Ofnbakað rótargrænmeti með linsum og timjan

 

Ég er búin að útbúa þetta rótargrænmetissalat einu sinni í viku í allt haust. Það er einfalt, bragðgott og fjölhæft því maður getur notað hvaða rótargrænmeti sem maður á hverju sinni.

 

Ég er reyndar búin að prófa þetta salat það oft núna, og í hinum ýmsustu útsetningum, að ég er komin með mína uppáhaldsútgáfu af honum: kartöflur, sætar kartöflur, sellerírót og gulrætur. Einn bolli af hverju og þá fær maður bestu útgáfuna af þessu heita linsubaunasalati.

 

Þá er ég líka búin að prófa að útbúa þetta salat með hvítvínsediki þar sem ég átti ekki sherríedik í fyrstu, en eftir að hafa prófað réttinn með sherríediki mæli ég eindregið með því. Ef maður er á annað borð duglegur að nota edik, eða sér fram á að gera þennan rétt oft, þá er um að gera að kaupa sér sherríedik.

 

HVAÐ

1 bolli þurrar, grænar linsur

2 sellerístilkar, niðursneiddir

4 bollar rótargrænmeti í teningum (t.d. gulrætur, sellerírót, steinseljurót, pastínökkur (nípur), sætar kartöflur, kartöflur, rófur, rauðrófur)
1 rauðlaukur, saxaður

1 msk þurrkað timjan

3 msk ólívuolía

0,5 tsk Herbamare salt

3 msk steinselja, söxuð

1,5 msk sherrí edik

 

HVERNIG

1. Hitið ofninn í 200°C.
2. Gott er að leggja linsurnar í bleyti um morguninn ef tími gefst til þess. Annars er líka hægt að sjóða þær beint en það styttir suðutímann að leggja þær í bleyti fyrst. Skolið linsurnar vel og sjóðið þær í söltu vatni í 20-25 mín. eða þar til þær eru mjúkar en halda enn lögun sinni. Hellið þeim í sigti og leggið til hliðar.
3. Skellið niðursneiddu grænmetinu og selleríinu í góða skál. Hellið 2 msk af ólívuolíu yfir og stráið salti og timjan yfir. Blandið olíu og kryddum vel saman við grænmetið.
4. Klæðið ofnplötu með álpappír, hellið grænmetinu yfir og dreifið vel úr því svo það verði aðeins eitt lag á plötunni. Inní ofn í 25 mín. Það er gott um miðbik tímans að opna og hræra aðeins í grænmetinu.
5. Blandið saman grænmetinu og linsunum í skálinni. Hellið yfir 1 msk af olíu og 1,5 msk af sherríediki. Bætið steinseljunni við. Hrærið upp í salatinu.

Mér finnst besta að bera þetta salat fram með góðu brauði og Rondelé  rjómaosti. Þegar ég hef tíma fyrir mér þá finnst mér gaman að bera þetta heita salat fram með vegan salatinu.
 

Tweet

Vegan salat

Ég kalla þetta salat vegan salat einfaldlega af því að uppskriftina fékk ég frá Sassy sem heldur úti síðunni Vegan Coach. Á síðunni sinni er hún með mörg myndbönd þar sem hún kynnir mann fyrir allskyns grænmeti, eins og t.d. radicchio káli sem ég hafði aldrei heyrt um áður, og síðan eru nokkur matreiðslumyndbönd. Mæli með Sassy!

Og ég mæli með þessu salati! Hvað er svona gott við þetta salat? Það er næringargerið sem maður setur út á, fræmulningurinn, þurrkaði lauk- og hvítlaukurinn og balsamikdressingin. Salatið verður bragðmikið, svolítið salt, krönsí og safaríkt. Ég finn munnvatnskirtlana fara af stað bara við að skrifa niður þessa lýsingu!

Áður en við dembum okkur í uppskriftina vil ég taka fram að uppistaðan í þessu salati skiptir ekki öllu máli. Salatið hennar Sassy skartar rauðum salatblöðum, romain salati, rauðkáli, radicchio, gul- og rauðrófur, bok choy, tómötum og gúrku. Þar sem ég bý ekki í landi slíkrar salat- og kálgnóttar varð ég að breyta innihaldinu svo það endurspeglaði minn norska salatraunveruleika, en ég hélt inni því sem ég gat auðveldlega nálgast. Hér að neðan er uppskrift að salatinu eins og ég gerði það en ég hvet alla til að setja flott lífræn salatblöð í salatið og leyfa þeim að vera uppistaðan.

HVAÐ
1 brokkolíhaus
1 rauð papríka
2 gulrætur, rifnar
1 rauðrófa, rifin
1/2 gúrka
Fræblanda: sólblóma-, sesam-, graskers- og hörfræ
Næringarger
Balsamik edik
Ólívuolía
Safi úr hálfri sítrónu
Óreganó (þurrkað)
Basilíka (þurrkuð)
Hvítlauksduft
Laukduft
Salt

HVERNIG
1. Útbúið fræblöndu í krukku: 1 msk sólblómafræ, 1 msk graskersfræ, 1 msk sesamfræ, 2 msk hörfræ. Hristið saman og geymið inní ísskáp. Þessi fræblanda er líka frábær út á súrmjólk/hafragraut og geymist vikum saman inní ísskáp í lokaðri krukkunni.
2. Skolið/skerið/saxið/rífið grænmeti/kál/salatblöð.
3. Myljið 2-3 msk af fræblöndu í kaffikvörn (sem ekki er notuð undir kaffi!). Annars má líka nota töfrasprota eins og ég gerði, það gengur alveg.
4. Hellið fræmulningum yfir salatið.
5. Bætið 3-4 msk af næringargeri út á og hrærið allt vel saman.
6. Setjið dash af lauk- og hvítlauksdufti yfir, óreganó, basilíku og salti (mæli með Herbamare). Hrærið saman.
7. Hellið yfir sem samsvarar 1-2 msk af ólívuolíu og 1 msk af balsamik ediki. Kreistið hálfa sítrónu yfir. Hrærið vel saman.

Smakkið salatið til og bætið við eftir þörfum. Mér finnst aldrei vera nóg af næringargerinu svo ég dreifi því alltaf aukalega yfir minn skammt þegar hann er kominn á diskinn.

Verði ykkur grænhjartanlega að góðu!

Tweet

Graskersostaterta

Það eru flottheit þennan föstudaginn: Graskersostaterta! Hún er algjört æði!

Þessa tertu þarf að baka daginn fyrir, og því er hún alveg kjörin ef maður ætlar að bjóða í mat eða veislu hvers konar.

