Umræðutími

Var að koma úr umræðutíma í stjórnun. Gekk geðveikt vel, enda heitir hópurinn okkar Besti hópurinn, rís meira að segja undir nafni (hehe). Það var einmitt frekar fyndið um daginn þegar kennarinn, Vilborg, var að lesa upp hópana. Hvar er besti hópurinn? Ég sá að alla langaði að svara en við vorum besti hópurinn og vorum þau einu sem þorðu að hlýða því kalli.

Tweet

Vantar einhvern ísskáp?

Nú erum við búin að taka upp úr aðalkössunum, búin að flytja lögheimilið, búin að kaupa þau húsgögn sem vantaði mest. Eldhúsborðið, stólana og hillurnar fengum við í Ikea. Við settum líka upp Lundia eininguna okkar en þurftum að kaupa svona krossasystem til að hún geti staðið sjálf, það má nefnilega ekki skrúfa neitt í veggina í þessari ágætu íbúð.

Ég sit nú í vinnunni en Ásdís stendur í eftirmálum flutninga.

Ef einhvern vantar fínan ísskáp þá ætti sá hinn sami að hafa samband við mig eða Ásdísi.

Tweet

Flutt! (story of my life)

Fengum íbúðina afhenta degi fyrir tímann svo gærdagurinn, sem átti að fara í að pakka, fór í það að flytja allt saman yfir á nýja staðinn. Við fengum frábæra hjálp frá góðum ættingjum. Pétur afi ferjaði allt matarbúrið okkar, mamma þreif ísskáp og raðaði í skápa og pabbi og Andri komu á stóra trukknum frá JB og þeir ásamt Balduro mio mössuðu rúminu, sófanum, kommóðunni og öllum þessu stóru hlutum úr Hrauntungunni yfir á Eggertsgötuna. Við fylltum heilan sendibíl af dótinu okkar og þá blöskraði mér alveg, hvernig er hægt að eiga svona mikið drasl/dót?

Við vöknuðum svo í nýju íbúðinni í morgun og það var ágætlega góð tilbreyting að vilja ekki fara fram úr rúminu af því það var svo svalt í herberginu. Það er sem sagt gluggi á svefnherberginu og hann virkar!

Við erum þó langt frá því að vera búin að koma okkur fyrir, allt er enn í kössum og maður var ansi ringlaður í morgun, gramsandi í kössum eftir mat í svangan malla. Ég endaði á því að borða sem minnst (er haldin maníum eins og æ, ég nenni ekki að borða) og dreif mig út í Odda til að komast á netið og sjá hversu ómissandi ég var þennan eina dag sem ég komst ekki á netið.

Í tölvuverinu fékk ég óvæntan morgunverð, jarðarberja ab-mjólk sem ein stelpan, sem sat við hliðina á mér, missti yfir alla höndina á mér. Í staðinn fyrir að sleikja hana upp og fá smá næringu fannst mér réttast að þrífa hana af, ég held að flestir hefðu gert það :)

Í dag setjum við síðan markið á að versla húsgögn. Okkur vantar nebbla eldhúsborð og stóla, bókahillur og aðstöðu fyrir tölvuna. Svo væri skemmtilegra að hafa gardínur í gluggum.

Og svo ætlum við að skipta um lögheimili og póstfang og þannig kveðja Húsavík (hahahahaha).

Tweet

Pamfílar -framhaldið

Hver man ekki eftir hinum dularfulla lista sem nefndur hefur verið hér á heimasíðunni oftar en í tvígang. Við vorum á þessum lista til að fá íbúð á Stúdentagörðum. Hann heyrir nú sögunni til. Ástæðan fyrir því er góð og gild. Í gær var hringt í Ásdísi frá Stúdentagörðum og henni tilkynnt að íbúð hefði losnað sem hentaði okkur.

Við skunduðum til að skoða íbúðina um ellefuleytið, leist vel á og skráðum okkur hana. Við áttum alls ekki von á að þetta myndi ske fyrr en um áramót þar sem við vorum enn í tíunda sæti. Svona er það nú bara hjá pamfílunum.

Við fórum því í 10-11 og fengum fullt af kössum og erum byrjuð að pakka smá. Það eru nú samt blendnar tilfinningar sem fylgja þessu öllu saman því ekki eru nágrannar eins og Eygló og Maggi á hverju strái. Maður vonar bara það besta og smælar framan í heiminn. Því eins og meistari Megas sagði réttilega: Ef þú smælar framan í heiminn þá smælar heimurinn framan í þig.

Tweet

Lukkunar pamfílar

Á laugardagseftirmiðdag vorum við heima að ganga frá í rólegheitunum þegar síminn hringdi. Var það María, frænka Ásdísar, að bjóða okkur í leikhús. Það er nú ekki alveg á hverjum degi sem manni er boðið sisona og ekki þarf að taka fram að við þáðum miðana með þökkum. Í leikhúsinu skemmtum við okkur konunglega, enda ekki annað hægt þegar Erling er annars vegar.

Í gær stóðum við líka í stórræðum. Þannig er nefnilega mál með vexti að foreldrar Sigrúnar hans Andra voru eitthvað að endurnýja sófamálin hjá sér og hafði Sigrún boðið okkur gamla sófasettið í heild sinni. Í gær fórum við sumsé og sóttum allt heila gilimóið og þökkuðum fyrir okkur. Ekki amalegt sófasett þarna á ferðinni, eins og nýtt og úr svakafínu leðri.

Sófasettið fórum við með í geymslu til Péturs afa. Ekki virtist lukkan ætla að taka endi því afi bauð okkur út að borða Á næstu grös. Þar fengum við þennan svaka fína mat og eftir hann röltum við á Súfistann, drukkum súkkulaðikaffi, lásum góðar bækur og kjöftuðum.

Frábær helgi!

Tweet

Af prímötum

Jæja nú er ég búinn í tímum í dag. Já það er kennt á laugardögum. Ég kemst að vísu bara annan hvern út af vinnunni en það er allt í lagi þar sem tvö af þremur fögum eru kennd annan hvern laugardag.

Þessa stundina sit ég á bókhlöðunni og er að lesa þjóðhagfræði. Bókin sem við notum er eftir Mankiw en hann er einmitt ráðgjafi Bush yngri. Ég hef heyrt að Bush eldri kalli stefnu Bush yngri voodoo economics. Það á hann víst að hafa sagt um stefnu Reagans á sínum tíma en sagt hefur verið að prógrammið hjá Bush yngri svipi til hennar. Kannski væri rétt að kalla Bush yngri barasta Bush baby.

Tekið skal fram að allt efni í þessari færslu er birt í fullkomnu ábyrgðarleysi og er eingöngu ætlað til skemmtunar.

Tweet

Vitkinn talar

Ég þraukaði nú allan daginn í gær og er alltaf að hressast. Í morgun mætti ég meira að segja í ræktina! Jahá! Ég bara mætti í ræktina... Það er lítið mál að mæta en það er víst ekki það sama og að gera. Ég fór bara í gufuna á meðan Ásdís púlaði frammi. Það var alveg reglulega fínt.

Ég ætla ekki að hefja æfingar aftur fyrr en í næstu viku, enda djúpvitur eins og fram hefur komið. Eftir veikindin er líka nóg að gera í skólanum svo ég sinni honum bara meira í staðinn.

Tweet

Skítaástand... og þó

Jæja nú er ég klæddur og kominn á ról! Ég held samt að ég sé of snemma í því.

Fyrir þá sem ekki hafa fengið lýsingu í beinni þá er ég búinn að liggja í flensurusli síðan á sunnudagskvöld. Því miður eru allar líkur á að ég geri það sama í dag :( Það er líka betra að vera seif en sorrí :)

Í gær dreymdi Ásdísi einhvern helling og þegar hún var búin að segja mér frá því sagði ég henni að þetta þýddi að nú yrði hún að kíkja á listann fræga. Hún kíkti og viti menn: við erum númer ellefu.

Þetta þýðir hvað? Jú þetta þýðir að Ásdís er berdreyminn og ég djúpvitur. Haha!

Tweet

Góð kenning

Smvmkaæt rsónunkanm eknss hsókláa sipkitr röð sftaa í oðri egnu mlái, það enia sem mlái stkpiir er að fsrtyi og saðítsi sfaitunrn í hjevru oðri eru á rtéutm satð. Aagfgni snaftana er hgæt að vxlía og smat hgæt að lsea txaetnn án eireiðfkla.

Acocdrnig to an elgnsih unviesitry sutdy the oredr of letetrs in a wrod dosen't mttaer, the olny thnig thta's iopmrantt is that the frsit and lsat ltteer of eevry word is in the crcreot ptoision. The rset can be jmbueld and one is stlil able to raed the txet wiohtut dclftfuiiy.

Tweet

Blæbrigðamunur

Mér líður nú svolítið eins og ég sé að leika í myndinni Groundhog Day. Hvers vegna? Þið komist að því þegar þið lesið færsluna.

Í gær eftir skóla fórum við Ásdís á Subway (nýtt) og svo í bíó á bresku kvikmyndadagana (enn og enn og aftur). Við sáum myndina Plots with a View (nýtt). Mæli með henni (gamalt). Fullt af hágæða leikurum sem fara á fullt af kostum.

Eins og sjá má er eilítill blæbrigðamunur á þessari færslu og þeirri sem ég skrifaði í gær. Hann mun þó ekki vera augljós og hefi ég því merkt sérstaklega við nýjungar og gamlungar. Þetta ætti að hjálpa lesendum að glöggva sig á hvað þarf að lesa og hvað ekki.

Að lokum ber að nefna að ef ég nefni hlutinn oftar en einu sinni er allt eins öruggt að hann sé til prófs. Hafið því augun opin.

Tweet

Magdalenur

Í gær eftir skóla fórum við Ásdís í bíó á bresku kvikmyndadagana, enn og aftur. Í þetta sinn var það myndin The Magdalene Sisters sem varð fyrir valinu. Ekkert review frekar en fyrri daginn. Mæli með henni. Ef þið ætlið að sjá einhverja af þessum bresku myndum í bíó þá verður það að vera fyrir 14. september, því þá eru þessir bresku dagar búnir.

Tweet

Islande deux points

Um helgina fórum við í sumarbústað. Þar lærðum við, skipulögðum hina margrómuðu rútínu og lágum smá í leti. Þetta var notaleg helgi. Það varð nú ekkert úr neinum gönguplönum enda ekki hægt að gera allt í einu.

Í gær var skóli og áðurnefnt skipulag prufukeyrt með ágætum árangri. Í gær var líka fyrsti dæmatíminn í reikningshaldi. Í morgun var það gymmið, sneru líkamsmeiðingarnar fyrst og fremst að kassa og baki. Alltaf gaman á þannig æfingum.

Jæja ekkert mas! Fyrir þá sem vita af biðlistamálum okkar þá erum við farin úr hinu þjóðlega sæti 16 og komin í númer 14! Jibbíjíha!

Tweet

Rútína í mótun

Í gærkvöldi heimsótti ég Pétur afa og spjölluðum við í smástund, kíktum á prentarann hans og sendum ímeil. Svo varð ég að þjóta klukkan tíu því ég hef einsett mér að vera kominn í ró klukkan hálfellefu á kvöldin.

Það gekk svona c.a. í gærkvöldi enda vaknaði ég sprækur sem lækur u.þ.b. korter til tíu mínútur í sex og var fljótlega tilbúinn í slaginn eftir lýsi og ab mjólk. Þá var skundað í gymmið þar sem við tókum rækilega á því bæði tvö og nú er ég, samkvæmt áætlun, á bókhlöðunni að læra (reyndar er Ásdís að læra en ég að blogga).

Tweet

Dansi, dansi!

Þetta var nú meira fjörið! Ég mæli með þessu við alla. Við lærðum grunnspor og takta í foxtrot, djæf og vals. Tróðum lítillega á tám hvors annars, þurftum stundum að byrja aftur en gekk alveg ótrúlega vel þess á milli.

Það góða við svona dans er að maður hugsar ekki um neitt annað á meðan. Maður bara dansar og dansar og reynir að ná sporunum. Að vísu var ég svo einbeittur fyrst að ég kramdi höndina á Ásdísi og tók líka allt of stór skref, en svo lagaðist þetta.

Fram, fram, stutt, stutt! Aftur, aftur, stutt, stutt! Rokk, rokk, stutt, stutt! Þarna er smá sýnishorn af foxtrot en ef maður kann hann getur maður víst þóst kunna fullt af öðrum dönsum með eilitlum stílbrögðum. Það kemur áreiðanlega síðar.

Djæf er svolítið erfiðara að útskýra í svona bloggi enda voru þar ýmsir snúningar og hnykkir, Ásdís tók meira að segja svona bíómyndasnúninga fram og aftur. Í lokin til að róa okkur var tekinn kassavals sem er ósköp þægilegur. Að loknum danstíma var svo rúllað beint heim enda verður maður lúmskt lúinn af þessu tjútti.

Tweet

Samkvæmislyftingar og kraftdansar

Undanfarna tvo morgna höfum við Ásdís mætt í gymmið fyrir skóla. Þetta finnst mér gefa góða raun og er að pæla í að halda þessu áfram.

