílóa sekk af flottum kartöflum, einn kassa af eplum og tvær fernur af besta eplasafanum.

 

Tweet

Kragerø

Ásgeir vinur okkar kíkti í heimsókn til okkar í nokkra daga og saman fórum við að skoða Kragerø, sumardvalastað sem margir Norðmenn heimsækja í fríinu sínu.

Að vísu var ekki mikið sumarveður í lofti, og allir innlendir ferðamenn löngu farnir heim, en við höfðu engu að síður gaman af að ganga um bæinn og ímynda okkur hann fullan af sumarklæddu fólki með ís í hönd.

Timburhúsin eru skemmtilega litrík og nálægðin við sjó og höfn færir bænum enn frekari sjarma.

Tweet

Fréttir mánaðarins

Við erum flutt og í gær keyptum við okkur bíl!

Gerd leigusalinn okkar er flutt aftur til Skien og því gerðum við okkur lítið fyrir og fluttum í lok ágúst í íbúð nágrannakonu okkar! Sem er í sömu blokk að sjálfsögðu, og í þokkaót á sömu hæð. Það eina sem við þurftum að gera var að skottast yfir stigapallinn með flíkurnar á herðatrjám, diskana og glösin í höndunum og rogast með nokkra kassa og voila! Við vorum flutt.

Og svo þurftum við reyndar að mála. Það sá Baldur hins vegar alveg um og fórst það verk vel úr hendi.

Og bílinn er franskur Renaut Megan Scenic. Maður situr hátt jafn hátt í honum og í smájeppa, hann er sjálfskiptur með aksturstölvu, hólfum út um allt og cruise control. Við erum mjög lukkuleg með gripinn og höfum ákveðið að nefna hann Steinrík eftir frænda sínum í Frakklandi.

Tweet

Frábær Íslandsheimsókn

Þá er þessi Íslandsheimsókn senn á enda. Hún er hreint út sagt búin að vera dásamleg. Við höfum náð að hitta langflesta af þeim sem við ætluðum að hitta, fara í fjallgöngu, ég kíkti til Boston með Huldu á meðan Baldur og pabbi fóru upp á Úlfarsfellið. Sumarbústaður, Vestmannaeyjar og ég veit ekki hvað og hvað.

En það er alltaf dýrmætast að hitta fólkið sitt! Ég fór einmitt um daginn að hitta Maríu frænku og litla, nýja frændann minn hann Hrafn Inga. Og svo vorum við líka að hitta Unu Karítas í fyrsta sinn og við erum soldið skotin í henni.

Tweet

Þingvellir

Það er alltaf eitthvað einstakt við Þingvelli. Frá Lögbergi er tiltölulega víðsýnt og maður getur skemmt sér við að nefna (rifja upp og reyn' að muna) fjöllin og fellin í kring.

Ekki er nú verra ef það er blankalogn, sól og hlýja. Þá er fallegt að standa við Þingvallavatn og sjá fjöllin speglast á vatnsfletinum.

Tweet

Vestmannaeyjar

Við fórum í frábæra heimsókn til Vestmannaeyja um helgina. Veðrið lék við okkur allan tímann og náttúrufegurðin í Eyjum er af öðrum heimi.

Við gistum hjá foreldrum Huldu sem höfðu tekið fallegan bústað á leigu ásamt móðurystur Huldu og hennar manni. Fyrsta kvöldið vorum við síðan svo heppin að frændi Huldu tók okkur í smá túr um Heimaey en hann býr einmitt á eyjunni. Við lærðum m.a. að heimamenn eru mjög gefnir fyrir uppnefni hverskonar og eru að öllu leyti miklir húmoristar.

Daginn eftir kíktum við á safnið Eldheima þar sem maður lærir um gosið í Eyjum '73. Eftir heimsókn á safnið gengum við upp á hraunið sem stendur nánast í bænum. Við pabbi leituðum að húsinu hans Þórðar afa og fundum götuna sem hann bjó við. Sérkennilegt til þess að hugsa að mörgum metrum fyrir neðan mann hafi hús langafa manns staðið. 

Þegar við vorum orðin þreytt og lúin eftir hraungönguna fengum við okkur frábæran vegan mat á veitingastaðnum Gott. Síðan var kominn tími til að taka Herjólf aftur til Landeyjarhafnar.

Næst þegar ég kem til Eyja er planið að stoppa aðeins lengur og ná að sjá meira af bænum. 

Tweet