Þessi uppskrift kemur frá henni Stephanie sem er með síðuna Joy of Baking.

HVAÐ
Botn:
150 g Graham eða Digestive kex
1 msk sykur
65 g bráðið smjör

Fylling:
450 g rjómaostur, við stofuhita
145 g ljós púðursykur
1/2 tsk kanill
1/4 tsk engifer
1/8 tsk kardimomma
1/8 tsk múskat
1/4 tsk salt
3 stór egg, við stofuhita
1 tsk vanilla
240 ml graskersmauk, heimagert eða úr dós (hér eru leiðbeiningar að heimagerðu mauki)

Krem:
240 ml sýrður rjómi, við stofuhita
1 tsk vanilla
50 g sykur

HVERNIG
1. Hitið ofninn í 180°C.
2. Byrjum á botninum. Smyrjið 20-24 sm smelluform. Myljið kexið (gott að nota lokaðan poka og beita gamla góða kökukeflinu á hann). Blandið saman kexinu, smjörinu og sykrinum. Þjappið kexblöndunni í formið (engir kantar) og bakið í 8-10 mín. Leyfið að kólna á meðan fyllingin er útbúin.
3. Á meðan botninn bakast má byrja á fyllingunni. Mikilvægt er að hráefnið sé við stofuhita! Þannig blandast það betur saman. Leggið rjómaostinn í góða skál og hrærið hann HÆGT í 2 mín. Með því að hræra ostinn hægt saman náum við að minnka loftið sem gengur inn í deigið.
4. Hrærið saman sykrinum, kryddum og salti í sérskál. Bætið svo sykurkryddblöndunni í smáum skömmtum útí rjómaostinn og haldið áfram að hræra hægt saman.
5. Bætið við einu eggi í einu og hrærið vel saman (ca 30 sekúndur fyrir hvert egg).
6. Bætið við vanillu og graskersmauki og hrærið rólega þangað til allt hefur blandast saman. Munið að skafa neðan úr hliðum skálarinnar og hræra því saman við.
7. Hálffyllið eldfast mót með heitu vatni og leggið það neðst í ofninn. Þetta gerum við til að trygga ostatertunni raka í bakstrinum.
8. Hellið deiginu yfir botninn. Bakið við 180°C í 30 mín, lækkið þá hitann niður í 160°C og bakið áfram í 10-20 mín. eða þar til kantarnir eru orðnir púffaðir en miðjan er en svolítið hlaupkennd (jiggly) þegar maður skekur formið.
9. Meðan tertan bakast í ofninum útbúum við kremið. Hrærið saman sýrða rjómanum, vanillunni og sykrinum. Smyrjið ofan á tertuna og bakið hana í 8 mín. í viðbót.
10. Þegar tertan kemur úr ofninum er mikilvægt að renna hníf meðfram köntunum til að losa þá frá forminu. Þegar tertan kólnar dregst massinn saman og með þessu komum við í veg fyrir að kantarnir rifni frá forminu.
11. Klæðið formið með álpappír, kælið tertuna og setjið svo í ísskáp yfir nótt.

Mmm, svo góð!

Tweet

DIY Graskersmauk

Ég keypti grasker um daginn í Kiwi. Rosalega fallegt, appelsínugult, hnöttótt og bústið. Norskt meira að segja.

Ég keypti það fyrir Hrekkjavökuna, rétt eins og ég keypti grasker í Hagkaup í fyrra þegar við vorum á Snorrabrautinni. Það grasker endaði sína lífdaga í gluggakistunni okkar þar sem það brotnaði aðeins meira niður á hverjum degi þar til ég viðurkenndi ósigur minn og skúbbaði því í ruslið.

Eeeen þetta grasker! Þetta grasker skyldi ekki fara sömu leið. Ég ákvað fljótt að ég tímdi eiginlega ekki að nota þennan fallega ávöxt jarðar til að skera út í það. Í staðinn ákvað ég að elda eða baka úr því og fór af stað í að skoða uppskriftir. Ég komst að því að besta nýtingin á graskeri er að vinna úr því mauk sem síðan má nota í hinar ýmsustu uppskriftir. Og það er einmitt það sem ég gerði.

Leiðbeiningar að því hvernig maður býr til graskersmauk fann ég hjá henni Stephanie á joyofbaking.com. Hún segir að best sé að búa til mauk úr smáum graskerjum sem ekki eru þyngri en 3,5 kg. Graskerið sem ég hafði keypt var 2,5 kg svo það fékk að vera með í leiknum!

Þetta er í rauninni sáraeinfalt, mesta vinnan er í lokin þegar maður kreistir vökva úr maukinu.

HVAÐ
Smávaxið grasker 2 - 3,5 kg.

HVERNIG
1. Hitið ofninn í 175°C. Skerið toppinn af graskerinu og skerið síðan graskerið í tvennt.
2. Fjarlægið öll fræ og allt innvols innan úr graskerinu.
3. Leggið báða helmingana á góða ofnskúffu og notið frekar heila skúffu með háum köntum heldur en ofnplötu með lágum köntum (eins og ég gerði og fékk að kenna á því síðar). Leggið á bökunarpappír og inní ofn í 45-75 mín. Tíminn sem graskerið þarf að vera í ofninum er háður stærð þess. Graskerið mitt þurfti bara 45 mín. Stingið hnífi í graskerið til að sjá hvort það sé bakað í gegn, hnífurinn á að renna auðveldlega inn. Leyfið graskerinu að kólna eftir að það kemur úr ofninum. Athugið að þegar þið takið graskershelmingana af plötunni rennur af þeim mikill vökvi. Þess vegna er mikilvægt að hafa heila skúffu svo gólfin verði ekki skúruð upp úr graskersvökva þann daginn eins og mín gólf voru!
4. Skerið burt hýðið. Þið gætuð jafnvel náð að rífa það auðveldlega af eins og ég sá gert í einu kennslumyndbandi en það grasker var mjög smátt, ábyggilega ekki meira en 1,5 kg. Mér tókst allavega ekki að bara rífa hýðið af, eins og það hefði nú verið gaman! Setjið graskerið í matvinnsluvél og maukið þar til áferðin er falleg og mjúk að sjá. Sígið frá allan umframvökva. Umframvökvann má síðan geyma og nota í súpur eða pottrétti til að bragð- og næringarbæta.

Geymist í ísskáp í allavega 2-3 daga. Svo má líka frysta maukið og nota það síðar í kökur, bökur og pottrétti. Sneddí!

Tweet

Helgarpistillinn



Haustið út um gluggann.

 

 

 

 Norskt grasker.

