Birnirnir þrír

Í gær bökuðum við Ásdís þrjár speltpizzur. Ein var lítil, önnur miðlungs og sú þriðja risastór, hljómar svolítið eins og birnirnir þrír væru væntanlegir í mat.

Pizzan fyrir litla húninn var með pestói, kartöflum, rifnum mozzarella og pikkluðum hvítlauk úr papriku og chili legi, tímían var notað sem aðalkrydd á hana.

Bangsamömmupizzan var með pizzasósu (ala Solla), pestói, ferskum mozzarella, brokkólíi, rauðlauk, papriku og svona alls konar dóti.

Pizzan hans bangsapabba var langstærst en á hana settum við pizzasósu (ala Solla), rauðlauk, brokkólí og rifinn mozzarella. Það skal tekið fram að við náðum engan veginn að klára þessar dýrindispizzur þar sem birnirnir komu ekki og munum við reyna að ljúka verkinu í dag.

Í dag tókum við í notkun nýja gsm síma af gerðinni nokia 3200. Þetta virðast vera kostagripir og það er rosalega gaman að fikta í þeim :)

Tweet

Kostir og gallar

Nú er ég búinn í sumarprófum, jei! Aðalkosturinn við það að vera búinn er tvímælalaust að vera búinn. Aðalgallinn er hins vegar sá að það er mjög sterk vísbending um að sumarið sé að verða búið.

En að öllu vangaveltugamni slepptu ætla ég í tilefni dagsins að fara til hennar Sollu og fá mér hnetusteik.

Tweet

Maður með fortíð

Ég vona bara að það komi ekki í hausinn á mér seinna að hafa verið meðlimur í taflfélagi Reykjavíkur, gúlp... Kannski hafa Interpol þegar komist á snoðir um tengsl mín og þátttöku á einu stærsta skákmóti landsins.

Vonandi verður þó tekið tillit til þess að ég var nú aldrei neinn snillingur í skák.

Tweet

Þetta lið!

Þetta er skrítinn heimur sem við búum í. Menn komast upp með ótrúlegustu hluti en liðið í bússaralandi dregur mörkin við alþjóðleg skákmót og hryðjuverk. Ég hef ekki fylgst með þessu máli en mér finnst það bara hljóma svo asnalega að sitja í gæsluvarðhaldi fyrir að taka þátt í alþjóðlegu skákmóti fyrir 12 árum. Hvað gerist eiginlega á þessum mótum? Eru það kannski skákmenn sem skipulögðu hinn fræga fund garðyrkjubænda í Öskjuhlíð?

Tweet

Heldur farið að fækka

Já nú er ættingjum mínum heldur farið að fækka hér á landi. Fyrst sneru Pési, Erna og Dagur með morgunflugi á þriðjudaginn til síns heima. Í hádegi sama dag yfirgáfu froskarnir okkur og í dag fara mamma og pabbi. Wellwell, ætli maður verði ekki bara að heimsækja eitthvað af þessu liði sjálfur úr því að það endist ekki lengur en raun ber vitni á hinum sólríka klaka.

Tweet

Veisla verður að partýi

Í gær hélt Pétur afi upp á afmælið sitt, reyndar mingluðum við mamma okkur inn í dæmið svo hægt væri að kalla þetta 150 ára afmæli. Þegar veislan var komin vel af stað, fólk farið að borða og svoleiðis skaut upp kollinum umræða um muninn á veislu og partýi. Þar sem ég veit allt um svo marga hluti varð ég að skilgreina muninn einhvern veginn.

Skilgreiningin var eitthvað um að í partýi væri dansað upp á borðum en samkvæmt þeirri skilgreiningu eru mjög fá partý haldin. Í þessum gleðskap dansaði enginn upp á borði en þó breyttist hin frábæra veisla í þrusupartý. Það bara gerðist einhvern veginn, allt í einu voru allir í partýstuði og komin allt önnur stemning á svæðið. Reglan er því sú að þegar fólk er statt á réttum stað og er í partýstuði þá er partý og besservisserskilgreiningin mín sökkar. Það er nú ekki flóknara.

Það sem gerði þessa veislu svo sérdeilis vel heppnaða var hve mikið af skemmtilegu fólki, sem hittist allt of sjaldan, var samankomið. Eftir partýið setti stór hluti gestanna stefnuna á Thorvaldsen bar og djammaði þar fram á rauða nótt. Við Ásdís splittuðum að vísu aðeins fyrr enda reynir maður að vera skynsamur í samræmi við háan aldur.