En við erum nú aldeilis ekki bara í gymminu. Það hefur verið nóg að gera í skólanum, sem er hið besta mál, og svo ætlum við að gerast bæði menningarleg og heilsusamleg í kvöld og skella okkur á dansnámskeið.

Það var nefnilega þannig að við höfðum einhvern tíma í fyrndinni talað um að það gæti nú verið gaman að kunna dans en svo var ekkert framkvæmt og ég beið bara eftir því að danssporin kæmu til mín, kannski finn ég galdraskó. Ég held að Ásdís hafi ekki trúað á þannig bull því hún bara skráði okkur á þetta dæmi.

Mér líst alveg frábærlega á þetta og hlakka mikið til. Lyftingar og dans eiga einmitt betur saman en margan grunar. Því ég man ekki betur en að Arnaldur, vinur minn, hafi notað ballett sem hluta af undirbúningi sínum fyrir vaxtarræktarmót :)

Tweet

Vinna meira

Ég er að hugsa um að vinna á hverjum degi. Hér hef ég hvorki meira né minna en 7000 fermetra húsnæði til umráða, sítengingu við netið mér að kostnaðarlausu, sjónvarp, video, síma, laun og svo er best hvað ég er heppinn með mat.

Undanfarna tvo daga hef ég verið að vinna og báða dagana hefur Ásdís ofurgella komið með vægast sagt frábæran mat. Í gær bakaði hún dýrindis pizzu og í dag var það schnilldargóður linsupottréttur. Það væsir nú ekki um mann hér í höllinni.

Tweet

Allt eða ekkert

Eftir matarleiðangur föstudagsins fórum við á Grænan kost þar sem við höfðum mælt okkur mót við Elfar nokkurn. Þangað fórum við í matarpælingum enda held ég að ég hefði breyst í svarthol ef ég hefði ekki tekið í taumana á þeirri geigvænlegu þróun sem þegar var hafin.

Nákvæmlega, ég var að fokking-deyja úr hungri og þannig nennir maður nú ekki að vera til eilífðarnóns. Ef ég hefði breyst í svarthol hefði líklega enginn þurft að kaupa ryksugu framar.

Því var þrennt í stöðunni: að duga eða drepast, að éta eða ekki, hafa allar framtíðartekjur af heiðarlegum ryksugusölumönnum. Giskið á hvað ég valdi. Hárrétt! Ég át, enda ætlaði ég nú ekki að hafa lifibrauð áðurnefndra ryksugumanna af þeim. Ég bara er ekki þannig týpa. Einfaldlega allt of sætur í mér.

Eftir matinn skelltum við okkur í bíó þar sem við horfðum á myndina All or nothing sem er á breskum kvikmyndadögum Háskólabíós. Ég segi ykkur ekkert um hana því ég þoli ekki kvikmyndareview og ætla því ekki að sóa tíma ykkar né mínum í slíkt prump.

Góðar stundir.

Tweet

Hassperur

Jæja, kominn nýr dagur með fullt af verkefnum. Það sem ég átti erfitt með að drattast á lappir í morgun. Eitthvað þreyttur (latur). Í dag er fyrirlestur fyrir hádegi og dæmatími eftir hádegi eins og hefur verið, en ekki á morgun. Þetta er síðasti dagur undirbúningsnámskeiðsins og út-að-versla-dagur. Á mánudag hefst svo kennsla eftir stundatöflu.

Prófið í gær gekk ágætlega, ég sat og leysti verkefni fram á síðustu mínútu. Eins gott að koma höndunum í form fyrir námstíðina, ég held ég fái harðsperrur (hassperur segja sumir) eftir gærdaginn.

Tweet

Hin verndaða rútína stundatöflumannsins

Mér segir svo hugur um að nú sé að hefjast skólarútína. Ég hef undanfarið sótt undirbúningsnámskeið í reikningshaldi tvisvar á dag og þar af leiðandi í upphitunarformi fyrir alvöru lífsins. Á morgun verður skyndipróf úr námsefninu þannig að það er best að rifja upp í dag.

Á föstudaginn verður svo farið yfir prófið og svo byrjar skólinn á mánudaginn. Það er alltaf eitthvað gott við stundatöflur, námsáætlanir og svoleiðis, einhvers konar verndað umhverfi fyrir þá sem líður vel í rútínu.

Tweet

Örlaukur

Á laugardaginn bjó ég til lauksúpu. Ég tel mig nú ekki vera neinn brautryðjanda í súpugerð en ég gerði hana frá a til ö í örbylgjuofninum. Þetta tók mig svona korter og árangurinn var alveg hreint firnafínn. Prófið bara sjálf.

Innihald:
450g laukur
50g smjör
2 msk maísmjöl
1 hnífsoddur cayenne pipar
2 grænmetisteningar
0,85 l af vatni
salt og pipar eftir smekk
rifinn ostur eftir smekk (frekar meiri en minni þó)
steinselja

Setjið smjörið í stóra skál (sem kemst þó í örbann) og bræðið á fullum styrk í eina mínútu. Á meðan skerið þið laukinn í þunnar sneiðar og hrærið við smjörið í skálinni og eldið í 4 mínútur á fullum styrk. Að þessum fjórum mínútum liðnum hellið þið vatninu út í skálina ásamt kryddi og þurrefnum og hendið inn í ofninn og hafið í fimm mínútur við fullan styrk. Stráið svo ostinum yfir, látið hann bráðna og skreytið með smá steinselju.

Tweet

Myndaalbúm

Laugardagurinn leið ljúflega við Enyusöng og afslöppun. Við fórum ekki einu sinni út úr húsi fyrri part dags, við vorum svo löt. Ég bakaði að vísu bananabrauð sem etið var með bestu lyst auk smjörs og osts.

Við vorum þó ekki með öllu aðgerðalaus; Baldur lærði heima fyrir þetta undirbúningsnámskeið í reikningshaldi og ég tók mig til og gróf upp gömul myndaalbúm. Ætlunarverk mitt var að finna pláss fyrir nýju myndirnar sem við vorum að fá úr framköllun.

Þetta voru þrjú albúm sem um var að ræða, eitt frá mér, eitt frá Baldri og eitt sem var alveg tómt. Þar sem ég er dottin úr þjálfun við að raða myndum í albúm tók það mig smá tíma að skipuleggja hvernig best væri að raða myndunum.

Ég komst loksins að eftirfarandi niðurstöðu: Myndirnar af jólunum 2000 fóru í mitt albúm og allar hinar myndirnar af okkur Baldri fóru í Baldurs albúm og svo auðvitað nýja albúmið. Þetta voru myndir af Fríðu Sól og Kisu, ferðinni okkar um Norðurland sumarið 2001 og svo myndir af 17. júní sama ár.

Það var afskaplega gaman að skoða þessar gömlu/nýju myndir og í leiðinni renndi ég yfir myndir sem þegar voru komnar í albúm, myndir af tilhugalífi okkar Baldurs og fyrstu sambúðarvikum.

Síðan þessar myndir hafa verið teknar höfum við ekki tekið fleiri myndir á filmu enda fengum við stafrænu vélina í júní 2001 og bara tekið á hana síðan. Það þarf þó ekki að þýða að við hættum að raða í myndaalbúm, mér finnst það nefnilega gaman og gott að geta gripið í þau þegar gesti ber að garði. Nú þarf bara að fara að velja myndir til útprentunar og bretta upp ermar, raða, líma, raða, líma.

Tweet

Bláber

Já þetta gekk allt saman eftir. Við fórum upp í Munaðarnes í gær og tíndum fullt, fullt, fuuullt af bláberjum, bökuðum vöfflur og átum helling af bláberjum en það hafði ekkert að segja. Við þurfum að halda vel á spöðunum í dag og á morgun og eta bláber.

Ekki hringja, ekki reyna að tala við mig ég verð upptekinn næstu tvo daga. Ég þarf að eta bláber.

Tweet

Berjamó

Okkur fannst svo gaman í berjamó sunnudaginn seinasta að ákveðið hefur verið að fara aftur upp í Munaðarnes seinni part dags í dag og tína ber við Paradísarlaut. Oh, hvor det er dejligt!

Ég ætla bara að tína bláber því ég fíla ekki krækiber. Svo ætlum við að baka vöfflur og fá okkur bláber ofan á og kannski smá hlynsíróp og rjóma. Namm.

Tweet

Sokkar

Ekki voru nú vandræði að finna á mig sokka, ég fékk heil sex pör.

Nú er ég í frímínútum og ákvað að nota tímann í smáblogg. Í gærkvöldi heimsótti ég Pétur afa og Dag. Var margt spjallað og fór ég heim með tvo fulla Hagkaup-size poka af dýrindis grænmeti.

Þar sem ég á nú svo mikið grænmeti fór ég í smá tilraunir. Fyrsta tilraun var grænkáls og brokkólí safi sem ég drakk í morgunmat. Vægast sagt kraftafæði.

Tweet

Sokkar úr fortíðinni

Ég er búin að eyða lungann úr deginum í að lesa gamlar dagbókarfærslur okkar Baldurs og ó, það er svo gaman!

Ein skemmtileg tilviljun, við hjónakorn vorum búin að ákveða að fara í Europris í dag eftir vinnu og birgja okkur (þ.e.a.s. mig) upp af sokkum á tilboði. Baldur heimtar reyndar líka að fá sokka en maðurinn er svo stórfættur að það er ekki hægt að segja að hann sé maur! (einkahúmor) Við ætlum reyndar að nýta ferðina og kaupa tómata í leiðinni því í verslunarferðinni í Bónus í gær voru ekki til tómatar, appelsínur og gulrætur. Hneisa.

Hvað um það, tilviljunin er þessi: Áðan í nostalgíukastinu las ég þessa færslu um ferð okkar í fyrrnefnda verslun þar sem svipaður varningur rataði ofan í kerruna og mér líst hreint ekki á blikuna. Ættum við að hætta okkur á þessar slóðir aftur eða eigum við að gera það sem brennt barn gerir ávallt, þ.e. að forðast Europris?

P.s. Mig langar ógurlega mikið í nýja sokka svo allt bendir til þess að við brennum okkur, æ.

Tweet

Sumarbústaðarblíða

Á föstudaginn eftir vinnu fórum við beinustu leið upp í Munaðarnes ásamt Elfari, í samfloti voru Andri og Sigrún. Strax og þangað var komið var kveikt í kolum og byrjað að elda. Útkoman var vægast sagt frábær: salat, smjörsteiktur silungur, grillaðar bakaðar kartöflur og frábær smjör og rjómasósa. Lítið man ég hvað gerðist meira það kvöld sökum matarvímu.

Á laugardeginum var sofið út og farið í smá gönguferð + sundferð (ég synti 1000 m), svo var slappað af eins og lög gera ráð fyrir. Eftir slökun gerðum við svo það sem allt fólk í sveitasæluslökunarsumarbústaðarferðum gerir, við fórum niður í bæ og fylgdumst með menningarnótt Reykjavíkurborgar.

Vingsuðumst í gegnum bæinn, droppuðum í Fóu feykirófu og héldum svo á afmælistónleika Rásar 2 þar sem við sáum Sálina hans Jóns míns og Stuðmenn. Hljómsveitir sem klikka ekki. Eftir flugeldasýninguna fórum við aftur í sveitasæluna.

Sunnudagurinn lofaði góðu strax um morguninn með glampandi sól og dúnalogni. Ekki dugði að hanga inni á slíkum degi. Við ókum c.a. 9 mínútna frá Munaðarnesi þar til við komum að skilti sem á stóð Glanni Paradís. Þar beygði ég og við skoðuðum fossinn Glanna, lögðumst í bláberjaát og reyndum að finna Paradísarlaut. Það mistókst, að ég held. Að lokinni göngunni var svo byrjað að undirbúa enn aðra veislu og var hún ekki síðri en sú fyrri.

Ég gleymi aðalatriðinu! Agh! Það var ekki eitt heldur allt með því að við dveldum þarna. Það var nefnilega hægt að hækka og lækka alla eldhúsinnréttinguna (komplett með skápum og allegræ) með rafmagnsstýringarjúniti, ég legg ekki meira á þig lagsmaður.

Tweet

Af bein- og sjálfskiptingum

Þessar þrjár vikur sem Nolli var á verkstæði voru Kalli afi og Ólöf amma svo góð að lána okkur Suzuki jeppann sinn.Venjuleg lét ég Baldur um að keyra hann þar sem hann er frekar þungur í stýri en ég gat þó ekki alltaf verið slík prinsessa og stundum keyrði ég jeppann sjálf.

Þetta er beinskiptur bíll sem mér finnst gaman að keyra og eftir þrjár vikur af slíkrum akstri var maður orðinn ansi vanur því að notast við beinskiptingu.

Fyrir viku síðan þegar við náðum í Nolla brá mér hins vegar ansimikið í brún. Ekki nóg með að stýrið væri eins og úr baðmull heldur vantaði alveg kúplingu og gírana! Ég byrjaði á því að þreyfa fyrir mér með vinstri fæti í leit að kúplingunni en þá rann upp fyrir mér þessi staðreynd.

