Á milli lífs og dauða

Í dag var fyrsti dagurinn minn á nýjum stað í vinnunni. Ekki sá ég nú kanínuunga en þarna er friðsælt og gott að vera enda staðsetningin góð. Það má eiginlega segja að maður sé staddur milli lífs og dauða bróðurpart dagsins.

Tweet

Útskriftarpartý í dönskum stíl

Í gær útskrifaðist Stella Soffía systir mín og er hún nú orðin bókmenntafræðingur. Í korti til hennar skrifaði ég: Kæri bókmenntafræðingur til hamingju með að vera Stella Soffía.

Í tilefni af þessu bauð pabbi henni og okkur á Jómfrúna og snæddum við þar dýrindismat. Ekki slæm upphitun að fara á danska smurbrauðsstofu svona mánuði fyrir brottför okkar til Danaveldis.

Tweet

Er ég drekinn?

Í gær urðu miklar sviptingar á vinnustað mínum. Mér var reyndar aldrei sagt að ég væri drekinn en hópurinn sem ég stjórnaði var leystur upp og ég settur sem leiðbeinandi í Öskjuhlíðinni. Þessu fylgja vissulega kostir, gallar, tregi og tilhlökkun en hvernig sem allt fer þá tel ég að kanínuungar komi í staðinn fyrir andarungana semsagt hvorki betra né verra, bara öðruvísi.

Tweet

17. júní

Í morgun gengum við frá Hólavallakirkjugarði niður á Austurvöll og fylgdumst með setningu hátíðarhalda dagsins með tilheyrandi ræðum og tónlistaratriðum. Þegar það allt var búið hittum við ansi skemmtilegan mann frá Isle of Man. Hann hafði meðferðis þjóðfána Manxverja og fræddi okkur heilmikið um land og þjóð. Síðan var gengið um hátíðarsvæðið í allan dag, sólin sleikt og svo legið á Arnarhóli undir dillandi tónlist fram á kvöld.

Tweet

Rusl og illgresi í miðborginni

Á fimmtudaginn hætti ég á lagernum, mætti á síðustu námskeiðin hjá Vinnuskólanum og byrjaði að vinna úti á föstudaginn. Ég vinn í Kvosinni sem er svæðið í kringum Tjörnina. Það mættu nú bara fjórir til mín á fyrsta degi en ég á von á fleirum á mánudag. Það er mjög gaman að vera þarna niðri við Tjörnina innan um sætu andarungana auk þess sem maður rekst á fullt af skemmtilegu fólki.

Tweet

Kvöld í Hveró

Í gærkvöldi drifum við okkur á tónleika í Hveragerðiskirkju hjá ekki ómerkari hljómsveit heldur en sjálfum Hjálmum. Ég hef hlustað þónokkuð á diskinn sem Hjálmar gáfu út á dögunum en að vera svona á staðnum og upplifa grúvið er alveg rosalega gaman, auk þess sem þéttleiki hljómsveitarinnar skilar sér rosalega vel live. Þeir spiluðu lög af plötunni, ný lög auk þess sem þeir tóku sögu úr sveitinni eftir meistara Megas. Það kom ótrúlega vel út að bæta öflugum reggíryþma við verk meistarans. Upphitari á tónleikunum var Helgi Valur Ásgeirsson trúbador og var hann fantagóður og ég spái því að þjóðin eigi eftir að heyra meira í honum. Það fylgdi sögunni að móðir hans hefði farið á Dylan-tónleika á meðgöngunni og er ég ekki frá því að það hafi verið heillaráð.

Tweet

Líf og fjör

Í gær byrjaði ég að vinna hjá Þjónustumiðstöð Vinnuskóla Reykjavíkur, öðru nafni lagernum. Ég hef fengist við ýmislegt á þessum stutta tíma eins og að mála og setja saman hjólbörur, raða í verkfærakistur og svona altmúlígt. Gott að vera svona mikið úti.

Tweet

Hörkutól

Síðustu daga hef ég verið að stússast svona ýmislegt út af Danmerkurreisunni og að sjálfsögðu að lyfta. Á sunnudaginn fórum við Ásdís í sund og Grasið í Hveragerði ásamt Stellu Soffíu og Pétri afa. Þótt ótrúlegt megi virðast þá hefur mér gengið mjög vel að aðlagast hinum erfiðu aðstæðum að vera ekki í prófum. Það var stór biti að kyngja að sætta sig við að prófin væru búin en ég þrauka þetta einn dag í einu.

Tweet

All out of luck

Forkeppni Eurovision var haldin í gær og horfðum við á hana heima hjá mömmu hennar Ásdísar. Ég þarf nú varla að kynna úrslitin en Íslendingum virðist svíða það sárt að komast ekki áfram og hafa verið á lofti alls konar misheimskulegar samsæriskenningar. Ég held að málið sé einfalt, aðeins fjórum sinnum (að mig minnir) hafa Íslendingar verið í fyrstu tíu sætunum og þá var Eurovision mun minni keppni og lagið sem við sendum núna var bara ekki eins gott og hin lögin. Kannski Ísland hafi verið all out of luck í þetta sinn og kannski þarf meira til en heppni. Mér finnst leitt að fylgjast með samsærislágmenningarumræðunni og mæli með því að fólk hætti henni strax því annars verður þjóðin þekkt fyrir sterkustu karlmennina, fallegustu konurnar og leiðinlegustu væluskjóðurnar!