Tweet

Bera menn enga virðingu fyrir köttum?

Já nú er það komið í hart. Það er ekki nóg með að mannfólkið lítilsvirði blessuð dýrin með slæmri meðferð og líkamlegu ofbeldi. Það er augljóst að nú hafa mennirnir áttað sig á því að hægt er að niðurlægja eitt og eitt dýr í einu og birta myndir af því um allar trissur. Skyldi þessi köttur vera sonur foreldra Davíðs Oddsonar en hvorki bróðir hans né systir?

Tekið skal fram að þessi færsla er skrifuð undir sterkum áhrifum sjóðstreyma og ársreikningagerðar íslenskra fyrirtækja og eru lesendur varaðir við framandi skopskyni af þeim sökum.

Tweet

Paranoid lestrarhestur

Í dag sannaðist endanlega reglan um hið alræmda próflestrarveður. Það hafa verið uppi getgátur meðal fræðimanna að manni fyndist veðrið bara vera gott þegar maður þyrfti að vera inni og lesa. En kommon! Hitamet og það tvo daga í röð... Próflestrarveðrið er alþjóðlegt samsæri til þess að halda niðri menntastigi heimsins og hvetja fólk til þess að deyfa hugsun sína með bjór og hakkísakk. Hvers vegna er það einmitt á svona dögum sem maður man eftir orðum Oscars Wilde um freistingar?

Nóg af bölsýni. Ég náði að læra heilan helling þrátt fyrir stöðugt áreiti alþjóðlegra hryðjuverkasamtaka og ég náði líka að fara út í sólina, lesa bók og gefa öndunum og gæsunum brauð. Ég er þrælsáttur.

Tweet

Vinnan búin og þá byrjar aðalvinnan

Já nú er unglingavinnan búin í bili. Eins og fyrirsögnin gefur til kynna þá þýðir það ekki að ég tjilli það sem eftir lifir ágústmánaðar, seiseinei. Núna fyrst get ég sinnt mínu aðalstarfi, náminu, af fullum krafti enda tvö sumarpróf í vændum. Ég passaði mig á því þegar ég skráði mig í próf að hafa þau eins fjölbreytt og unnt væri, reikningshald 1 og reikningshald 2. Víííí!

Eftir lærdóm dagsins fór ég í sund með mömmu, pabba og Degi frænda mínum frá Barcelona. Fyrir sundið stöldruðum aðeins hérna heima og drukkum chilieplaappelsínugreipgulrótasítrónuengifersafa. Við kíktum líka á þetta.

Ég hlusta mikið á náunga sem heitir Neil Young. Ér rakst á heimsíðuna hans hérna áðan og finnst hún barasta skrambi flott. Veljið bara linkinn framan á stuðaranum og þá streyma ljúfir tónar í stofuna. Ef einhver lesandi þekkir tónlistarmanninn ekki þá mæli ég eindregið með því að viðkomandi tékki á kauða, hann er of góður til að ignora.

Tweet

Innipúkinn

Þessa verslunarmannahelgi líkt og flestar aðrar verslunarmannahelgar kaus ég að vera heima hjá mér. Ég gældi lítillega við þá hugmynd að kíkja eitthvað út úr húsi í gærkveldi en sá þann kost vænstan að kúra inni. Ég fór reyndar aðeins út að deginum, út í bíl og inní annað hús til að læra reikningshald með Kristjönu. Ég er nefnilega innipúki um verslunarmannahelgar. Þessa helgi nýti ég mér viðhorf sem ég lærði af norsku ofurhetjunni Elling. Hvers vegna að fara út þegar maður er kominn með svona fína íbúð? Til allrar hamingju bind ég mig ekki við þetta viðhorf aðra daga ársins.

Tweet

Vegna fjölda áskorana

Síðan ég bloggaði síðast ég búinn að bauka ýmislegt, ganga/klífa Vífilsfellið, vinna úti í sólinni með frábærum unglingum, lyfta, synda og bara allt nema hanga inni og pikka á bloggið. Undirbúningurinn fyrir sumarprófin er búinn að vera í góðum farvegi þokkalega jafnt og mest þétt og þannig mun það verða næstu vikurnar.

Tweet

Jájájájájá...