Fólk segir yfirleitt við mann að passa sig að hætta ekki að keyra beinskipta bíla því það sé svo erfitt að venja sig aftur á gírana. Í mínu tilviki er því hinsvegar öfugt farið, ég á ekki í neinum vandræðum með það en hins vegar finnst mér ansi erfitt að venja mig af gírunum. Ég hef t.d. lentí því að ætla að kúpla en í staðinn þrusað á bremsuna! Og þá man ég alltaf: Ó, ég er á sjálfskiptum.

Tweet

Yatze anyone?

Um daginn keyptum við Baldur yatze spilið í Bónus og hugsuðum okkur gott til glóðarinnar, sáum fram á margar góðar kvöldstundir þar sem við spiluðum af lífi og sál.

Einn galli er þó á gjöf Njarðar sem við sáum ekki fyrir, hvorugt okkar man leikreglurnar svo illt er í efni. Ég hef reynt að leita að þeim á netinu en enn ekki orðið ágengt.

Svo ef þú lesandi góður (sem ert væntanlega líka ættingi eða vinur) manst þessar reglur eða veist hvar er hægt að nálgast þær þá væri mjög vel þegið að fá smá emil um það. Oft var nebbla þörf en nú er nauðsyn, við ætlum sko í bústað á morgun.

Tweet

Af stífstraujuðum sængurfötum og miðnæturbakstri

Gærdagurinn gekk vonum framar og komum við öllu í verk sem á tékklistanum var og gott betur. Með gott betur á ég við að í straujárnsleiðangrinum mundum við eftir öðru apparati sem við höfum lengi ætlað að festa kaupa á, það er eggjasuðutæki.

Við keyptum sem sagt straujárn frá Philips í Heimilistækjum ásamt eggjasuðutæki frá Melissa. Þá keyptum við hvít/græn röndótt straubretti í Rúmfatalagernum og fórum með filmurnar í framköllun í Bónus. Skólataskan mín fór í viðgerð hjá skóara í Smáralind og ætlaði sá að skipta um sleðann á rennilásnum. Svo má ekki gleyma yfirdýnunni sem við sóttum í hreinsun.

Þegar heim var komið drifum við okkur í að rífa allt upp úr pakkningum sínum eins og óðir krakkar á jólum. Forgangsverk var að koma yfirdýnunni á rúmið og þegar það var búið og gert fannst okkur tilvalið að setja hreint á rúmið. Þá fannst okkur enn tilvaldara að prufukeyra straujárnið og straubrettið svo við gerðum okkur lítið fyrir og straujuðum hreinu sængurfötin. Þegar við vorum síðan búin að búa um rúmið var það svo girnilegt að mann langaði strax upp í rúm að kúra.

En dagur var ekki að kveldi kominn enn þrátt fyrir þessa ofangreindu iðjusemi. Við skutumst nebbla í sund með pater meus þar sem við syntum tilskylda 500 m. Ég fór þrjár ferðir flug og var ansi ánægð með framfarirnar á því sviði. Ég er alltaf að ná betri tökum á þessum stíl sem Baldur er alltaf að tala um :)

Við buðum síðan pabba í tebolla eftir sund til að plana helgina og þá fékk ég þá brjálæðislegu hugmynd að baka möffins. Sem ég og gerði og man ég ekki eftir að hafa bakað um miðnætti áður. Muffurnar smökkuðust mjög vel.

Á tékklista dagsins í dag er m.a. að kaupa batterí í úrin okkar beggja. Mitt hefur verið batteríslaust í nokkra mánuði en Baldurs í nokkur ár! Þá ætlum við að kíkja til Péturs afa en svo vill til að hann á afmæli í dag. Heppilegt að ég skuli hafa bakað í gær.

Tweet

Gott form

Í blíðviðri gærdagsins átti sér stað mikill íþróttaviðburður. Hann tók u.þ.b. 90 mínútur og ég var alveg búinn á eftir. Við drifum okkur í Breiðholtslaugina og tókum skemmtilega sundæfingu. Æfingin samanstóð af 90 mínútna frjálsri upphitun í letipottinum þar sem ég náði meira að segja að dotta. Eftir þessa miklu æfingu nenntum við ekki að teygja en það kom ekki að sök ég finn ekki neinar harðsperrur, líklega af því að ég er svo vanur sundmaður.

Tweet

Tékklistinn og frestunarárátta

Við Baldur höfum átta vanda til að fresta hlutunum fram í hið óendanlega. Var svo komið að okkur ofbauð framtaksleysi okkar og tókum við á það ráð að skipuleggja betur hvern dag. Á hverju kvöldi áður en gengið er til náða eyðum við því nokkrum mínútum í að gera lista yfir það sem við viljum koma í verk daginn eftir og númerum atriðin eftir mikilvægi, mikilvægasta er nr. 1 o.s.frv. Þetta er hinn svokallaði tékklisti.

Með þessari aðferð höfum við nú þegar komið ýmsu í verk sem hefur verið í biðstöðu ansi lengi. Um daginn fórum við t.d. með yfirdýnuna á rúminu okkar í hreinsun en sú dýna hefur mátt dúsa upp á skáp í rúmt ár núna eða frá því við fluttum í Hrauntunguna.

Við vorum til að byrja með svo bjartsýn að við töldum okkur trú um að hún kæmist í litlu smáþvottavélina okkar. Það var hins vegar borin von svo í staðinn reyndum við bara að gleyma henni upp á skáp. Yfirdýnan á því tékklistanum hreinsun að launa.

Með þessu skipulagi tókst mér líka að kaupa afmælisgjöf fyrir mömmu í tæka tíð en ég hef verið svolítið gjörn á að draga slíkt alveg fram á síðustu stundu og jafnvel gefa afmælisgjafirnar eftir afmælisdaginn sjálfan. En ekki lengur. Ég er meira að segja búin að kaupa afmælisgjöf fyrir brósa og hann á ekki afmæli fyrr en í lok september!

Dagurinn í dag er ekkert öðruvísi en undanfarnir dagar að því leyti að nóg er af atriðum á tékklistanum. Þessu ætlum við að koma í verk:

1. Fara í Bóksölu stúdenta og kaupa þar dagbók og pennaveski.
2. Fara með skólatöskuna mína (faktískt séð á Baldur hana) í viðgerð, láta laga rennilásinn.
3. Ná í yfirdýnu úr hreinsun.
4. Fara með þrjár filmur í framköllun sem beðið hafa þess síðan í maí 2001!
5. Senda myndir til Frónfjarlægra ættingja gegnum svokallaðan tölvupóst eða emil.
6. Kaupa straujárn á útsölu og straubretti.

Mikið verður gaman að koma öllu þessu í verk. Mest hlakka ég til að skoða straujárn (hef aldrei farið í svoleiðis leiðangur áður) og auðvitað að fá myndirnar úr framköllun. Af hverju vorum við eiginlega að taka myndir? Það kemur í ljós.

Tweet

Váááhh

Ég er á Bókhlöðunni eins og stendur í vinnutengdu erindi. Ég gat þó ekki staðist freistinguna og varð að prófa nýju tölvurnar hérna í Bókhlöðunni. Þeir sem til þekkja vita hvað þarft var orðið að skipta um græjur og það hefur nú verið gert með stæl. Lítil borðtölva, flatur skjár, mús með geisla og skrolltakka og stíft og gott, nýtt lyklaborð. Uhh, hvad jeg er lykkelig:)

Tweet

Óprúttnir náungar

Þegar við komum heim úr útlandaferðinni um daginn þurftum við að fara með bílinn okkar Nolla í viðgerð til að skipta um einhvern skynjara. Sú viðgerð tók lengri tíma en við var búist þar sem panta þurfti varahlut frá Bandaríkjunum og það tók sinn tíma.

Nú, nú hvað um það, við biðum sem sagt í þrjár vikur eftir bílnum okkar og á föstudaginn kom loksins þessi blessaði skynjari til landsins. Þeir í Ræsi hræddu okkur síðan með einhverju tali um að þeir kæmust ekki að til að setja skynjarann í fyrr en eftir helgi svo við urðum ósköp súr. Þeir hringdu hins vegar seinna um daginn með þær gleðifréttir að bílinn væri kominn í lag og biði nú eftir foreldrum sínum. Þannig að þegar við sóttum hann var það langþráð stund enda ekki sést í þrjár vikur.

Nolli var hins vegar ekki alveg eins og hann á að sér að vera, eitthvað vantaði... Ah, nýja, rauða skoðunarmiðann fyrir 2004, hann var horfinn! Einhverjir óprúttnir náungar höfðu séð sér leik á borði og ákveðið að skrapa af honum alla skoðunarmiða undanfarinna ára eða alveg niður í einn ljótan, grænan endurskoðunarmiða. Og við sem vissu ekki einu sinni að Nolli hefði einhvern tímann þurft að fara í endurskoðun fyrir okkar tíma.

Auðvitað var skoðunarstöðin svo lokuð þegar við komum þar askvaðandi á Nolla þennan föstudagseftirmiðdag svo alla helgina við urðum að keyra Nolla um allan bæ með þessu græna ferlíki, Nolla til háborinnar skammar og hneisu.

Í gær fórum við hins vegar og fengum eldrauðan og splunkunýjan 04 miða svo Nolli getur varpað öndinni léttar. Hjúkket!

Tweet

Frábær helgi

Helgin leið ansi hratt enda höfðum við margt fyrir stafni. Á laugardaginn fórum við að sjálfsögðu í Gay Pride skrúðgönguna sem var með litríkasta móti.

Þar sem það rigndi eins og hellt væri úr fötu áður en gangan hófst tókum við Baldur með okkur regnhlífar (eða parachute eins og Baldur kallaði það í London!). Til að vera í stíl við daginn voru regnhlífarnar okkar bleikar og bláar. Þar að auki lánaði Pétur afi Baldri regngallann sinn svo hann var varinn í hólf og gólf ef svo má að orði komast.

Þegar við komum að Laugaveginum var gangan hafin og eftir að hafa fylgst með vögnunum líða hjá gengum við til liðs við hana. Þrátt fyrir að varla væri þverfótandi fyrir barnavögnum og regnhlífum var þetta svaka gaman og mikil stemmning. Göngunni lauk síðan á Lækjagötu frammi fyrir sviði sem sett hafði verið upp beint fyrir neðan MR.

Margir söfnuðust í brekkuna við MR til að sjá betur á sviðið en við létum okkur nægja að dúsa á miðri umferðargötunni. Þarna var bæði fjölmennt og góðmennt (fer ekki alltaf saman) og ég verð svei mér þá að segja að ég vissi ekki að Íslendingar ættu allar þessar regnhlífar til. Skemmtiatriðin voru síðan alveg frábær og ögraði mannskapurinn rigningunni með því að taka lagið og syngja: Mér finnst rigningin góð, trallallallalla, oho!

Eftir Gay Pride kíktum við síðan til mömmu því hún átti 45 ára afmæli. Það var alveg æðislega gaman og sátum við og kjöftuðum langt fram á nótt og hræddum hvort annað með skuggalegum sögum. Til hamingju með daginn um daginn elsku mamma!

Gærdagurinn var síðan allur með rólegra sniði. Tókum því rólega fram eftir degi og fórum síðan Á næstu grös með afa, Degi og Stellu. Síðan fórum við unga fólkið í keilu sem ég hef ekki gert í mörg herrans ár. Mér gekk samt sæmilega, allavega vann ég hin þrjú!

Tweet

Páfagaukur rak þjófa á flótta

Þessa skemmtilegu frétt fann ég á mbl.is:

"Páfagaukurinn Matilda, sem býr nálægt Middlesbrough á Englandi, reyndist betri en enginn þegar hún stökkti innbrotsþjófum á flótta. Jacki Burnett, eigandi Mathildu, sem fékk fuglinn í afmælisgjöf fyrir fjórum árum, hefur hefur kennt gauksa að spyrja gesti spjörunum úr. Þegar Mathilda varð innbrotsþjófanna var spurði hún: Halló, hver ert þú? Þegar ekkert svar barst spurði fuglinn og byrsti sig: Halló, þú þarna. Komdu hingað strax! Þetta dugði til að þjófarnir lögðu á flótta."

Mér líst mjög vel á þetta pakkatilboð, gæludýr og þjófavörn í senn. Einnig hefur verið hægt að gera slík reyfarakaup með hunda en svo ég segi eins og er þá er ég ekki svo mikið fyrir hunda og líst mun betur á að fá mér varðkött eða páfagauk. Hamstra er aftur á móti ekki hægt að fá á slíkum kjarakaupum, þeir eru ekkert sérlega ógnvekjandi.

Ef ég fengi mér páfagauk myndi ég sko pottþétt kalla hann Kíkí.

Tweet

Ég mæli með...

... að horfa á norsku myndina Elling. Hún er alveg þrælfyndin og yndisleg.

... að fara í Breiðholtslaug á góðviðrisdegi eins og í dag, synda nokkur hundruð metra og leggjast svo á einn fjölmargra sólbekkja á sundlaugarbakkanum og slappa af.