 



Sólargeislar á frosinni jörð.

 

 

 

Sneið af graskersostatertu. Næsari.

 

 

Góður tebolli í nóvemberbyrjun. Góð helgi í nóvemberbyrjun.



Tweet

Hjónabandssæla

Þennan föstudaginn fáum við uppskrift að hjónabandssælu. Þessi uppskrift kemur frá vinkonu minni Salome. Hún kallar hana heimsins bestu hjónabandssælu og ég treysti því alveg. Ég hef sjálf svo litla reynslu af því að borða hjónabandssælu að ég get ómögulega dæmt um það, ég bakaði hana fyrst og fremst fyrir Baldur sem elskar hjónabandssælu.

Að því sögðu tek ég fram að þessi hjónabandssæla var algjört nammi! Baldur, hjónabandssælu spekúlant, staðfesti það líka með því að raða henni í sig. Jömm jömm!

Ég dembdi allri uppskriftinni í eitt form og bakaði eina hálfgerða hnallþóru hjónabandssælu. Næst þegar ég baka hjónabandssælu ætla ég hins vegar að deila uppskriftinni í tvö form og fá þannig þynnri sneiðar.

Ég læt uppskriftina fylgja eins og hún kemur frá Salome. Hún minnkar iðulega sykurmagnið þegar hún bakar og það gerði ég líka, en sykurmagnið hér að neðan endurspeglar full force sykurmagn.

HVAÐ
250 g smjör, við stofuhita
1 bolli púðursykur
1 bolli sykur
1 egg
2 bollar hveiti
3 bollar haframjöl
1 tsk matarsódi
Rabarbarasulta

HVERNIG

1. Hitið ofninn í 180°C.

2. Hrærið saman smjöri og sykri.

3. Bætið egginu útí og hrærið saman við.

4. Bætið restinni út í (hveiti, hafrar, matarsódi) og hrærið saman, en ekki of lengi.

5. Deilið deiginu í tvö smurð form en haldið þó hluta af deiginu eftir til að setja ofan á. Þrýstið deiginu létt niður í formið.

6. Smyrjið sultunni yfir og stráið restinni af deiginu yfir sultuna.

7. Bakið í 20 mín. og ekki mínútu lengur.

 

Svona hjónabandssæla er kjörin í helgarútivistina. Þá getur maður jafnvel bakað hana í skúffu og skorið hana niður í bita svo hún verði einskonar hafrabarri með sultu. Sneddí!

 

Og ef þið farið í fjallgöngu með hjónabandssælu í Guðanna bænum gleymið ekki mjólkurflöskunni!

 

Tweet

Gleðilega Hrekkjavöku!

Það er víst Hrekkjavakan í kvöld. Ég var minnt á það þegar ég fór að versla fyrr í kvöld og mætti hópi uppáklæddra ungmenna.

Mér finnst Hrekkjavakan spennandi og skemmtileg. Ég er að vísu ekki búin að dressa mig upp en ég er með grasker í húsinu, það er ekta.

Tweet

Bókarabbið: Októberbækur

 

Október var í rólegri kantinum. Segi ég og las samt fimm bækur! Það er kannski ágætt að koma aðeins niður á jörðina!

Það er engu að síður áhugavert að sjá að lestrarrútínan mín er svolítið öfugsnúin þetta haustið. Venjulega les ég lítið á sumrin og síðan kemur september með kraftmikla innspýtingu í lesturinn og sú innspýting endist yfirleitt fram til jóla. Þetta ætlar að verða eitthvað öðruvísi þetta haustið og ekki sér fram á að nóvember verði gjöfullli því ég ætla að skrá mig til leiks í NaNoWriMo og þá forðast ég allar bækur. Ég smitast nefnilega jafnauðveldlega af góðum stíl eins og af stórum geispa.

Ég ætla hér að taka fyrir þær bækur sem stóðu upp úr í mánuðinum, sem eru Half Broke Horses og Jamrach's menagerie. Mér finnst eins og ég ætti að skrifa um The Interestings af því að hún hefur fengið svo mikla umfjöllun á árinu, en í sannleika sagt þá hef ég ekkert um hana að segja.

Half Broke Horses (2009)

Jeannette Walls er þekktust fyrir að hafa gefið út æskuminningar sínar í bókinni The Glass Castle. Sú bók er alveg rosaleg. Sagan er engin sérstök skemmtilesning því þarna lýsir Jeannette uppvaxtarárum sínum og systkina sinna sem einna helst má lýsa með orðinu vanræksla. Engu að síður er um magnaða frásögn að ræða á öllum sviðum: hvað varðar efnistök, andrúm, textasmíð. Textinn stendur sterkur með sjálfum sér, sem kemur líkast til af því að Jeannette stendur sterk með sjálfri sér í gegnum alla frásögnina og öll sín uppvaxtarár.

Eeeeen, nú er það bókin Half Broke Horses sem er til umfjöllunar (áfram með smjörið Ásdís!). Ég segi hiklaust að jafnvel þótt um sjálfstætt verk sé að ræða er einstaklega áhugavert að lesa það í samhengi við The Glass Castle, því í þessari bók segir Jeannette frá móðurömmu sinni og uppeldi móður sinnar, og þegar maður hefur lokið við The Glass Castle er maður orðinn ansi forvitinn að vita hvaðan fólk eins og foreldrar hennar koma.

Hér er að mörgu leyti það sama í boði og í The Glass Castle: sterkur texti, sterkar persónur, fólk sem fer sínar eigin leiðir og er oft mjög á skjön við það sem gengur og gerist. Hér eru hins vegar engar lýsingar á hræðilegri vanrækslu sem gerir lesturinn auðveldari. Amman, Lily Casey Smith, er sérvitur og sjálfstæð, lendir í hremmingum, lifir allt af og hefur sína eigin sýn á lífið og tilveruna. Það er heillandi að fylgjast með lífshlaupi hennar og upplyftandi, sem er kannski einmitt það sem The Glass Castle er ekki. Þess vegna er ágætt að lesa þessa bók á eftir hinni til að halda trú sinni á mannkyn gangandi. Við þurfum þess.

Jamrach's menagerie (2011)

Þetta er fyrsta bókin sem ég les eftir Carol Birch. Áður en ég byrjaði á bókinni hafði ég einhverra hluta vegna bitið það í mig að þetta væri fyrsta verk höfundarins og var alveg agnofa meðan á lestrinum stóð. Þegar ég hafði lokið lestrinum og mátti lesa mér til um höfundinn komst ég að hinu sanna: Carol er margra bóka höfundur. Nú meikar heimurinn aftur sens.