Fórum í sumarbústað yfir helgina og höfðum það notalegt. Það er ágætt að fara svona annað slagið í sveitasæluna og tjilla. Ekki var samt hægt að staldra of lengi því yfirvofandi var jú úrslitaleikur EM í fótbolta. Ég er himinlifandi yfir úrslitunum og óska Grikkjum hjartanlega til hamingju ef þeir þá lesa bloggið mitt.

Tweet

Áfram Grikkland!

Leikurinn í dag var einn af þessum erfiðu leikjum þar sem þarf að ákveða með hverjum skal halda. Ég ákvað að styðja Grikki. Það varð snemma ljóst að sóknarmenn Tékka áttu ekki séns í varnarmenn Grikkja, reyndar var tékkneska vörnin ekki slæm heldur.

Leikurinn var mjög skemmtilegur og sem endranær komu Grikkir öllum á óvart og sigruðu með flottu marki á lokasekúndunum. Í raun má segja að bæði liðin hafi staðið sig frábærlega og áttu Tékkarnir jafnmikið skilið að vinna en það er ekki spurt að því núna, leikurinn er búinn og Grikkir unnu.

Tweet

Flott hjá Portúgölum

Í gær horfðum við á seinni hálfleik í leik Hollands og Portúgal. Æsispennandi og skemmtilegur leikur.

Eftir leikinn var ég nú eitthvað tjúnaðri heldur en fyrir hann svo ég brá á það ráð að hlaupa aðeins. Sem ég er að byrja þá finnst mér nú fremur einmanalegt svo ég ríf systur mína út með mér og tókum við á rás meðfram sjónum og stefndum í humátt (sem að þessu sinni var í austur). Bæði var sprett og skokkað auk þess sem við systkinin skelltum okkur í armbeygjur og magabeygjur. Það þarf vart að orðlengja þetta frekar, ég svaf vel í nótt.

Mig rekur minni til að hafa lofað einum af hinum dyggu lesendum link á þau orð sem Platini lét falla um franska landsliðið á dögunum. Ég er hræddur um að ég verði bara að taka undir með honum.

Tweet

Nú liggja Danir í því!

Horfði á leikinn í gær. Ekkert smá taugastrekkjandi, ég hélt með Dönum. Ég verð þó að játa að Tékkarnir áttu þennan sigur innilega skilinn. Þeir eru með langskemmtilegasta liðið af þeim sem eftir eru svo nú held ég með þeim.

Tweet

Mikið fjör

Undanfarna daga hef ég þurft að nota nefúðann minn fremur mikið vegna einhvers konar heykvefs. Þetta úðadót gerir nefið viðkvæmt. Þegar ég kom heim úr vinnunni hinn kátasti tók nefið á mér upp á því að sturta niður úr sér ágætis slurk af ryðguðu vatni. Ég tók því nú bara með ró og tróð öllu tiltæku í nösina og lagðist sallarólegur á gólfið.

Þegar það versta var afstaðið fór ég, hinn upplýsti háskólaborgari, að leita mér upplýsinga og fann ýmislegt sniðugt á doktor.is. Textahöfundur gerir greinilega ekki ráð fyrir að fólk á mínum aldri lendi oft í þessu. Ég er nú ekkert að stökkva upp á nef mér út af því, oseiseinei.

Tweet

Þjóðhátíð, fyrsti hluti

Jæja, nú erum við búin með hluta af þessari þéttu dagskrá okkar. Fórum í kirkjugarðinn og marseruðum þaðan í skrúðgöngu niður á Austurvöll þar sem haldnar voru ágætar ræður, lúðrar þeyttir og þjóðsöngurinn sunginn. Gaman, gaman! Hittum líka slangur af skemmtilegu fólki :) Skipti, út og yfir...

Tweet

Gleðilega þjóðhátíð!

Veðrið er vægasta sagt geeeegggjjaaað núna, heiðskír himin og sólskin. Ég man ekki eftir öðrum eins 17. júní. Nú er bara að vona að það endist eitthvað út daginn. Þessi 17. júní skal nefnilega vera tekinn með trompi.

Ég er búin að strauja tvær skyrtur, buxur og sumarkápuna mína og nú er bara að ákveða í hverju ég ætla að vera. Nú má ég ekki vera að þessu því við þurfum að fara að leggja af stað eftir tæpa klukkustund og Baldur liggur enn upp í rúmi, hann sagði við mig: Ég ætla að liggja aðeins lengur, ég er að hugsa! Góður þessi.

Til hamingju með daginn Íslendingar!