... að fara á Grænan kost í dag því réttur dagsins er hnetusteik með hrísgrjónum og sveppasósu. Namm :)

... að fara í Alvöru Álfheimabúðina (Erluís) og fá sér ítalskan sorbet ís, helst með sítrónubragði.

Að lokum mæli ég eindregið með dönsku þáttunum Nikolaj og Julie, hágæðaafþreying (orðalag Baldurs) á miðvikudagskvöldum. Hej, hej!

Tweet

Höfuðpaur allra innipúka

Til mótvægis við allar útihátíðir er haldin hátíð í Reykjavík sem heitir Innipúkinn. Ég er hins vegar sannfærður um að enginn af þessum innipúkamönnum sé jafn mikill innipúki og ég um þessa helgi. Ef einhver þeirra rambar inn á síðuna þá getur sá hinn sami gert samanburð hér með.

Prógramm hins sanna innipúka:
Laugardagur: Vakna um 6:45, et þjóðlegan morgunverð, er svo úti í korter og svo inni í 14 tíma.
Sunnudagur: Vakna um 6:45, et fjölþjóðlegan morgunverð, er svo úti í korter og svo inni í 14 tíma.
Mánudagur: Vakna um 6:45, et einhvern slatta, er svo úti í korter og svo inni í 9 tíma af því að verslunarmannahelgin er að verða búin og maður aðeins byrjaður að linast.

Ég vona að þetta bloggerí mitt teljist til samráðs við aðra innipúka (sem vissulega myndi ýta undir slaka samkeppni) og bið Samkeppnisráð að halda að sér höndum í a.m.k. tíu ár en þá skal ég setja símanúmerið mitt á heimasíðuna.

Tweet

Horft á jarðlíf

Mikið er veðrið hér í Reykjavík dýrðlegt. Nú er ég fegin að hafa ekki átt annað val en að vera í bænum yfir helgina. Reyndar á Baldur ekki eins gott og ég, hann þarf nebbla að hanga inni í Mogga í allan dag.

Ég ætla að vera honum til samlætis svona í morgunskimunni en ef veðrið heldur áfram á þessari braut get ég engan veginn verið svo kurteis til lengdar.

En núna ætlum við að snúa okkur að David Attenborough og horfa á þáttinn Life on Earth. Hann er frá 1979 svo hann ætti að renna ljúft áfram eins og allt frá því ári.

Tweet

Af bíói og bæjarferð

Myndin í gær var alveg frábær og við grenjuðum úr hlátri. Svona er að vera Woody Allen aðdáandi, það er ljúft.

Í dag höfum við hins vegar snúið okkur að öðrum og alvarlegri málefnum. Smá útréttingar í bankanum og allt þetta hefðbundna sem klára þarf þann 1. hvers mánaðar. Að því loknu töltum við niður í miðbæ til að kíkja á bókasafnið en festumst í köngurlóarvef á leið þangað, nefnilega geggjuðu ljósmyndasýningunni á Austurvelli.

Við vorum þegar búin að skoða slatta af myndum í einu horni Austurvallar og fórum því núna í annað horn þar sem við sáum m.a. sláturhús í Indlandi, litunarker í Marokkó, baðmullarsnepla lagða til þerris í Indlandi og íbúðarblokk í fátækrahverfi í Brasilíu.

Mettuð af fegurð náttúru og mannkyns losuðum við okkur úr vefnum og komumst loks á bókasafnið. Tilgangur ferðar okkar þangað var að birgja sig upp af góðum og velvöldum kvikmyndum fyrir helgina.

Við ætlum nefnilega ekki út úr bænum heldur ætlum við ósmeik að nýta okkur myndbandstæki saklausra ættingja og sjónvarpstæki þeirra til að geta glápt á Italiensk for begyndere, The Cider House Rules og Malena. Núna erum við á leiðinni upp í Gerðuberg og Foldasafn til að ná í Elling og, auðvitað, eina frábæra Woody Allen mynd - Manhattan Murder Mystery.

Góða helgi góðir hálsar :)

Tweet

Bíó

Bjartsýnin borgar sig. Það er nefnilega enn verið að sýna Hollywood Ending svo við ætlum að skella okkur í bíó núna. Góðar stundir.

Tweet

Morgunkúr

Og meira af morgunbrölti okkar kópanna. Vorum harðákveðin í gærkvöldi að vakna á sama tíma og í fyrramorgun, þ.e. 06:30, til að fara í kraftgöngu.

Ég er þó hrædd um að eitthvað hafi skolast til þegar sú ákvörðun var vistuð því þegar við vöknuðum fyrst í morgun vorum við svo hryllilega þreytt að halda mætti að einhver hefði lætt svefnlyfi í drykkjarvatnið (t.d. flóaðri mjólk með hunangi og bananabita!).

Við sváfum sem sagt yfir okkur og áttum fullt í fangi með að mæta á réttum tíma í vinnuna. Í staðinn erum við enn ákveðnari en ella að vakna snemma í fyrramálið og kraftganga meðfram sjónum. Við skulum!

Tweet

Morgunhringurinn

Hreyfing dagsins í dag fólst í kraftgöngu í morgunsárið. Við gengum meðfram sjávarsíðunni á Kársnesinu og áðum síðan á stað sem kjörinn er til að pústa því þar er bekkur og aðstaða til upphífinga. Nenni maður hins vegar engu slíku er hægt að dunda sér við að lesa á skilti með fróðleik um fuglalífið sem þarna er að finna.

Við nenntum hins vegar alveg og gerðum magabeygjur áður en við kraftgengum heim á leið. Þetta er alveg frábær líkamsrækt sem ég mæli með við alla.

Núna er ég hins vegar mætt í vinnuna og ætti með réttu að vera að vinna en mér finnst þó alltaf best að byrja vinnudaginn á því að fara "morgunhringinn" á netinu, þ.e. athuga allan póst og fréttir og slúður ættingja og vina.

Ég álpaðist reyndar inn á vefinn kvikmyndir.is og sá þá mér til mikillar ánægju að sýningar á Woody Allen myndinni Hollywood Ending væru hafnar. Við nánari athugun sá ég líka að seinasta sýningin var í gær :(
Soddan bömmer.

Ég ætla nú samt að hringja og athuga til öryggis hvort svo sé því tilhugsunin um að þurfa að bíða eftir að hún komi út á spólu setur daginn alveg úr skorðum. Og dramaverðlaun ársins hlýtur...

Tweet

Skrælinginn snýr aftur!!!(24)

Já nú er maður kominn heim frá útlöndum. Undanfarnir dagar hafa farið í að skræla mig eins og appelsínu og er það sérdeilis sniðugt sport, í það minnsta hentar það vel sem hliðaráhugamál ef manni finnst gaman að snorkla við franskar strendur í hitabylgjum.

Það er nú alveg þrælgaman að snorkla þarna úti og hefi ég ákveðið að leggja drög að bókinni Synt með sardínum og má búast við að hún veiti bókinni Dansar við úlfa harða samkeppni í njólabókaflóðinu sem er væntanlegt seinna.

En þó svo að það sé gaman á erlendri grund með folöldum, sardínum, úlföldum, hekkmorðingjum, uppstoppuðum hundum, Geirmundi Heljarskinni og öllu því ágæta sem þarna er að finna þá finnst mér alltaf yndislegt að komast aftur í kexverksmiðjuna.

Tweet

Tilraun

Strax eftir að ég postaði seinustu færslu fór ég að sjálf að prófa að laga heimasíðuna enda þaulvön þeirri hugsun að neyðin kenni nöktum að spinna. Mér virðist hafa tekist að koma íslenskum stöfum aftur inn á heimasíðuna og þar var í sjálfu sér mjög einfalt.

Hins vegar tekst mér ómögulega að fá nafnið mitt til að birtast með íslenskum stöfum, mér til mikillar gremju svo ekki verði meira sagt (svona klassískur úrdráttur eins og í Íslendingasögunum, haha). Nú hefur SOS kallið sem sagt breyst og aðlagast að nýjum aðstæðum og hljóðar nú svona: Ef einhver kann að breyta nafni meðlima um hverja blogger síðu má sá hinn sami senda mér línu, takk.

Annars er það að frétta af mér að ég sit hér í Odda og hef ekkert annað að gera en flakka um netið. Mig langar hins vegar heil ósköp að komast í vinnunna en það er aftur á móti ómögulegt.

Svo er mál með vexti að þegar ég fór utan lét ég Önju (sem er aðstoðarmaður eins og ég) fá lykilinn minn að skrifstofunni á meðan ég væri í burtu. Í gær sendi ég henni síðan póst og sagðst mæta til vinnu í dag og bað um lykilinn en enn hef ég ekkert svar fengið.

Ég næ ekki einu sinni í Unni, vinnuveitandann, til að komast inn á skrifstofuna svo nú er illt í ári. Örugglega eitthvert samsæmir huxa ég bitur. Já, samsæri um að gefa mér færi á að slappa af og vinna upp næstum þriggja vikna netleysi :)

Tweet

Fregnir

Erum komin heim eftir thriggja vikna sumarfri. Vorum fimm naetur i London og sidan tvaer vikur a Bretagne skaga. Lentum i hitabylju sem endadi med thvi ad sla oll hitamet tharna a Skaganum. Hefur vist ekki ordid eins heitt i einhver 45 ar. Erum nuna solbrunin og hofum bratt hamskipti :)

Vid skiljum hvorki upp ne nidur hvad gengur a hja blogger med thessi blessudu ???? Ef einhver hefur hugmynd um hvernig ber ad laga thetta thaetti okkur vaent um ad fa leidbeiningar. Thangad til efast eg um ad mikid verdi bloggad a thessum bae.

Nanari og betri lysing a ferdinni verdur gefin sidar asamt thvi sem servaldar myndir verda birtar. Annars man eg eftir ad hafa sagt thad sama um Graenlandsferdina og enn er ekkert komid um hana. Spark i rassinn. Laet thetta duga i bili.

Tweet

Mannfræðingurinn sem eldar ítalska grænmetissúpu

Ég hef látið hjá líða að skrifa um atburði liðinna daga sem er synd því hver dagur hefur verið öðrum skemmtilegri.

Á föstudaginn förum við Baldur til að mynda til pabba eins og við höfum gert undanfarna svona hundrað föstudaga til að gæða okkur á pizzu. Nema í þessu tilviki var slíkt ekki á döfinni enda ég búin að ákveða að elda ofan í mannskapinn ítalska grænmetissúpu sem er algjört lostæti (uppskriftina má finna í matreiðslubókinni okkar hér á netinu).

Andri var eins og venjulega búinn að loka sig af inn í herbergi á fullu að lesa undir þessi inntökupróf í læknisfræðinni. Við þá tilhugsun sætti ég mig fullkomlega við minn hlut og undi mér vel í eldhúsinu við að saxa niður grænmetið sem þarf í súpuna. Á meðan skutust pabbi og Baldur niðrí vinnu pabba, Baldur þurfti nebbla að staðfesta bókun á gistingu í London (jei!).

Þrátt fyrir að brósi hafi látið sig vanta tókst mér að plata Sigrúnu kærustu hans til að smakka og allir virtust ægilega ánægðir með súpuna. Pabbi sagðist einfaldlega ekki geta hætt að borða og það rifjaði upp fyrir mér eitthvað sem Óli afi sagði víst oft í denn: Ég vildi að ég væri búinn að borða, farinn að sofa, vaknaður og aftur byrjaður að borða!

Jæja, nóg um þessa súpu því ég iða í skinninu eftir að lýsa laugardeginum, útskriftardeginum góða. Nú, nú við Balduro mio fórum í sund til að slaka smá á fyrir athöfnina og telja í okkur kjark til að mæta. Þegar til kastanna kom var þetta þó hvergi nándar nærri eins slæmt og mér hafði verið tjáð né það sem mbl.is gaf í skyn.

Athöfnin var tæplega tveir og hálfur tími, sem þýðir að hún var á undan áætlun og mér leiddist satt að segja ekki neitt fyrr en undir lokin þegar rektor virtist aldrei ætla að ljúka máli sínu. Ég verð að viðurkenna að ég varð pínu taugastrekkt að standa uppi á sviði frammi fyrir mörg hundruð manns til að fá skírteinið afhent en það tók svo fljótt af að fiðrildið í maganum komst aldrei á flug.

Ég var nú ekki ein um að vera útskrifst þennan dag (779 stykki munið!), Heiddi vinur Baldurs kláraði BS í eðlisfræði og Tinna hans Óla Þórs frænda kláraði jarðeðlisfræði. Ég hins vegar kláraði BA í mannfræði og er því orðin að mannfræðingi. Og gerið það fyrir mig að rugla því ekki saman við sálfræði og segja sposk á svip: Nú, mannfræðingur, ætlarðu þá að sálgreina mig?

Að athöfninni lokinni fórum við Baldur með mömmu og Sigga út að borða á veitingastaðinn Á næstu grösum. Um kvöldið kíktum við tvö síðan í bíó á myndina En la puta vida sem mér þótti ansi góð, þó helst fyrir það að fjalla um hliðar hnattvæðingarinnar sem ég hef nokkurn áhuga á.