Þetta er mögnuð saga. Hún er svona Charles Dickens og Moby Dick í einni bendu. Aðalpersónan, Jaffy Brown, og besti vinur hans, Tom, vinna fyrir sérstakan náunga, herra Jamrach sem flytur inn exótísk dýr á borð við tígrisdýr, páfugla og eðlur. Þegar hann hefur spurnir af því að sést hafi til alvöru dreka í Indónesíu sendir hann skósveina sína Jaffy og Tom á skip með það að markmiði að hafa uppi á þessum dreka.

Það er afskaplega margt vel gert í þessari sögu. Persónur eru vel dregnar og trúverðugar með sína skapgerðabresti og mannkosti, lýsingar á sögusviði og sögutíma gæða söguna fyllingu og lýsingu og ferðalag þeirra félaga kringum hnöttinn er stórskemmtilegt. Carol er hins vegar ekkert að víla það fyrir sér að fara óhefðbundnar slóðir og hristir allverulega uppí manni seinni hluta sögunnar þegar okkar menn komast í hann krappann.

Ég get sko alveg mælt með þessari.

Þá er það klappað og klárt og ég segi októberbókarabbi lokið. Vísdómsorð þessa bókarabbs koma frá C. S. Lewis:

 

I can’t imagine a man really enjoying a book and reading it only once.

 

Heyr heyr!

Tweet

Gleðilegt haust!

Það er ekki seinna vænna að óska öllum heillavæns hausts. Það er einu sinni mætt á svæðið eins og sjá  má svo glögglega á myndinni að ofan.

Myndin var reyndar tekin fyrir rúmum tveimur vikum, þegar við fórum í hjólatúr niður í bæ til að heimsækja Asia Market sem þar er að finna. Komum klifjuð linsum og baunum, fíkjum og hnetum úr þeirri ferð. Í millitíðinni hafa enn fleiri lauf fallið og fokið um, og það hefur rignt vel á okkur.

Gönguferðir á moldarstígum geta orðið svolítið vandasamar eftir miklar rigningar. Þá er gott að koma heim í hrökkbrauð og hnetusmjör!

En komist maður á leiðarenda fær maður verðlaun. Åletjern og hæðirnar í kring eru ekkert síður að fíla haustið en ég. Við erum sammála um svo margt.

 

 

Tweet

Matarmikil grænmetissúpa

Í hillunni þar sem við geymum matreiðslubækurnar okkar er að finna áhugaverða bók sem Baldur kom með í búið frá foreldrum sínum. Hún heitir Diet for a Small Planet: High Protein Meatless Cooking og er eftir Frances Moore Lappé. Þessi bók var gefin út '71 og er fræðirit um hvernig hægt er að setja saman prótínríkar grænmetismáltíðir.

Ég fór að blaða í þessari bók fyrir nokkru og skoða uppskriftirnar sem henni fylgja. Þá rakst ég á súpu sem Frances kallar einfaldlega Hearty Vegetable Soup. Það var einmitt það sem mig langaði í, matarmikla og kraftmikla súpu fyrir kólnandi haustdaga.

Eftir að hafa gert okkur ferð í heilsubúðina til að verða okkur úti um mísó gat ég brett upp ermar og eldað þessa súpu. Jömm, hún er alveg yndisleg. Hnausþykk, braðgsterk, næringarrík. Bulgur og hýðisgrjón fara í hana og því minnir hún svolítið á íslenska kjötsúpu, allavega eins og Rut amma mín gerið hana.

En þetta er engin kjötsúpa, heldur útpæld súpa þar sem baunir og grjón vinna saman að því að færa líkamanum heilt prótín og næringargerið færir okkur B vítamín. En mestu skiptir að hún er frábærlega bragðgóð og áferðarfalleg.

HVAÐ
Ólívuolía
2 laukar, saxaður
2 bollar af niðursneiddu grænmeti (t.d. gulrætur, sveppir, sellerí)
1 dós tómatar
klípa af cayenne pipar
2 msk næringarger
1/2 tsk af þessum kryddum: basilíka, estragon, óreganó, sellerí fræ
1/4 tsk af þessum kryddum: timjan, rósmarín, meiran, salvía
2 msk sojasósa
1/2 bolli hýðisgrjón, ósoðin
1/2 bolli bulgur, ósoðið
1 bolli soðnar sojabaunir
6-8 bollar grænmetissoð
1-2 msk mísó

HVERNIG
1. Leggið sojabaunir (ca 1/3 bolli)  í bleyti yfir nótt.* Sjóðið þær með lárviðarlaufi í 2-3 tíma eða þar til þær eru mjúkar í gegn. Það getur verið gott að hæra varlega í þeim af og til. Einnig er ráð að veiða upp hýðið utan af baununum sem flýtur upp á yfirborðið. Þá gæti vel þurft að bæta vatni út í pottinn þar sem suðutíminn er svo langur.
2. Steikið saman lauk og niðurskorið grænmetið í ólívuolíunni í stórum potti í 5-10 mín.
3. Bætið útí tómatnum, cayenne piparnum, næringargerinu, öllu kryddinu og sojasósunni. Hrærið vel.
4. Bætið út í hrísgrjónum og bulgur, sojabaununum og grænmetissoðinu.
5. Náið upp suðu.
6. Takið einn bolla af súpu til hliðar og blandið 1-2 msk af mísó útí. Hrærið vel þar til mísóið er uppleyst. Skemmtilegt er að mauka þennan eina bolla af súpu með töfrasprota.
7. Hellið mísóblöndunni aftur út í súpuna.
8. Leyfið súpunni að malla í 1-2 tíma eða þangað til hrísgrjónin eru soðin. Ef þarf má alltaf bæta meira vatni út í súpuna.

Með þessari súpu er ansi gott að fá sér heilkorna brauð og góðan ost.

* Ég sýð reyndar aldrei svona smotterí í einu heldur nota ég tækifærið og sýð minnst hálft kíló af baunum í einu, leyfi þeim að kólna, deili þeim síðan í box eða nestispoka, skrifa innihald og dagsetningu á og set í frystinn.

Tweet

Grænkálssnakk

Þessar grænkálsflögur smakkaði ég í fyrsta sinn hjá  henni Ingibjörgu jógínu. Vá! Þvílíkt lostæti! Þær eru saltar og stökkar og mann langar bara í meira og meira.

Ingibjörg hafði útbúið sínar flögur í þurrkofni, en þar sem ég á enga svoleiðis fína græju fann ég uppskrift á netinu sem gerir ráð fyrir því að maður noti bakarofn.

Þessi uppskrift kemur frá Joanna Goddard.