Tweet

Hátíðarhöldin skipulögð

Á heimasíðu Reykjavíkurborgar er að finna dagskrá hátíðarhaldanna þann 17. júní. Það sem mér finnst einstaklega skemmtilegt við uppsetningu dagskránnar að þessu sinni er að maður getur hakað í þá viðburði sem maður hefur áhuga á og þannig útbúið sína eigin dagskrá sem maður síðan prentar út eða fær senda í tölvupósti. Þetta erum við Baldur að plana að gera:

Dagskrá 17. júní

Samhljómur kirkjuklukkna í Reykjavík
09:55

Í kirkjugarðinum við Suðurgötu
10:00
Forseti borgarstjórnar, Árni Þór Sigurðsson, leggur blómsveig frá
Reykvíkingum á leiði Jóns Sigurðssonar Lúðrasveitin Svanur leikur: Sjá
roðann á hnjúkunum háu Stjórnandi: Rúnar Óskarsson Skátar standa
heiðursvörð

Hátíðardagskrá við Austurvöll
10:40
Hátíðin sett: Anna Kristinsdóttir, formaður Þjóðhátíðarnefndar, flytur
ávarp Karlakórinn Fóstbræður syngur: Yfir voru ættarlandi. Stjórnandi:
Jónas Ingimundarson Forseti Íslands, Ólafur Ragnar Grímsson, leggur
blómsveig frá íslensku þjóðinni að minnisvarða Jóns Sigurðssonar á
Austurvelli Karlakórinn Fóstbræður syngur þjóðsönginn Ávarp
forsætisráðherra, Davíðs Oddssonar Karlakórinn Fóstbræður syngur: Ísland
ögrum skorið Ávarp fjallkonunnar Lúðrasveitin Svanur leikur: Ég vil
elska mitt land Kynnir er Adólf Ingi Erlingsson og Ríkisútvarpið sendir
dagskrána út í útvarpi og sjónvarpi

Skrúðganga frá Hlemmi að Ingólfstorgi
13:40
Skrúðganga frá Hlemmi niður Laugaveg að Þingpalli. Lúðrasveit
verkalýðsins og Jarren Hornmusik leika og Götuleikhús Hins Hússins og
Félag blómaskreyta taka þátt í skrúðgöngunni

Danssýning á Þingpalli
14:00
(Svið á plani vestan Alþingishúss og norðan Ráðhúss) Ýmsir danshópar og
dansskólar sýna dans: Klassíski listdansskólinn Dansstúdíó Sólveigar
Dansíþróttafélagið Gulltoppur ÍR Dansdeild Jazzballlettskóli Báru
Magadansfélag Íslands Adrenalín gegn rasisma 5th Element
Magadansdísirnar Kynnir er Bogomil Font

Kraftakeppni á Miðbakka
14:00
Trukkadráttur í keppninni Sterkasti maður Íslands. Gerð verður tilraun
til að setja heimsmet í trukkadrætti, 56 tonn

Glíma á Þingpalli
16:00
(Svið á plani vestan Alþingishúss og norðan Ráðhúss) Lýðveldis- og
heimastjórnarmót Glímuráðs Reykjavíkur

Tónleikar á Arnarhóli
20:00
Mammút Á móti sól Írafár Hljómar Kalli Bjarni Bang Gang Love Gúrú Bubbi
Mothens Ensími

Gaman, gaman bráðum kemur 17. júní!

E.s. Til hamingju með afmælið María G. :)

Tweet

Erindi og ný aðstaða

Ég hélt erindi í gær á málstofu sem var á vegum Rannsóknarstofu í kvenna- og kynjafræðum (RIKK). Málstofan kallaðist Local Communities - Global Relations: Gender Theory.

Erindið hélt ég fyrir hönd Unnar Dísar sem var fjarverandi og kallaðist það Immigrants' Experiences in Iceland, unnið upp úr rannsókn Unnar. Málstofuna sátu ungar konur frá Eistrasaltslöndunum og því varð erindið að vera á ensku. Ég verð að viðurkenna að ég var ansi stressuð yfir því. Þetta gekk þó allt ljómandi vel en mikið var ég fegin þegar því var lokið.

Í dag er ég síðan að fara að kaupa afmælisgjöf og ná í spennandi pakka á pósthúsið. Ég fæ einnig afhent aðgangsorð í aðstöðu MA nema í Odda en um daginn var mér loksins úthlutað borði þar, kem til með að sitja í aðstöðu nr. 20. Sem sagt margt að gerast.

Tweet