Á leiðinni heim úr bíóinu sáum við svo dýrðlegt sólarlag að við gátum ekki fengið okkur til að fara heim strax. Við mundum þá að það voru sumarsólstöður svo við brunuðum út á Gróttu til að upplifa herlegheitin. Við vorum greinilega ekki ein um þessa hugdettu því þarna voru heilu fjölskyldurnar í hjólatúr með hunda sína auk fjölda kærustupara. Einstaklega viðeigandi endir á góðum degi.

P.s. Frá atburðum sunnudagsins greini ég frá síðar.

Tweet

Brautskráning

Nú styttist í að ég brautskráist frá HÍ þar sem ég lauk BA náminu nú í vor. Ég hef fengið að heyra alls kyns hryllingssögur af þessari athöfn, m.a. að hún geti tekið allt að fimm tímum, að þetta sé óbærilega leiðinlegt og að það sé svo heitt að ekki sé líft þarna inni nema á nærbuxunum. Ég ætla ekki að útskrifast á nærbuxunum svo ég býst fastlega við að kafna. Þá hefur mér verið ráðlagt að mæta með bók, ef ekki bara bækur.

En svo ég tali í alvöru þá leiddi ég þetta að mestu hjá mér og lagði lítinn trúnað í slíkar ýkur. Nú hins vegar er ég orðin verulega kvíðin því ég las þetta á mbl.is:

Stærsta brautskráning HÍ
Alls munu 779 kandídatar útskrifast frá Háskóla Íslands næstkomandi laugardag. Þetta er stærsti hópur sem brautskráðst hefur frá skólanum. Athöfnin fer fram í Laugardalshöll. Flestir útskrifast úr félagsvísindadeild, eða 210, en 113 útskrifast úr verkfræðideild. Hvorug deildanna hefur áður brautskráð svo marga að vori. Úr heimspekideild útskrifast 113, 141 úr heilbrigðisgreinum, 91 úr viðskipta- og hagfræðideild og 87 úr raungreinadeild. Konur eru í miklum meirihluta þeirra sem útskrifast. Þær eru 497, eða tæplega 64%, en karlar einungis 282, eða rúmlega 36%. Aldrei fyrr hefur munurinn verið jafnmikill. Karlar eru þó mun fleiri í útskriftarhópi verkfræðideildar, eða 87. Konurnar eru 26.

Munurinn á kynjunum er langmestur í hjúkrunarfræðideild. Þar útskrifast 77 konur en enginn karl. Úr heimspekideild verða 72 konur brautskráðar en 28 karlar og frá félagsvísindadeild útskrifast 150 konur og 60 karlar.

Vegna mikillar fjölgunar brautskráninga í júní-útskrift Háskóla Íslands hefur umræða skapast um það hvort leita þurfi að stærra húsnæði en Laugardalshöll til þess að hýsa athöfnina. Búast má við að húsfyllir verði á laugardag. Á síðustu árum hefur nokkuð verið kvartað yfir þrengslum og hita og eru þess dæmi að fólk hafi fallið í yfirlið.

Ó, mig auma :(

Tweet

Þúsund eikur

Í vinnunni þarf ég mikið að vinna með forritið EndNote sem geymir helstu upplýsingar um bækur og greinar sem maður er að vinna með. Þetta forrit auðveldar manni alveg svakalega vinnuna þegar kemur að greinaskrifum þar sem maður þarf aldrei sjálfur að skrifa aftur og aftur tilvitnanir eins og t.d. (Bowser, 1995).

Eina sem maður þarf að gera er að fara inn í þetta forrit og velja þá bók, grein, kafla eða hvaða heimild sem vitnað er í og þá kemur sjálfkrafa tilvísun. Rúsínan í pylsuendanum er að maður þarf síðan ekkert að vesenast við að búa til heimildaskrá sjálfur því EndNote sér um það fyrir mann þegar maður hefur lagt lokahönd á greinina sína.

Unnur Dís (sem ég vinn hjá) á alveg fullt af bókum og það hefur komið í minn hlut, sem aðstoðarmaður hennar, að taka hverja og eina bók og skrá hana nákvæmlega inní EndNote forritið. Þar koma fram upplýsingar eins og t.d. höfundur, titill, ritstjóri, útgáfuár, blaðsíðutal, útgáfufyrirtæki og síðast en ekki síst borg útgáfufyrirtækisins.

Og þá er ég komin að því sem mig langaði virkilega að tala um, þ.e. eina ákveðna borg. Flest þau útgáfufyrirtæki sem ég hef rekið augun í hafa útibú sín víðs vegar um heiminn og London er ansi vinsæl. Sú borg sem ég hef þó nokkru sinnum rekist á er borgin Thousand Oaks, sem útlagst gæti sem borg hinna þúsund eika.

Ef það er eitthvað sem heillar mig þá er það nafnið á þessari borg og er ég staðráðin í að heimsækja hana í framtíðinni.

Tweet

Nota bene

Ég vil bara vekja athygli á einu hér ef ske kynni að einhver hafi misskilið færsluna hér að neðan. Sumarfríið verður ekki á netinu ef einhverjum skyldi hafa dottið það í hug og vísa ég þar í orð mín "fyrir sumarfríið okkar á netinu." Við einfaldlega keyptum flugmiðana í gegnum netið. Ha, maður getur verið svo skemmtilega ruglaður.

Tweet

Sumarfríið skipulagt

Í gærkvöldi keyptum við flugmiðana fyrir sumarfríið okkar á netinu. Það tók okkur lengri tíma en við bjuggumst við að kaupa miðana þar sem við erum svo rosalega vandvirka og samviskusöm að við vorum alltaf að tvítékka og sjá hvort allt væri ekki í ordnung.

Svo þurfti ég auðvitað að lesa öll plögg um hin ýmsu skilyrði og reglur flugfélaganna svo vel að Baldur sagði að ég ætti að gerast lögfræðingur. Mér líst reyndar ekkert svo illa á þá hugmynd :)

Þetta gerðum við tvisvar því við þurftum að kaupa flugmiða á tveimur stöðum, frá Keflavík til London með Iceland Express og síðan frá London til Dinard í Frakklandi með Ryanair.

Þetta verður ansi gott og langt frí; við ætlum að vera fimm nætur í London og síðan einhverjar tvær vikur á Bretagne skaganum. Ég er ansi hrædd um að þetta verði hið ljúfa líf.

Tweet

Fáliðuð kröfuganga gæsa á hraðferð

Fyrir skömmu var borinn í hús bæklingur frá ÍSÍ um hreyfingu fyrir almenning. Eftir að hafa skoðað bæklinginn ákváðum við Ásdís að skella okkur í kraftgöngu sem við gerðum strax klukkan sjö í morgun.

Göngutúrinn tók okkur um hálftíma og var þessi hálftími drulluerfiður en þrælskemmtilegur enda líktumst við líklega fáliðaðri kröfugöngu gæsa á hraðferð. Ég mæli eindregið með þessu kraftgangelsi fyrir þá sem eru að pæla í að koma sér í form á ódýran hátt án þess þó að skaða hnén.

Tweet

Hjólatúr í blíðviðri

Úr varð á sunnudaginn að við fórum í hjólatúr enda veðrið dásamlegt og ekki hægt að eyða drjúgum hluta dagsins inn í bíl að keyra Hvalfjörðinni, sama hversu fallegur hann getur verið í sól og sumari. Við pökkuðum léttu nesti, fórum í okkar sumarlegustu föt sem voru annars vegar pils og hins vegar stuttbuxur. Þið megið giska hvort okkar var í hverju :)

Við þurftum reyndar að byrja á því að fara með hjólið mitt á bensínstöðina og pumpa í dekkin og smyrja keðjuna og bremsurnar. Ég varð að sætta mig við að hjólið mitt sem ég keypti í Flórída eftir fermingu er ekki lengur eins splunkunýtt og ég hef fram að þessu haldið fram. Það er t.d. óhemjuþungt svo það er engin furða að ég hef verið rög við að stíga á það.

Ég fór nokkra prufuhringi á hjólinu áður en ferðin hófst þar sem ég hef ekki brúkað hjólið núna í tæp tvö ár. Það gekk fremur brösulega þar sem bremsan festist alltaf eða þá að hjólið gíraði sig upp og niður af sjálfu sér. Baldur, sá herramaður sem hann er, tók ekki annað í mál en að ég fengi hans hjól og hann færi á mitt. Og ég, eins tækifærissinnuð og ég er, sagði bara já takk og hjólaði ánægð á brott.

Ferðinni var fyrst heitið til Nauthólsvíkur þar sem við lágum og flatmöguðum á ströndinni í stutta stund. Okkur leiddist hins vegar ógurlega svo við tókum bara hjólin og fórum upp í Öskjuhlíð þar sem við fundum fullt af sætum lundum og skoðuðum Strók.

Ferðin lá síðan að Fossvogskirkjugarði þar sem við fórum að leiðum ættingja okkar. Eftir það héldum við að Fossvogsdal og hjóluðum hann endilangan og enduðum við Elliðaárnar þar sem við pikknikkuðum við Ullarfoss og Þvottaklöpp ef ég man þessi staðarheiti rétt.

Þegar þar var komið sögu var hjólatúrinn búinn að standa í tæpa fimm tíma svo við brunuðum heim af krafti sem ég vissi ekki að við ættum eftir. Allra skemmtilegast var að bruna niður Digranesheiði. Ferðinni lauk síðan í garðinum okkar í Hrauntungunni. Sem sagt frábær dagur.

Tweet

Útivist og engiferöl

Helgin fram að þessu hefur verið alveg frábær og mér hefur svo sannarlega tekist að vinda ofan af mér margra mánaða þreytu og stressi. Veðrið í gær, skúr og skýjað, fór afskaplega vel í mig, svo vel að ég kom heilmiklu í verk.

Ég lagði til að mynda í að fara niður í Kringlu og þar fann ég mér föt til útskriftarinnar (sem ég er annars farin að kvíða nokkuð þar sem ég hef heyrt hryllingssögur á borð við að athöfnin geti tekið allt að fimm tímum!).

Þegar við komum heim í Kópavoginn okkar röltum við niður á hlaupabraut og hlupum/skokkuðum/gengum dágóðan spotta. Eftir það var haldið í sund og farið eina 500 m. Ég var óskaplega stolt af mér því ég fór 75 m. flugsund þrátt fyrir að vera uppgefin. Það þarf nefnilega soddan sprengikraft til að synda flugsund eða fiðrildasund eins og enskumælandi menn kalla það. Verðlaunin fyrir þessa hreyfingu og útivist voru heldur ekki af verri endanum, engiferöl og karamellusnakk :)

Þegar við vöknuðum í morgun var þessi líka veðurblíðan. Við vorum með tvenn plön í gangi fyrir daginn í dag, 1. ef rigning: bíltúr upp á Akranes og sund þar eða 2. ef sól: hjólatúr niður á Seltjarnarnes og síðan í Nauthólsvík og pikknikk þar.

Við virðumst hins vegar hafa fengið smá mix af hvoru tveggja svo ég veit ekki alveg hvernig við snúum okkur í þessu. Kannski maður blandi þessu aðeins, keyri niður í Nauthólsvík og taki sundsprett þar (burrr, líst ekki vel á það), keyri upp á Akranes og pikknikki á ströndinni þar eða hjóli upp á Akranes og fari í sund þar. Mér líst verst á síðasta liðinn.

Tweet

Búin á því

Þetta verður stutt og laggóð færsla. Ég var að skila BA ritgerðinni minni rétt í þessu. Það þýðir að ég get aftur farið að lifa lífinu, látið sjá mig á götum úti og hætt að hugsa um fólksflutninga og innflytjendur!

Jeremías hvað ég er fegin að þessu er lokið. Nú verð ég glöð og sæl til æviloka :)

Tweet

Vorprófum lokið

Já nú eru þau búin vorprófin og er það vissulega léttir. Það dugar þó ekki að slá slöku við því þannig verða menn aumingjar.

Þar sem ég get ómögulega hugsað mér að tilheyra áðurnefndum hópi er ég byrjaður að lesa fyrir sumarprófin, enda ekki seinna vænna ef maður ætlar að leggja Bretagne undir fót í sumar.

Tweet

Seinasta próf BA námsins

Þá er seinasta prófinu mínu í BA náminu lokið og ég er því frjáls eins og fuglinn minn.

Þetta var próf í námskeiðinu Þjóðernishyggja og þjóðernisátök innan stjórnmálafræðinnar þar sem við lærðum um kenningar um þjóðernishyggju og átakakenningar ásamt því að lesa um átökin í N-Írlandi, fyrrum Júgóslavíu og Tétsníu. Það var ansi fróðlegt að átta sig loksins á því hvað er að gerast á þessum vígstöðum.

Ég kveið reyndar prófinu lítillega því ég hef ekki tekið próf í stjórnmálafræði áður en þetta gekk ljómandi vel. Ég er þó ekki alveg komin í sumarfrí enn því ég á eftir að leggja lokahönd á BA ritgerðina sjálfa.