Áður en við hefjumst handa er eitt atriði sem verður að vera á hreinu: grænkálið þarf að vera eins þurrt og hægt er að ná því, svo að flögurnar verði síður slepjulegar.

HVAÐ
Vænt búnt af grænkáli (helst lífrænu)
1 msk sesam eða ólívuolía
1-2 tsk soja eða tamarisósa
1 msk sesamfræ

HVERNIG
1. Hitið ofninn í 175°C.
2. Þvoið og þurrkið grænkálið rækilega. Fjarlægið stilkana.
3. Rífið grænkálið niður í bita ofan í skál.
4. Bætið við olíunni, sojunni og fræjunum, blandið saman við kálið með höndunum. Leggið ykkur fram um þekja hvert einasta blað vel og vandlega.
5. Leggið grænkálsblöðin á ofnplötu klæddri bökunarpappír. Ef búntið er vel vænt gætuð þið þurft að dreifa þeim á tvær plötur.
6. Inní ofn í 6-10 mín. Hér þarf að fylgjast vel með því það er erfitt að gefa upp nákvæman tíma. Það er best að taka flögurnar út áður en þær verða að ösku!

Njótið þess að næra líkamann á þessum grænu eðalflögum!

Tweet

Súkkulaðiterta með jarðarberjum

Það er föstudagur og þá er komið að föstudagsuppskriftinni. Súkkulaðiterta! Hver slær hendinni á móti annarri eins dásemd?

Þegar við bjuggum á eyjunni góðu í norður Noregi og deildum húsi með litlu Svíunum okkar Alexander og Petru bakaði Alexander stundum það sem hann kallaði kladdkaka. Hún var jättebra, sérstaklega með vaniljekrem sem þau, rétt eins og Norðmenn, heimtuðu að setja ofan á alla eftirrétti.

Þessi terta hér minnir mjög svo á þessa góðu kladdkaka. Hún er mjúk, svolítið blaut og með ríkulegu súkkulaðibragði.

Þessa uppskrift fann ég hjá henni Evu Laufey.

HVAÐ
140 g smjör, við stofuhita
100 g flórsykur
3 egg
170 g súkkulaði, brætt
2 msk hveiti
1 tsk vanillusykur
2 msk kakó

HVERNIG
1. Hitið ofninn í 180°C.
2. Hrærið saman smjör og flórsykur þangað til blandan verður létt og ljós.
3. Bætið við eggjunum einu í einu.
3. Hellið bræddu súkkulaðinu saman við og hrærið vel.
4. Bætið loks við hveitinu, vanillusykrinum og kakóinu og hrærið saman við.
5. Hellið deiginu í vel smurt 24 sm form.
6. Bakið í 25-30 mín.

Með þessu er ansi gott að fá sér fersk jarðarber og góðan vanilluís.

Tweet

Helgarpistillinn

1
Þessa súpu eldaði ég um helgina, hún er algjört megadúndur! Sojabaunir, misó, búlgur, sveppir, næringarger, hýðisgrjón... megadúndur er ekki orðum aukið. Við keyptum um daginn hvítlaukschili paste frá ástralska framleiðandanum Jensen's Choice og því bættum við síðan útí eftir hendinni þegar súpan var komin í diskana. Kraftmikil haustsúpa eins og þær gerast bestar.

2
Við fórum í pikknikk upp að Åletjern á sunnudaginn. Tókum með okkur kakómjólk í flöskum og smurt rúgbrauð. Ef við hefðum ætlað að taka Norðmanninn á þetta hefðum við pakkað appelsínum og Kvikk Lunsj, en við virðumst enn vera undir dönskum áhrifum og því er það rúgbrauð með osti í nesti fyrir okkur.

Við settumst á vatnsbakkann, brettum upp ermar og nutum veðurblíðunnar. Nú erum við hætt að fara út í vatnið og kominn mánuður síðan við tókum síðasta sundsprett. En þá nýtur maður Åletjern frá þurru landi og lætur öndunum vatnið eftir.

Þær eru, btw, vitlausar í brauð.

3
Súkkulaðiterta! Sem var bökuð í gær. Súkkulaðiterta á sunnudegi. Fersk jarðarber og vanilluís. Ég legg ekki meira á  ykkur.

Hér að neðan eru síðan nokkrar myndir úr lautarferðinni í gær. Sjáið bara hvað haustið er fallegt hérna í suður Noregi!

 

 

Tweet

Franskt sumarsalat

Þessa uppskrift rakst ég á í Fréttablaðinu fyrir Guð veit hve mörgum árum. Ég klippti hana út og setti í uppskrifta-úrklippubókina mína og þar hefur hún fengið að dúsa þar til nýverið að ég mundi eftir þessari uppskrift og hafði uppá henni.

Uppskriftin kemur úr franski kokkabók sem leikkonan Vigdís Hrefna deildi með lesendum Fréttablaðsins, og sem ég deili núna hér.

Fyrir þá sem hafa búið í Frakklandi og aðeins komist upp á bragðið með matinn þar þá á þetta salat ekki eftir að valda vonbrigðum. Ekta franskt enda salatið tilbrigði við hið þekkta salade Niçoise sem er í miklu uppáhaldi hjá mér.

HVAÐ
500 g nýjar litlar kartöflur
250 g kirsuberjatómatar
200 g haricot verte baunir
200 g soðnar linsur
stórt búnt af basilíku

Salatdressing:
2 skallottulaukar, fínt saxaðir
3 msk hvítvínsedik
2 msk grófkorna sinnep
Sjávarsalt
Nýmalaður svartur pipar
7 msk ólívuolía

HVERNIG
1. Sjóðið kartöflurnar í hýðinu í 20 mín.
2. Hitið ofninn í 200°C. Smyrjið eldfast  mót með ólívuolíu og bakið tómatana í 10 mín.
3. Setjið allt sem á að fara í salatdressinguna, nema olíuna, í krukku með loki og hristið vel. Bætið síðan olíunni við og hristið aftur.
4. Skerið kartöflurnar í tvennt, setjið í salatskál og blandið dressingunni saman við.
5. Skellið baununum í sjóðandi vatn í 10 mín. og kælið síðan undir kaldri bunu í 1 mín. Setjið saman við kartöflurnar, túnfiskinn og tómatana.
6. Rífið ferska basilíku yfir og berið fram stax.

Með þessu er afskaplega gott að fá sér nýbakað og brakandi brauð og góðan rjómaost.

 

Tweet

Gulróta & appelsínumöffins

Þessa uppskrift gerði ég nú eiginlega fyrir tilviljun. Mig langaði að gera gulrótaköku, en síðan breyttist það í að gera möffins og að lokum endaði ég á að útbúa gulróta & appelsínumöffins.