Tweet

Grill

Í dag kom pabbi heim frá Frakklandi og í tilefni af því héldum ég, Ásdís og Stella smá grillteiti með honum. Það var mikil stemning og spjallað um margt. Ég held þó að það sé komið þögult samkomulag meðal viðstaddra að láta mig ekki sjá um grillvökvann aftur þar sem ég er svo sérstaklega örlátur að eðlisfari (hehe). Ég held að ég sé bara líka með í þessu samkomulagi, ekki láta mig sjá um grillvökvann aftur og heyriði það.

Tweet

Prófalok

Í gær tók ég síðasta próf annarinnar og er því kominn í sumarfrí. Eftir prófið fór ég og fagnaði gullbrúðkaupi Kalla afa og Ólafar ömmu ásamt góðum hópi fólks á BSÍ. Þar hitti ég systur mína í fyrsta sinn síðan hún kom til landsins sem var mjög gaman. Í framhaldi af brúðkaupsafmælinu fórum við Stella heim og sóttum Ásdísi og var farið í sund, út að borða og í bíó á myndina Diarios de motocicleta.

Tweet

Eurovision rokkar!

Já ég ætla sko að horfa á söngvakeppni Evrópskra sjónvarpsstöðva. Ég geri mér fyllilega ljóst að þessi játning kann að koma flatt upp á landann en þannig er mál með vexti að fulltrúar Noregs eru með slíkt gæðaglysrokkslag að ekki verður hjá því komist að horfa á þann sögulega viðburð þegar rokklag vinnur keppnina. Lagið er svo töff glys að Bon Jovi þarf að fara í felur þar sem hljómsveitin sameinar hæfileika hans í mátulegum skammti af AC/DC ásamt klæðskiptingsfílíng Kiss (þó ívið hóflegri). Já þetta er sko alvöru glys og ekkert múður! Ég hvet því alla glysrokkhneigða menn með snefil af sjálfsvirðingu að greiða Noregi atkvæði sitt og auka þannig menningargildi keppninnar. Vissulega var Húbbahúlle-lagið gott á sínum tíma en Wig Wam er málið í ár.

Tweet

Afmælisdagur

Í dag á annar af eigendum heimasíðunnar hjólkoppar, nánar tiltekið Kalli afi, afmæli og óska ég honum alls hins besta í tilefni af því. Dagurinn í dag er líka silfurbrúðkaupsafmælisdagur (náði bara ekki að búa til lengra orð úr þessu án þess að bulla) mömmu og pabba og fá þau líka opinberar hamingjuóskir hér með. Einhverjir velta því fyrir sér hvort þau hafi þá verið 5 ára þegar þau giftust. Sú tilgáta er röng, þau voru bæði orðin 7 ára.

Ég var í prófi í morgun og skýrir það nú kannski efnislega uppbyggingu bloggsins. Eftir prófið fór ég í hádegismat með pabba hjá manni nokkurum sem lifandi er, þar sem við fengu þetta fína baunadal.

Tweet

Í sólkskinsskapi

Ég held mér gangi vel að vera 26 ára. Undanfarna daga hef ég eytt miklum tíma í kennslubækur í ýmsum viðskiptagreinum og sé fram á að halda því áfram. Það vill svo skemmtilega til að ég hef mjög gaman af slíkum bókum þ.a. næstu tvær vikur ættu að vera ansi skemmtilegar. Þið sem hafið msn-ið mitt megið búast við að það verði stillt á busy á þeim tíma.

Tweet

Amli

Í fréttum er þetta helst: Í gær var ég 25 ára, í dag er ég ekki 25 ára, í dag er ég 26 ára. Vá, en gaman! Allar fyrirsagnirnar á þessum virta fréttavef fjalla um mig og einmitt á afmælisdaginn minn! Ætli þetta sé tilviljun? Ég kýs að trúa að svo sé ekki.

Tweet

Bíó

Tvo síðustu daga hef ég endað með því að fara á kvikmyndahátíðina. Í fyrrakvöld bauð Ásdís mér á Beautiful Boxer og í gærkvöldi bauð pabbi mér á Darkness. Myndirnar eru báðar mjög góðar en eiga ekki aðra hluti sameiginlega. Ég mæli með þeim báðum.

Tweet

Gleðilegt sumar allir saman!

Já nú þýðir ekkert annað en að taka fram sandalana og strandmottuna, eða ekki :Þ Að minnsta kosti þýðir ekkert að vera á þessum fábjánalegu nagladekkjum út um allt, burt með þau. Það er kominn tími fyrir sumarskap og hreint loft.

Tweet

Verkefnaskilum lokið

Í gær skilaði ég síðasta verkefni annarinnar inn og hélt fyrirlestur um það. Þvílíkt gott að vera laus við alla verkefnavinnu auk þess sem kennslan er líka búin. Ahhhh, þá byrjar bara hinn ljúfi próflestur.

Tweet

Fann mynd af fágætum flóðhesti :)

Tweet

Gleðifréttir

Í dag barst mér bréf frá Viðskiptaháskólanum í Kaupmannahöfn sem sagði að ég gæti stundað nám þar námsárið 2005-2006. Jibbíííí! Þá er bara að vona að maður fái svipað bréf varðandi íbúðamálin fljótlega strax í gær (hehe).

Tweet