Tweet

Afmæli

Í gær var haldið afmæliskaffi heima og var mikill viðbúnaður lögreglu af því tilefni og kallast dagurinn víst lögregludagurinn. Það kom þó ekki til óeirða og fór veislan öll fram á hinn virðulegasta máta og ber húsfreyjan allan heiður af því.

Eins og allir vita fylgir hverju afmæli aukinn aldur afmælisbarns og ég hef meira að segja heyrt að sumir fái þroska í kaupbæti. Það er sosum gott og blessað en mér líst nú ekki á blikuna þegar fólk er farið að stinga upp á ruggustól sem næstu afmælisgjöf. Eru það skilaboð um aukinn þroska eða hvað? Ég veit ekki, það er erfitt að segja... En dagurinn í gær var frábær, takk fyrir mig!

Tweet

Gleðilegt sumar!

Ég (ef mig skyldi kalla) vil fylgja eftir svokallaðri fyrirsögn og óska öllum um heima og geima gleðilegs sumars og þakka fyrir veturinn (ef vetur skyldi kalla). Ég ákvað að eyða þessum fyrsta degi sumars í vinnunni og nýta tímann í lærdóm. Það er þó eins og oft áður erfitt að gera tvennt í einu og lærdómur víkur fyrir vinnu og almennu amstri.

Tweet

Stutt yfirlit

Núna er ég í tíma en ákvað að skreppa aðeins til að kíkja á póstinn og svoleiðis.

Á laugardaginn var ég að vinna, í gær skutlaði ég mömmu upp á flugvöll og söng svo í tveimur fermingum, í dag er ég búinn. Fyrir utan það sem ég hefi talið upp nú þegar þá reyni ég að læra við öll tækifæri. Jæja þá er það komið, ég er farinn aftur í tíma.

Tweet

Mættarmót

Í dag fór ég í bíltúr með Pétri afa. Við keyrðum sem leið lá út á Keflavíkurflugvöll, svona eins og maður gerir, og náðum í mömmu. Mikið ferlega var gaman að hitta mömmu, nú þarf maður bara líka að fá pabbaskammtinn sinn. Við fórum svo og heimsóttum Stellu ömmu og vorum hjá henni dágóða stund.

Svo úr því að allir voru í svona góðum fíling þá ákvað afi að slá upp mini-ættarmóti (mættarmóti) á á á Á næstu grösum og svoleiðis ættarmót getur ekki orðið annað en ljúffengt.

Tweet

Skammturinn kominn

Eftir rúmlega hálftíma tímasóun á þessum stað þá er ég kominn með endorfínbyrgðir fyrir krúttulega dæmið sem bíður mín í ofvæni.

Tweet

Endorfínfráhvörf

Nú verð ég að gera eitthvað annað en að reikna í smá stund. Ekki það að ég hafi reiknað svona mikið, þvert á móti reyndar. Málið er að dæmin sem ég ákvað að glíma við í dag eru í þyngri kantinum og ganga fremur hægt fyrir sig. Það þýðir einfaldlega að endorfínfíkillinn í mér fær færri verðlaun en ella.

Þegar ég tala um verðlaun þá á ég við losun endorfíns út í líkamann sem gefur manni þessa sælutilfinningu sem fylgir því að sigra stærðfræðiþrautir og reyndar líka líkamlegri áreynslu. Á eðlilegu mannamáli þá var ég barastabara orðinn svo pirraður á ákveðnu dæmi að ég ákvað að gera bara eitthvað allt annað í smá stund.

Tweet

Veðurfréttir á bókasafninu

Í gær þegar við komum heim úr föstudagspizzu, sundi og rabbi tókum við eftir því hve kalt það var í íbúðinni. Við komumst fljótt að því að allir ofnarnir í íbúðinni voru ískaldir sem veitti ekki á gott því framundan var vetrarnótt.

Jæja, klukkan var reyndar langt gengin í tvö þessa nóttina en við létum okkur samt hafa það að tappa af nokkrum ofnum. Við vorum dauðþreytt og mér var orðið ansi kalt svo vonbrigðin voru ekki lítil þegar ofnarnir héldu sínu striki og kældu íbúðina.

Við brutum heilann nokkra stund og veltum fyrir okkur hvernig stæði á því að loft kæmi af ofnunum en samt hitnuðu þeir ekkert eftir aðgerðirnar. Við fengum síðan ljósaperu (!) og tékkuðum á heitavatninu. Það var við manninn mælt, ekki deigur dropi sem kom þegar skrúfað var frá krananum.

Við ypptum þá öxlum, skriðum upp í rúm og bættum á okkur flísteppi til vonar og vara. Undir morgun rumskuðum við síðan við læti í pípunum sem var kærkomin vísbending um að heita vatnið væri á leiðinni. Þetta var samt sko allt í lagi að gista svona í óupphitaðri íbúð eina nótt, sko.

Að lokum, er það bara ég eða finnst öðrum súrrealískt að heyra tilkynnt í kallkerfi Bókhlöðunnar að nú sé korter til lokunnar og fá jafnframt beint í æð nýjustu veðurspána? Ég held að starfsmenn safnsins séu að flippa því lesin var upp veðurspá sunnudagsins og síðan rétt í þessu var tilkynnt að samkvæmt veðurspánni sem var lesin upp hér áðan væri okkur óhætt að fara út í veðrið! Ég sé ekki betur en það sé sól og blíða, ja allavega enginn stormur. Hvað er eiginlega í gangi?

Tweet

Ert'að grínast?

Stundum held ég að grínfréttavefir á borð við baggalút séu óþarfir því svo virðist vera að raunveruleikinn sé oft á tíðum mun klikkaðri og hafi ríkara hugmyndaflug til að skapa furðufréttir. Eða hvað finnst ykkur um að stinga af með son og átta ljón sirkusstjóra?

Tæplega fimmtug kona, sem starfað hefur sem ljónatemjari hjá svissneska farandsirkusnum Hinum fljúgandi sveppum, hefur hlaupist á brott með tvítugum syni sirkusstjórans, átta ljónum og tveimur tígrisdýrum. Konan var að þjálfa sirkusstjórasoninn í þeirri list að temja villidýr. Talsmaður þýska bæjarins Melle, þar sem sirkusinn var við sýningar, segir að þau tvö hafi orðið nánir vinir og ákveðið að hlaupast á brott.

Sirkusinn býður þeim, sem endurheimtir dýrin, jafnvirði nærri 13 milljóna króna í fundarlaun.

Nú þegar stúdentar sjá fram á frekar óspennandi sumarstörf sökum skorts á störfum væri ekki vitlaust að íhuga sumarstarf hjá Hinum fljúgandi sveppum. Ég hef heyrt að þar sé verið að leita að ljónatemjara og tíu vitleysingum sem tilbúnir eru að leika ljón eða tígrisdýr.

Tweet

Fiðraður gestur

Þessa stórskemmtilegu frétt fann ég á netsíðu Moggans:

Það kemur fyrir að furðufuglar reki inn nefið á lögregluvarðstöðum landsmanna. Þeim, jafnt og öðrum gestum, er vel tekið og veitt úrlausn í samræmi við erindi sín. Um kvöldmatarleytið í gær lagði páfagaukur, á ferð um Ólafsvík, leið sína inn á lögregluvarðstofuna. Lögreglumönnum fannst hann vera illa til reika og nokkuð kaldur. Var honum því boðin vist á öxlum þeirra á meðan hann safnaði kröftum og fékk yl í kroppinn. Þegar komið var fram yfir útivistartíma hafði ung stúlka samband við lögreglu og kvaðst sakna páfagauks. Stúlkunni létti að vonum þegar hún frétti að páfagaukurinn væri í höndum lögreglu.

Þegar gengið var til náða í Ólafsvík í gær var páfagaukurinn því kominn í öruggt skjól hjá ungu stúlkunni.

Tweet

Að hlaupa apríl

Í dag er 1. apríl og því alþjóðlegur plat- og gabbdagur. Sjálfri hefur mér bara einu sinni tekist að plata einhvern og það allverulega. Það var þegar ég var svona 6-7 ára og bjó í Miðtúni. Pabbi lá í makindum upp í sófa að glápa á fréttir þegar ég kem inn í stofu og segi að það sé einhver maður úti sem vilji hafa tal af honum. Hann neyddist því til að standa á fætur og fara fram á gang en viti menn, þar var ekki hræða. Ég man mér fannst þetta það allra fyndnasta og skemmilegasta og mér finnst það eiginlega ennþá því pabbi man svo vel eftir þessu prakkarastriki. Haha :)

Ég fann smá fróðleik um þennan merkadag á netinu, á vísindavefnum. Þar segir:

Fyrsti apríl er haldinn ?hátíðlegur“ um allan heim með tilheyrandi glettum og hrekkjum. Upprunann má að öllum líkindum rekja til miðalda en þá tíðkaðist í Evrópu að halda upp á nýtt ár á vorjafndægri 25. mars. Fyrsti apríl var áttundi og síðasti dagurinn í nýárshátíðinni, en samkvæmt fornri hefð Rómverja og Gyðinga skyldu merkilegar hátíðir standa í átta daga. Karl mikli (Karlamagnús) innleiddi þennan nýárssið á 8. öld en Gregoríus páfi 13. færði nýárið aftur til 1. janúar seint á 16. öld. Víða hélst þó áfram hefð miðalda, til dæmis var haldið upp á nýtt ár um vorjafndægur á Englandi allt til ársins 1752.

Ærsl voru mikil þennan dag á miðöldum og fólk vildi halda í þau þótt ekki væri lengur um nýárshátíð að ræða. Öllu kristilegri bragur var kominn á 1. janúar sem áttunda dag jóla og því tilvalið að halda áfram gleðinni fyrsta apríl. Hér á landi staðfesta heimildir að gabbleikir hafi farið fram þennan dag á síðari hluta 19. aldar en Íslendingar þekktu siðinn áður og skrifuðu gabbbréf, svokölluð „aprílbréf“ á 17. öld. Ekki ómerkari menn en Árni Magnússon geta þessarar venju og Jón Þorláksson á Bægisá samdi gamankvæði, „Fyrsti aprílis“, þar sem beinlínis er talað um að hlaupa apríl.

Fjölmiðlar hafa lengi tekið að sér að gabba almenning fyrsta apríl. Lundúnablaðið Evening Standard plataði lesendur sína á mikla asnasýningu árið 1846, ljóst er hverjir voru hafðir til sýnis þar. Fyrsta aprílgabbið sem vitað er um í íslenskum fjölmiðli, er frá árinu 1957. Þá létu fréttamenn Ríkisútvarpsins sem að fljótaskip sigldi á Ölfusá á leið til Selfoss og sögðu frá í beinni útsendingu. Nú til dags er samkeppni meðal íslenskra fjölmiðla um hver á besta aprílgabbið, þekktar eru til dæmis fréttir um miklar verðlækkanir á ýmsum vörum, kjöti, bílum eða tölvum, sem ekki hafa átt sér neina stoð í raunveruleikanum. Best er því að hafa varann á í dag (1. apríl 2003) og taka ekki allt trúanlegt!

Tweet

Áðan rakst ég á skemmtilega klausu á mbl.is. Þar sem sagt er frá manni sem líklega var eitthvað ósáttur við ólaunaða kaffitíma. Sjá nánar um kauða hér. Nú er þessi fugl kominn í fjögurra ára kaffipásu, líklega ólaunaða.

Annars stefnir allt í venjulegan föstudag hjá mér. Skóli klukkan átta, skonsur í nesti og kannski kleina ef heppnin er með mér.

Tweet

Eru slöngur ekki dýr?

Frétt af mbl.is: "Sex ára gömul áströlsk stúlka hefur fengið sérstök heiðursverðlaun dýraverndarsamtaka, en henni tókst að bjarga lífi kettlingsins síns þegar kyrkislanga réðist á hann. Marlie Coleman, sem býr í Cairns í Ástralíu, bjóst til varnar þegar kyrkislangan beit kettlinginn Sóta fyrr á þessu ári. Slangan sleppti Sóta en réðist þess í stað á stúlkuna og beit hana í vörina og hékk þar þangað til móðir stúlkunnar kom og tókst að losa hana. „Snákurinn reyndi að éta Sóta," var það eina sem Marlie gat sagt þar sem hún stóð grátandi blóðug í framan með slönguna hangandi á vörinni. „Mark Townend, formaður konunglegu dýraverndarsamtakanna í borginni, sagði í yfirlýsingu, að samtökin vilji ekki að börn leggi sig í hættu, en þessi litla stúlka, sem var aðeins 5 ára gömul þegar þetta gerðist, hefði sýnt afburða hugrekki og sýnt hinn sanna dýraverndaranda. Talið er að slangan, sem slapp, hafi verið 2,5-3 metra löng."

Mér finnst þessi frétt svolítið kaldhæðin að því leyti að dýraverndarsamtök veittu verðlaun fyrir að bjarga kisulóru úr klóm slöngunnar. Einhvern veginn virðist svo vera að litið sé á kisur sem dýr sem ber að verja en ekki slöngur því hvað vitum við nema að slangan hafi verið að farast úr hungri. Það er jú bara náttúrulegt að slík dýr veiði og éti önnur dýr.