Þessar múffur eru bragðgóðar og djúsí og appelsínubörkurinn og safinn lyfta þeim verulega. Þær eru hins vegar aðeins meira maus en hefðbundnari gulrótamöffins því maður aðskilur eggjahvítur frá eggjarauðum og stífþeytir hvíturnar, og ekki má gleyma að minnast á appelsínubörkinn sem maður raspar varlega niður. En ef maður getur gefið sér góðan tíma í baksturinn launar hann sig alltaf að lokum.

Þessi uppskrift er í tíu möffins,  svo það er um að gera að tvöfalda hana ef von er á mörgum gestum.

HVAÐ
Deigið:
2 egg, hvítur aðskildar frá rauðum
100 g smjör, við stofuhita
100 g púðursykur
1 (lífræn) appelsína, safinn + börkurinn
100 g hveiti
1 tsk lyftiduft
70 g valhnetur (+ auka fyrir skraut), saxaðar
1 tsk kanill
1/4 tsk þurrkað engifer
1/4 tsk múskat
160-170 g rifnar gulrætur

Kremið:
200 g rjómaostur, við herbergishita
60 g flórsykur
1 tsk vanilla
1/4 tsk salt

HVERNIG
1. Hitið ofninn upp í 180°C.
2. Raspið börkinn utan af allri appelsínunni og leggið til hliðar. Kreistið safann úr appelsínunni og setjið til hliðar.
3. Stífþeytið eggjahvíturnar í skál og setjið til hliðar.
4. Í stórri skál hrærið saman smjör og púðursykur þar til hræran verður létt og tekur á sig ljósari lit.
5. Bætið einni eggjarauðu út í blönduna í einu og hrærið vel saman við.
6. Bætið appelsínusafa og berki út í.
7. Hrærið hveiti og lyftidufti saman við.
8. Bætið hnetum, kryddi og gulrótum saman við.
9. Hrærið að lokum eggjahvítunum varlega saman við deigið með sleif.
10. Deilið deiginu út í möffinsform og fyllið tvo þriðju af hverju formi.
11. Inní ofn í 40-50 mín. Athugið að þegar múffurnar koma úr ofninum eru þær töluvert blautar í miðjunni en stífna við það að kólna.
12. Á meðan múffurnar bakast er ráð að útbúa rjómaostskremið. Hrærið öllu saman og geymið inní ísskáp.
13. Þegar múffurnar hafa fengið að kólna nægilega (45-90 mín) sprautið þá kreminu úr sprautupoka yfir hverja múffu fyrir sig. Skreytið með söxuðum valhnetum.

 

Tweet

Helgarpistillinn

Eplin hanga þung neðan úr trjánum þessa dagana. Við tókum hring um hverfið um helgina til að heilsa upp á eplatrén og sjá hvernig eplunum reiðir af í mildu haustinu. Eins og sjá má á myndinni að ofan eru eplin bústin og sæl og dafna vel í heiðríkjunni, rétt eins og við mannfólkið.

Í labbitúrnum gengum við framhjá einu eplatré sem stóð utarlegar á lóðinni, með eplum prýddar greinar slúttandi yfir girðinguna. Við litum laumulega í kringum okkur, hölluðum okkur svo yfir girðinguna og seildumst í eplið sem var okkur næst, bústnasta og stinnasta eplið á öllu trénu. Baldur stakk því inn á sig og síðan gengum við flautandi og lallandi með hendur í vösum frá trénu. Þegar við vorum komin í hvarf drógum við fram eplið og fengum okkur bita.

Hamingjan hjálpi mér! Þvílíkt epli!

Besta epli sem ég hef smakkað, hands down.

Í kvöldmatinn voru líka epli, jarðepli. Ég hafði útbúið franskt sumarsalat úr kartöflum og túnfiski og ofnbökuðum litlum tómötum sem var afskaplega gott.

Af öðrum afrekum helgarinnar má nefna að ég bakaði hjónabandssælu. Með jarðarberjasultu. Því svo virðist vera sem rabbarbarasulta sé ekki fáanlega í búðum í Noregi.

Oh well, hún var samt fantagóð.

Tweet

Mexíkóskt lasanja

Föstudagsuppskriftin þennan föstudaginn er algjört dúndur: Mexíkóskt lasanja!

Jömmjömmjömmjömm, jömmjömmjööööööm!

Þetta er að sjálfsögðu grænmetisútgáfa af þessum fína rétti, because that's just how I roll baby. Ég fann upp á því að útbúa svolítið sem ég kalla linsuhakk og er þessa dagana að setja út í allt: lasanja og lasagnette, spagetti bolognese, taco, mexíkóskar grýtur, ofan á pizzur...

Ég studdist við uppskrift Evu Layfeyjar þegar ég eldaði þetta fína lasanja, en - tada! - linsuhakksuppskriftin er úr minni smiðju.

Einn kosturinn við þessa uppskrift er að það má útbúa allt það helsta vel fram í tímann og geyma það í pottinum fram að þeim tíma sem maður þarf að stinga réttinum í ofninn. Þá á bara eftir að raða ofan í eldfasta mótið sem er alls ekki tímafrekt, og rétturinn verður bara betri við það að dúlla sér í pottinum í nokkra tíma. Svona uppskriftir elska ég!

HVAÐ
Linsuhakk:
300 g linsur, brúnar eða grænar (thekitchn er með upplýsingar um linsur)
1 lítill laukur eða hálfur venjulegur (svona 50 g), saxaður
2-3 hvítlauksgeirar, marðir
4 tsk þurrkuð papríka
2 tsk season all
1,5 bolli vatn
2 x Taco seasoning mix í pakka

Lasanja:
1 meðalstór rauðlaukur, smátt saxaður
1 rauð papríka, smátt söxuð
1 græn papríka, smátt söxuð
8-10 sveppir, niðurskornir (ég sker þá reyndar alltaf í fína teninga)
1/4 rautt chili, fræhreinsað og smátt saxað
1 dós niðursoðnir tómatar
350 g salsa (það má líka nota heimagerða sölsu)
1 dós maísbaunir
4 msk hreinn rjómaostur
2-3 msk kóríander, smátt saxað (ég nota oft þurrkað kóríander með góðum árangri)
Salt og pipar
6 litlar tortillur
Rifinn ostur
Nachosflögur, saltaðar