Mér virðast þessi samtök frekar vera gæludýraverndarsamtök. Ég hefði þó gert það sama í sporum stelpunnar ef ég hefði haft hugrekki til þess. Það getur nefnilega ekkert dýr keppt við kisur hvað varðar fríðleik og yndisþokka og því hefði slangan fengið að finna á því :)

Tweet

Hjónabönd og samskipti kynjanna

Börn eru alveg frábærar manneskjur. Vissulega eru þau með staðlaðar myndir af kynjunum oft á tíðum en það breytir því ekki að maður getur hlegið sig máttlausan yfir hreinskilni þeirra. Nokkur bandarísk börn voru spurð spurninga um hjónabandið og samskipti kynjanna. Hér koma nokkur gullkorn.

Hvernig veit maður hverjum maður á að giftast?

"Maður verður að finna einhvern sem hefur gaman af því sama og maður sjálfur. Ef maður til dæmis hefur gaman af íþróttum verður hún að hafa gaman af því að þú hafir gaman af þeim og sjá um snakkið og dýfuna." - Alan, 10 ára.

"Það ákveður það enginn áður en hann verður fullorðinn hverjum hann ætlar að giftast. Guð ákveður það allt löngu áður og maður kemst ekki að því fyrr en það er orðið of seint." - Kirsten, 10 ára.

Á hvaða aldri er best að ganga í hjónaband?

"Það er best að vera 23 ára því þá er fólkið búið að þekkjast í heila eilífð." - Camille, 10 ára.

"Maður þarf ekki að vera á neinum sérstökum aldri, maður þarf bara að vera bjáni." - Freddie, 6 ára.

Hvernig sér maður hvort ókunnugt fólk sé gift?

"Maður verður bara giska út frá því hvort manni sýnist þau vera að æpa á sömu krakkana." - Derrick, 8 ára.

Hvað eiga foreldrar þínir sameiginlegt?

"Bæði vilja ekki eignast fleiri börn." - Lori, 8 ára.

Hvað gerir fólk á stefnumótum?

"Á stefnumótum á að vera gaman því fólkið er að kynnast hvort öðru. Meira að segja strákar geta haft eitthvað að segja ef maður hlustar nógu lengi. - Lynnette, 8 ára.

"Á fyrsta stefnumótinu lýgur fólk bara hvort að öðru og það er yfirleitt nóg til að það hafi áhuga á að hittast aftur." - Martin, 10 ára.

Hvað myndirðu gera ef þú færir á stefnumót sem endaði illa?

"Ég myndi hlaupa heim og þykjast vera dauður. Daginn eftir myndi ég hringja í öll blöðin og láta þau skrifa um mig í andlátsfréttunum." - Craig, 9 ára.

Hvenær er óhætt að kyssa einhvern?

"Ef hann er ríkur." - Pam, 7 ára.

"Það er bannað með lögum ef maður er ekki orðinn átján ára og það er ekki sniðugt að lenda í einhverju veseni út af því." - Curt, 7 ára.

"Reglan er sú að ef maður kyssir einhvern á maður að giftast honum og eignast með honum börn. Þannig á maður að gera." - Howard, 8 ára

Hvort er betra að vera einhleyp(ur) eða í hjónabandi?

"Það er betra fyrir stelpur að vera einhleypar en það er verra fyrir stráka. Það verður einhver að taka til eftir stráka." - Anita, 9 ára.

Hvernig væri heimurinn ef enginn giftist? (uppáhaldssvarið mitt)

"Það væri alla vega erfitt að útskýra alla þessa krakka." - Kelvin, 8 ára.

Hvernig á að viðhalda ástinni í hjónabandinu?

"Maður á að segja konunni sinni að hún sé falleg, jafnvel þótt hún líti út eins og vörubíll." - Ricky, 10 ára.

Tweet

Skin og skúrir

Veðrið hefur vægast sagt látið furðulega við landsmenn undanfarna daga. Eina stundina er sól og blíða en næst þegar manni verður litið út um skjáinn eru hvít snjókorn á þeytingi um loftin blá. Eða þá blanda af hvoru tveggja eins og akkúrat núna, heiðskýrt og skýjað, glampandi sól og snjókoma.

Gott dæmi um íslenskt veðurfar undanfarna daga kemur frá Pésa, frænda Baldurs. Hann settist út í blíðviðrið að morgni til með moggann og kaffi og var víst frjálslega klæddur. Þegar kaffið var uppurið fór hann inn að fylla á' ann (kaffibollann alt svo) og þegar hann kom til baka var skollinn á hríð! Án efa smá fært í stílinn en samt sem áður góð saga.

Ég held að þetta sé einmitt tækifærið til að grafa upp úr gömlum skruddum orðatiltæki á borð við: Það skiptast á skin og skúrir.

Tweet

Veðmál

Fimmtudaginn síðasta veðjaði ég í fyrsta skipti á ævinni að ég held, þ.e.a.s. fyrir peninga alla vega. Ég dró Baldur snemma heim um kvöldið til að geta fylgst með lokaþættingum af The Bachelor (skömm af því ég veit) og á leiðinni heim vorum við að velta því fyrir okkur hver myndi hreppa "hnossið", þ.e. piparsveininn sjálfan.

Ég var þess fullviss að Helene myndi verða fyrir valinu og þrátt fyrir að Baldur hafi verið sömu skoðunar vildi hann endilega gera þetta að veðmáli. Ég tók því og veðjuðum við upp á 1500 kall sem ég fengi í minn hlut myndi Helene vinna en Baldur ef Brooke yrði hlutskörpust. Og sjá, ég hafði rétt fyrir mér og nú er ég 1500 kalli ríkari sem ég má nota í hvað sem er. Þetta minnir mann bara á manns eigin piparsveinkutíð þegar ekki þurfti að leggja eyðslu manns undir einhvern annan :)

P.s. Mér finnst reyndar svolítið svindl að taka við þessum fjármunum því Aaron og Helene hættu víst saman fyrir áramót svo faktíst séð voru þau ekki saman þegar við vorum að fylgjast með rómantíkinni blómstra þeirra í millum. En ahh, ég læt mig samt hafa það.

Tweet

Rop

Fór að lyfta í dag með Ásdísi og tókum við handleggina. Þetta var pump æfing, þ.e.a.s. margar lyftur og tiltölulega létt lóð. Þegar lyftingarnar voru búnar hlupum við smá á bretti. Ég nýbúinn að uppgötva níu mínútna prógramm sem líkir eftir brekku og eykst hallinn stöðugt. Það er ómannúðlegt prógramm og skemmtilegt.

Einn fróðleiksmoli. Að rembast eins og rjúpan við staurinn, hvað þýðir það? Eða hvað er átt við? Það sagði Valgeir kunningi minn hér í skólanum mér. Þannig var nefnilega í fyrndinni að menn vildu veiða fálka og festu þeir rjúpur (lifandi) við staura sem beitu fyrir fálkann. Í nútímanum sleppir fólk þessu veseni (oftast) og étur rjúpuna bara sjálft eftir að hafa veitt hana (ef það nennir því þá). Svo eru það aðrir og enn gáfaðri sem sleppa því að veiða rjúpuna og éta hana og fara bara út í búð að kaupa gulrót :)

Tweet

Supplies

Hér sit ég uppi á bókasafni í VR2 og hlusta á dýrlega tónlist og er að hugsa um að læra líka. Morguninn hjá mér fór nefnilega að miklu leiti í kjaftagang. Hvern haldiðið að ég hafi hitt? Ég hitti Kristleif vin minn og félaga sem er mjög skemmtilegur og því var mjög skemmtilegt að hitta hann. Þannig að kjaftagangur var í góðu lagi.

Svo hef ég líka verið í beinu sambandi við bretónska garðyrkjubændur. Þaðan var allt gott að frétta, ég talaði við mömmu í þetta sinn og var mjög gott í henni hljóðið. Við Ásdís ætlum að heimsækja Bretanníufolöldin í sumar og hlökkum vægast sagt mikið til.

Kenavo!

Tweet

Ritgerðarskrif

Þessi önn fer í það að skrifa B.A. ritgerðina mína og hef ég nú þegar hafist handa. Reyndar hefur undirbúningur staðið yfir frá því í sumar því þá byrjaði ég á fullu að safna heimildum. Hins vegar gengur ekki eins vel að skrifa og að safna heimildum, ég þreytist mjög fljótt og missi áhugann enda gerir maður fátt annað en að sitja við tölvuna allan daginn. Ég myndi þó ekki segja að mér miði ekkert áfram því á þriðjudaginn skilaði ég inn uppkasti að fyrsta kafla en hann er um sögu fólksflutninga til Evrópu.

Eftir þessa törn var kominn tími á smá verðlaun og þar sem ég átti inneignarnótu í Mál og menningu fór ég rakleitt þangað enda er það uppáhaldsbókabúðin mín. Þessa dagana er afsláttur af enskum bókum en ég nýtti mér það þó ekki í þetta skiptið heldur keypti ég bókina um Fridu Kahlo á helmingsafslætti og las hana á augabragði. Mæli pottþétt með henni, sérstaklega fyrir þá sem hafa gaman af suður amerísku sögusviði.

Tweet

Pennaleti

Það er alveg ótrúlegt hvað maður getur verið latur við dagbókarskrif, en hér kemur smá öppdeit. Undanfarna daga hef ég verið að læra og lyfta. Lyftingarnar ganga mjög vel en lærdómurinn er ekki alveg á sama kalíberi. Þannig er nú það... Annars er allt alveg ágætt að frétta, bæ.

Tweet

Matarboð

Í gærkvöldi var stórt og veglegt matarboð í Hrauntungunni. Sem lystauka (forrétt) notuðum við matarlykt þar sem hún tekur ekkert pláss í maga, í aðalrétt var einfaldur pottréttur frá Asíu ásamt eggjum og að lokum var snæddur evrópskur eftirréttur. Svaka fínt! Það sem gerðist samt í raunveruleikanum var að við buðum Kjartani vini vorum í soðin hrísgrjón og egg og snæddum vínber í desert.

Tweet

Miðnæturblogg

Hvað á það að þýða að blogga svona seint? Eru Baldur og Ásdís komin með nettengingu heima eða er opið upp í skóla? Nei ástæðan fyrir því að ég blogga svona seint er sú að ég sit sem vaktmaður á fornum slóðum og fíla mig bara vel...

Tweet

Froskapartý

Við Ásdís vorum að koma úr tvöföldu afmælisboði frá Stellu og Kristjáni. Stella á afmæli í dag en Kristján átti afmæli fyrir fimm dögum. Til hamingju með afmælin kæru hjón!

Í morgun var ég í verklegri eðlisfræði að gera ljóstilraunir og að þeim loknum lagði ég af stað heim en komst ekki alla leið sökum yfirþyrmandi einmanaleikatilfinningar. Ég veit ekki hvernig ég á að segja það en ég læsti einn af mínum bestu vinum inni á tilraunastofu og lagði svo af stað heim.

Umræddur vinur losnaði svo ekki úr prísundinni fyrr en núna rétt áðan. Það er þó engin ástæða til að örvænta um vinskapinn því kaffibollar virðast vera fljótir að fyrirgefa.

Tweet

Megavika

Það er greinilegt að enn einu sinni er skollin á svokölluð megavika hjá Dominos. Og hvernig veit ég það?

Jú, sjáðu til, í gærkvöld fórum við upp í VR til að lesa og þegar við gengum inn í bygginguna var pizzafnykurinn svo stækur að við lág að maður snérist á hæl og læsi frekar úti í slyddunni og myrkrinu.

En við hörkuðum af okkur, mér tókst að kasta ekki upp og Baldri tókst að hemja garnagaulið. Það versta var að því ofar sem dróg varð lyktin stækari og stafar það af því að fólk borðar iðulega á efstu hæðinni fyrir utan bókasafnið.

Þegar heim var komið fórum við á smá kvöldrölt um hverfið þar sem við náðum ekki í sund. Við komum við í lítilli sjoppu til að kaupa mjólk og er þá ekki þessi sama pizzastybba þar og var í VR.

Ég hef sterkan grun um að starfsmenn sjoppunnar hafi falið nokkur tonn af mega pizzum í skonsunni bakatil en lyktinni héldu engin bönd og þannig komst upp um átveisluna. Við stoppuðum stutt við í sjoppunni og ég held ég borði ekki dominos á næstunni.

Tweet

Popp og kók

Nei, nei við fórum ekki í bíó í gær nema þá heimabíó í besta falli. Við erum nebbla enn að horfa á 8 seríu af Friends og eigum bara fjóra þætti eftir.

Nú, nú gærkvöldið var ekkert öðruvísi en önnur undanfarin kvöld að því leyti að við gláptum á 2-3 þætti af ofangreindri syrpu. Hins vegar tókum við upp á svolitlu sem við höfum, að ég held, aðeins einu sinni reynt áður, við poppuðum.