HVERNIG
Linsuhakkið:
1. Leggið linsur í bleyti í allt að 8 tíma. Ef þið hafið ekki svo mikinn tíma fyrir ykkur má alltaf leggja þær í bleyti í heitt vatn í 1-2 tíma.
2. Hellið af linsunum og skolið þær vel.
3. Steikið lauk og hvítlauk á pönnu í 5 mín.
4. Bætið við þurrkaðri papríku og season all, hrærið vel saman.
5. Bætið linsunum út í og hrærið vel við laukinn.
6. Hellið vatninu yfir. Hjá mér er það þannig að 1,5 bolli dugar vel til að það rétt fljóti yfir linsurnar, sem er einmitt það sem við viljum.
7. Leyfið suðunni að koma upp, lækkið svo í 3/6 og leyfið að malla í 20 mínútur undir loki.
8. Eftir 20 mínútur hrærið vel í hakkinu. Smakkið linsurnar til að athuga hvort þær séu ekki örugglega eldaðar (eiga að vera mjúkar undir tönn). Ef hakkið er þurrt þarf að bæta vatni útí fyrir næsta skref, en ef það er góður raki í hakkinu má bíða og sjá.
9. Bætið báðum pökkunum af Taco kryddinu og hrærið vel saman. Hér er bara að sjá hvort þurfi vatn eða ekki til að hjálpa kryddinu að ganga vel saman við hakkið. 1-2 dl gætu dugað.
10. Leyfið að standa á 2/6 í 10 mínútur.

Lasanjað:
1. Hitið ofninn upp í 180°C.
2. Á meðan hakkið eldast er hægt að byrja að lasanjasósunni. Í góðum potti steikið lauk, papríku, chili og sveppi í 5-10 mínútur.
3. Bætið útí tómötum, maísbaunum og sölsu og hrærið vel saman.
4. Bætið útí rjómaostinum og blandið honum vel saman við.
5. Bætið við kóríanderinu.
6. Bætið nú við öllu linsuhakkinu og hrærið vel saman.
7. Smakkið réttinn og saltið, piprið og bragðbætið að eigin smekk.
8. Nú hefst gamanið! Takið fram eldfast mót og raðið í lög: tortillur, linsuhakk, rifinn ostur.
9. Mér finnst gaman að skreyta með nokkrum flögum af þurrkuðu kóríander  yfir ostinn. Svo má stinga tortilla flögum niður með forminu til að lyfta réttinum upp.
10. Inní ofn í 25-30 mínútur.

Við borðum þetta fína lasanja alltaf með ferskum avókadó, sýrðum rjóma, góðri sölsu og nachos.

 

Tweet

Ostamöffins

Þessi uppskrift kemur úr bók Sollu Eiríks, Grænum kosti Hagkaupa.

Þessar múffur eru æði! Þær eru mjúkar, feitar og saltar, og það er svo auðvelt að henda í þær. Ekta haust- og vetrarverk að baka svona möffins.

Ég fékk 12 múffur út úr uppskriftinni, en kannski væri ráð að stefna heldur á 10 og fá hverja og eina til að rísa betur.

HVAÐ
125 g spelt
75 g maísmjöl
3 tsk vínsteinslyftiduft
0,5 tsk salt
150 g ferskur parmesanostur, rifinn
2 egg
50 ml ólívuolía
250 ml AB-mjólk

HVERNIG
1. Hitið ofninn í 200°C.
2. Blandið þurrefnum og rifnum osti saman í skál.
3. Þeytið eggin vel saman í annarri skál, þar til þau verða létt og freyðandi. Solla segir að leyndarmálið sé að þeyta eggin nægilega vel áður en við blöndum restinni út í.
4. Bætið olíu og AB-mjólk útí þurrefnaskálina og blandið varlega saman.
5. Bætið eggjahrærunni útí og blandið varlega saman.
6. Smyrjið möffinsform með olíu og deilið deiginu í 10 hólf.
7. Bakið múffurnar í 20 mín.

Þessar múffur eru æðislegar einar og sér, en síðan eru þær virkilega góðar með mat eins og súpu eða matmiklu salati. Mæli með þeim við þriggja bauna salat.

Tweet

Bókarabbið: septemberbækur

 

Hér kemur stutt samantekt á bókalestri mánaðarins. Bækur mánaðarins skiptust sem hér segir:

 

1 áhugaverð sögulega séð (The Sandcastle Girls)

1 leiðinleg (A Thousand Acres)

1 stórkostleg (Borða, biðja, elska)

2 tilgerðarlegar (Looking for Alaska & The Age of Miracles)

1 óþolandi (A Discovery of Witches)

2 virkilega góðar (The Graveyard Book & The Golem and the Djinni)

1 góð afþreying en óeftirminnileg (The Saturday Big Tent Wedding Party)

1 rokkandi milli góðrar og virkilega góðrar (Neverwhere)

1 góð en þreytandi á sama tíma (Kirkja hafsins)

 

= 11 bækur í september

Hér að neðan tek ég fyrir þrjár bestu bækur mánaðarins. 

 

The Graveyard Book (2008)

Eftir að hafa lesið The Ocean at the End of the Lane, og gefið henni slíka stjörnudóma, fór mín í Neil Gaiman gírinn. Ég greip í The Graveyard Book og að lesa hana var svolítið eins og að takast að halda áfram með góða drauminn sem mann var að dreyma þegar maður vaknaði.

 

Gaiman er snillingur.

 

Honum tekst að skapa svo áhugaverða heima með svo einföldum hætti. Töfrandi, ógnvekjandi, dreymandi, líðandi, fangandi... þetta eru fyrstu orðin sem koma upp í hugann þegar ég hugsa um stílinn hans Gaiman.

 

Það er kannski best að vera ekkert að reyna að ritrýna þessa bók. Farið bara og lesið hana. Ég lofa að tímanum er vel varið.

 

The Golem and the Djinni (2013)

Ég hlustaði á nokkur viðtöl við Helene Wecker, höfund þessarar bókar, eftir að ég lauk lestri bókarinnar. Þar sagðist hún hafa unnið að þessari bók í einhver sjö ár, og undir lokin var hún farin að raða saman púslunum með flísatöng. Hún vandaði sig mjög við alla fínpússun og það borgaði sig. Sagan stígur fullsköpuð fram á sjónarsviðið og hrífur mann með sér frá fyrstu blaðsíðu. Ég hafði nokkrar væntingar til sögunnar áður en ég hóf lesturinn og varð ekki fyrir vonbrigðum.

 

Hér fáum við að kynnast dulmögnuðum verum úr ólíkum heimshornum: Annars vegar er það leirkonan Golem, sem búin er til af útskúfuðum rabbí í gyðingasamfélagi Póllands, og hins vegar er það Djinni, andinn sem vanur er að blása frjáls um eyðimerkur Sýrlands en uppgötvar í upphafi sögunnar að hann hefur verið lokkaður og hlekkjaður við flösku.

 

Spennandi? Jáhá!

 

Svo nú vitið þið af hverju ég fór spennt af stað. Og góðu fréttirnar eru þær að ég kom út hinu megin með bros á vör. Virkilega vel skrifuð, rannsökuð, útfærð og stílfærð. Persónunum tókst að vekja áhuga minn, samúð og hrifningu. Sögusviðið (New York, Sýrland, Pólland) hreif mig, en hrifnust var ég, eins og vanalega, af sögutímanum. Sögutíminn hér er ansi breiður, ef svo má að orði komast, því við fylgjum sumum persónum aftur til að því er virðist tíma Biblíunnar, en helsta áherslan er á árið 1899 þegar sagan hefst.

 

Allt verður betra þegar það er sett í sögulegan búning. Sögulegur búningur er svolítið eins og smjör að því leytinu til...

 

Eníveis, ég mæli sko alveg með þessari! 

 

Borða, biðja, elska (2006)

Hér er á ferðinni bók sem er ansi umtöluð, enda metsölubók í meira lagi. Eða hvað kallar maður bók sem hefur selst í tíu milljónum eintaka um heim allan og sat samfleytt í þrjú og hálft ár á metsölulista The New York Times? Mememememetsölubók? Eða langalangalangalangametsölubók? Ég veit það ekki. Megabók kannski.

 

Það finnst mér allavega, algjör dúndurmega bók. Ég las þessa bók fyrst veturinn 2010 þegar ég fékk hana að láni á safninu. Í þetta sinn gat ég lesið mitt eigið eintak sem ég var svo heppin að kaupa á útsölu í Eymundsson áður en við héldum utan. Þannig hefur það æxlast að ég hef í bæði skiptin lesið hana á íslensku, sem er frekar óvenjulegt fyrir mig þar sem ég kýs að lesa enskar bækur á ensku. Íslenska þýðingin er hins vegar ansi fín í flesta staði, sem betur fer.

 

En það sem er kannski markverðast við þennan lestur er að ég las alla bókina upphátt fyrir Balduro mio.

 

Ok, lítum aðeins nánar á þetta. Ég var búin að lesa bókina, keypti hana svo og las aftur, og í þetta sinn upphátt fyrir manninn minn svo hann fengi ábyggilega notið sögunnar. Haldiði að ég sé hrifin?

 

JÁ!

 

Ég er big time Elizabeth Gilbert aðdáandi. Ég fylgist með henni á facebook. Ég er áskrifandi að fréttabréfunum hennar. Ég las Committed sem er sjálfstætt, óbeint framhald af Eat, Pray, Love. Ég elska TED fyrirlesturinn hennar. Ég býð spennt eftir nýju skáldsögunni hennar sem kemur út Á MORGUN!

 

En hvað með Borða, biðja, elska? Hvað hrífur mig svona við þessa sögu?

 

Það er fyrst og fremst Elizabeth sjálf. Hún er mögnuð manneskja. Hún berskjaldar sig, talar ófeimin um leit sína að Guði og tilgangi, hún er íhugul, pælandi, fyndin, hnyttin, bráðgreind, vel lesin, rosalega fær penni og síðast en ekki síst er hún hispurslaus. Hún talar um mál sem skipta máli en gerir það á þann veg að maður situr við borð og hlustar á innihaldsríkt samtal.

 

Svo er náttúrulega ekki hægt að segja nei við ókeypis ferðalagi til Ítalíu, Indlands og Indónesíu.

 

Lesið bókina gott fólk.

 

Jæja, þetta var í styttri kantinum þennan mánuðinn en ég kveð ykkur með þessum vísdómsorðum:

Enginn fitnar af fögrum orðum (hjúkket).
 

Tweet

Kaffimöffins

Í glósubókinni sem ég tók með mér til Bordeaux veturinn 2000 kallast þessar möffins 'jógúrtkökur', en kaffimöffins er meira sexý svo þær heita það hér með.

Þessar möffins tengi ég við æskuárin í Selásnum því mamma bakaði þær ansi oft þar. Ég man að ég stóð oft fyrir framan ofninn og horfði á þær bakast og gat varla beðið eftir að þær kæmu út úr ofninum. Svo varð maður að bíða í smá stund og leyfa þeim að kólna, en maður beið aldrei of lengi og loksins beit maður í heita og mjúka kökuna og fékk bráðið súkkulaði á varirnar.

Ah, hvernig væru æskuminningarnar ef engar hefðu verið kökurnar?

Þetta voru fyrstu möffins sem ég bakaði og ég hef því bakað þær ansi oft í gegnum tíðina. Í fyrstu bakaði ég þær bara í pappírsformunum, sett alltaf of mikið deig í hvert form og uppskar lágréttar möffins! Nú hefur mér lærst að setja pappírsformin í 3x4 álformið mitt, og þá koma þær allar gullfallegar og fagurskapaðar úr ofninum. Lóðréttar en ekki lágréttar!

Ef fyrir þér er komið eins og mér, þ.e.a.s. þú ert stödd/staddur ýmist í Frakklandi eða Noregi (hef bakað þessar möffins í báðum löndum) og finnur ekki kaffijógúrt, þá er einfalt að búa hana til sjálfur með því að sæta hreina jógúrt (180 g) og bæta útí instant kaffi. Það gerði ég við þessar og kaffijógúrtin mín var alveg á par við þá sem maður kaupir heima frá MS.

Uppskriftin dugar í svona 30 möffins.

Þetta er ferlega einfalt, hefjumst handa.

HVAÐ
3 egg
2 bollar sykur
220 g smjör, við stofuhita
1 dós kaffijógúrt
1 tsk vanilludropar
2,5 bolli hveiti
0,5 tsk matarsódi
150 g suðusúkkulaði, saxað

HVERNIG
1. Hitið ofninn í 175°C.
2. Þeytið saman egg og sykur.
3. Bætið við smjöri, jógúrt og vanilludropum og hrærið vel saman.
4. Sigtið þurrefnin útí og hrærið saman (NB! ekki of vel því nú er matarsódinn kominn útí).
5. Bætið að lokum súkkulaðinu út í og blandið varlega saman við deigið með sleif.
6. Notið skeið til að deila deiginu út í bréfform. Fyllið 2/3 af hverju formi.
7. Inní ofn í 20-25 mín.

Þessar eru alveg æðislegar með ískaldri mjólk. Mmm...

 

Tweet