Og nú er ég ekki að tala um örbylgjupopp því ég held ég hafi klárað minn kvóta af því á unglingsárunum, heldur á ég við poppkorn að hætti 9. áratugarins, þegar við Baldur vorum enn pjakkar. Við poppuðum sem sagt í potti og sjá, það tókst!

Og svo átti ég hálfslítra kók inni í skáp sem Vífilfell gaf okkur stelpunum í styrk þegar við fórum til Grænlands (svolítið glatað ég veit haha) svo ég skellti henni bara í frystinn í hálftíma og viola: popp og kók.

P.s. Ég veit þetta hljómar furðulega en kókin var faktískt útrunnin, best fyrir 1. janúar 2003. En hver tekur svo sem mark á því, þetta er bara sykurleðja uppleyst í vatni, haha :)

Tweet

Vinir

Gærdagurinn var fremur vinalegur. Sunnudagar eru nú oft vinalegir en þessi var meira svona Friends-legur.

Eftir að hafa tekið ágætis tiltektartörn þá lögðumst við upp í sófa og horfðum á vini í tölvunni. Stella systir mín kom okkur nefnilega upp á lagið með þetta vinadót um daginn og nú er ég bara kominn svo vel inn í þetta allt saman að ég bara verð að verða vinsælli (þ.e. eignast fleiri þætti).

Ég segi nú bara eins og Bjarni vinur minn sagði: Hver þarf vini þegar hann á Vini? Nei heyrðu mig nú ég er ekki svo forfallinn.

Tweet

Hörkudjamm

Í gær fórum við Ásdís í fyrsta afmælispartý ársins. Það var haldið á Borginni og var afmælisbarnið Stella amma. Mætingin var góð, stemninging var góð og síðast en ekki síst voru snitturnar góðar.

Nú er ég staddur upp í skóla og ákvað að kíkja aðeins á vanræktu bloggsíðuna þar sem ég komst ekki í tímann sem ég á að vera í. Hvers vegna komst ég ekki? Það var einfaldlega ekki pláss í stofunni, en það á eftir að fækka í hópnum hvort sem er þannig að þetta er í orden. Af fenginni reynslu eru margir af fyrirlestrunum settir í of litlar stofur þar sem reglan er sú að færri sitja áfangana en skrá sig.

Tweet

Gleðilegt ár allir saman og takk fyrir gamla!

Síðan ég opinberaði mig sem möndlugrís þá hefur ýmislegt gerst, t.d. komu áramót og ég hef legið í leti heima að lesa ævisögu Tolkiens sem Ásdís gaf mér í jólagjöf :)

Í gær sáum við svo myndina Tveggja turna tal sem var mjög jákvætt. Við höfum nefnilega ætlað að fara áður en þá var uppselt.

Tweet

Ég er möndlugrísinn

Amma býr alltaf til svo góðan mat... Jahá!
Fyrir þá sem þekkja til þá er þetta einhver sannasti málsháttur í sögu mannkyns.

Ég og Ásdís erum í heimsókn hjá Pétri afa og Stellu ömmu, búin að borða og erum nú södd og sæl uppi í baðstofu að kjafta við afa. Á meðan sitja ærslafullir spilagrísir niðri og spila manna. Spilagrísirnir eru: amma, Stella Soffía og Kristján. En ég er ekki spilagrís í dag, ég er möndlugrís og möndlugrísir fá alltaf verðlaun þegar þeir eru búnir með grautinn sinn. :)

Tweet

Hjá Stellu og Stjána

Nú er ég ásamt Ásdísi í heimsókn hjá ofangreindum froskum. Það er alltaf gaman að heimsækja þetta fólk. Við komum hingað beint úr bæjartrafíkinni og hvað er þá betra en að sitja og sötra gott kaffi í góðum félagsskap.

Tweet

Jólastress á Þorláksmessu

Það er allt búið að vera á fullu síðan prófunum lauk. Við erum búin að kaupa jólatré, baða það og skreyta, búin að kaupa fullt af pökkum og versla inn allan jólamatinn. Síðan vann ég tvo miða á nýjustu Lord of the Rings myndina, The Two Towers.

Ég tók nebblega þátt í einhverjum netleik hjá Landsbankanum og síðan á laugadaginn fékk ég sent heim umslag með tveimur boðsmiðum og derhúfu. Baldur má eiga húfuna. En hann fær líka að koma með á myndina, hann er lukkunarpamfíllinn minn.

Í dag er planið að klára þessar örfáu gjafir sem eftir eru, pakka þeim inn og heimsækja síðan ættingja með það fyrir augum að láta þá fá pakkana fyrir jólin, það er svona skemmtilegra :) Þetta verður sem sagt svona skemmtilegt jólastress þar sem eina stressið snýst í raun um hvort við náum í laugarnar fyrir klukkan 18.

Gleðileg jól og takk fyrir hárið sem fer að svíða!

Tweet

Búinn í prófum

Fór í próf í nám og störf (klám og sörf) í rafmagns og tölvuverkfræði og nú get ég sagt að mér hafi gengið vel í prófinu. Trikkið var einfaldlega að sleppa allri fullkomnunaráráttu, læra mátulega mikið fyrir prófið og fara svo í prófið. Vildi að ég hefði fattað þetta fyrr. Anda inn, anda út, slaka á í öxlum og setja hendur á hnakka. Svo spennum við rasskinnarnar saman og lyftum okkur upp á tábergið og halda.......svoona og slaka.

Hérna er heimasíða með tilvitnunum í fyndna stelpu.

Kannski ég ætti bara að fara heim núna.

Tweet

Eðlisfræði

Gærdagurinn og dagurinn í dag eru helgaðir eðlisfræði, ég á nefnilega að fara í próf í henni í fyrramálið.

Tweet

Afslöppun

Við tókum því rólegar en við ætluðum í dag sem er kannski ekki það sniðugasta í prófvertíðinni. Það var samt ósköp ljúft að gera eitthvað annað en að rýna í fræðiskruddur, t.d. að rýna í Hringadróttinssögu. Ég er komin á annað bindi og er rúmlega hálfnuð með söguna. Svo er bara að klára áður en myndin kemur í bíó því ég er nokkuð viss um að Baldur ætli að draga mig með í þetta skiptið fyrst það tókst ekki í það fyrra.

Afslöppunin fóls þó ekki einungis í fagurbókalestri og táfettingum því Baldur kláraði að setja upp jólaseríuna sem ég vanrækti að gera í gær (þar slapp ég auðveldlega). Nú ljómar stofan af marglitri ljósaseríunni og íbúðin er hægt og bítandi að færast í jólabúning.

Á meðan hann dundaði sér við þetta saxaði ég niður smá grænmeti og útbjó mexíkanskan kvöldverð. Reyndar eldum við bara mexíkanskt á laugardögum en þar sem síðustu laugardagskvöldum hefur verið eytt upp í Odda eða VR II hefur ekkert orðið að neinni eldamennsku umfram það að ná í skyr eða jógúrt úr ísskápnum.

Tweet

Fyrsta prófið að baki

Nú línulega algebru prófið er liðið í aldanna skaut og (vonandi) aldrei það kemur til baka.

Tweet

Miðnætti

Ég er núna stödd upp í tölvuverinu í Odda og það líður senn að miðnætti. Það er frekar skrýtið að vera upp í skóla á þessum tíma sólarhrings, einhvern veginn er það ekki sú mynd sem maður hefur af skólahaldi í huga sér, hangandi þar fram eftir nóttu. Ég er að bíða eftir litla Baldrinum mínum, hann er að gera lokaatlögu að línulegri algebru fyrir prófið á morgun.

Loftið þarna frammi er lævi blandin og þar sitja nokkrir sveittir yfir power point glærum og maður veltir óneitanlega fyrir sér hvort þetta fólk sé svona rosalega samviskusamt eða bara svona svakalegir tossar sem ætlar sér síðan að vaka alla nóttina og reyna að koma einhverju inn í hausinn. Ég gerði það að hluta til fyrir stúdentsprófin, undir lokin var maður farinn að sofa ansi lítið en það er líka leiðinlegasta tímabil sem ég hef upplifað og mæli ekki með þessari lærdómsaðferð við neinn.

Ég var að koma af kveðjukvöldinu og það var mjög skemmtilegt. Það var mikið slúðrað um ákveðna aðila frá Grænlandi, Pamela neitaði að segja okkur svæsna sögu af einum Dana og einum Finna (sitthvort kynið) en þegar hún skrapp á klóið sætti Cyril færis og slúðraði í okkur öllum soranum.

Það var mikið um "oooooohh" og "jiiii", allt í innsoginu vitaskuld og einhverra hluta vegna var mikið rætt um Ástrali og þá staðreynd að ástralskir surfers hefðu lægstu greindarvísistölu heims. Uppi eru plön um að hittast næsta laugardagskvöld en það er nú spurning hversu upplagður maður verður í slíkt og annað eins. Til vonar og varar kvöddumst við því öll og nú er bara spurning að halda sambandi við þetta fólk.

Tweet

Fyrsta prófinu lokið

Þá er ég búin með fyrsta próf þessa vetrar og það næsta er ekki fyrr en þann 16. Ég hef því nægan tíma til að láta mér leiðast að lesa undir próf í eigindlegum en þess á milli verð ég að vinna í ritgerð sem ég á eftir að skila fyrir leskúrsinn.

Í kvöld ætla ég hins vegar að slappa af og hitta stelpurnar ásamt krökkunum frá Grænlandi. Þessir krakkar eru allt skiptinemar hér og eru að fara heim fyrir jólin svo þetta er svona kveðjuhóf.

Annars langar mig líka ósköp mikið að fara heim og klára að setja jólaseríuna í stofugluggann. Við Baldur gerðum heiðarlega tilraun til þess í síðustu viku en gáfust upp þegar við vorum farin að æpa á hvort annað í pirring okkar og vonsku. Aldrei að reyna að festa jólaseríu með límbandi, það er ekki góðs vísir. Ég ætla því að fara í Rúmfatalagerinn, kaupa þessa glæru tappa sem þeir eru sí og æ að auglýsa, fara síðan heim og festa upp seríuna sem þurft hefur að dúsa í glugganum eins og illa gerður hlutur, hálfuppsett og ekki einu sinni kveikt á greyinu.

Tweet

Próf, próf, próf...

Nú er Ásdís farin í fyrsta prófið sitt og ég sit upp á bókasafni og undirbý mig fyrir fyrsta prófið mitt. Þetta er ekki bara fyrsta prófið mitt á þessari önn heldur líka fyrsta prófið mitt í verkfræðinni... Jæja upp að reikna. Bæ!

Tweet

Jólatónleikarnir

Ég var að koma af tónleikunum og tókust þeir vægast sagt frábærlega vel. Ég þurfti nú ekkert að grennslast fyrir um hvernig þetta tókst því það sást einfaldlega á því hvernig Jón stjórnandi geislaði af ánægju og ágætt að geta sér til um frammistöðu okkar út frá því.

Það er alveg magnað hvað það er alltaf gaman að syngja og sérstaklega á tónleikum. Þó maður sé jafnvel kominn með nett nóg af sumum lögum á æfingum þá eru tónleikar alltaf blast. Það er líka svo gaman á jólatónleikum því þá koma professional einsöngvarar til okkar. Í fyrra var það Ólafur Kjartan og nú var það Diddú. Það er frábært að fá tækifæri til að vinna með söngvurum á þeirra kalíberi.

Tweet

Að vera línulega háður

Dagurinn í dag er helgaður fyrirlestrum í línulegri algebru. Það er þó ekki svo að það séu enn fyrirlestrar á vegum verkfræðideildar HÍ, sem kæmi að vísu ekki á óvart. Nei ég hef legið á netinu og horft á myndbandsupptökur úr kennslustundum hjá Gilbert Strang í MIT.

Ég er nú orðinn svolítið kassaður af þessu öllu en það eru nú einu sinni að koma próf!

Áðurauglýstirháæruverðugir tónleikar eru annað kvöld klukkan 20:00 og er aðgangseyrir 100.000.000.000 í núllta veldi sinnum núll deilt með einum krónur. Í styttra máli það er ókeypis á tónleikana.

Tweet

Liggaliggalái 2

Myndin var þrælfín. Ekki veit ég hvað hún var löng en hún var að minnsta kosti nógu löng til þess að mér tækist að sofa yfir mig í morgun. Þannig að nú þarf ég að halda vel á spöðunum því ég svaf líka yfir mig í gær...

Tweet

Liggaliggalái

Við erum að fara að sjá Harry Potter 2 og ég hlakka ógesslega mikið til. Vildi bara láta vita, við erum svo öfundsverð af þessu, thí hí :)

Jæja, myndin byrjar eftir 14 mínútur, best að hætta öllu bulli og hlaupa út í Háskólabíó. Ciao.

Tweet

Leiðrétting

Reyndar voru skiladæmi 2. desember.

Ég var sallarólegur og nýbúinn að blogga þegar ég fattaði að ég hafði litið á vitlaust vikublað. Auðvitað eru ekki skiladæmi í næstu viku (nema próf séu skiladæmi). Ég náði með ótrúlegri færni að reykspóla af stað í fimmta gír og klára öll dæmin (af miklu öryggi) og það á þokkalegum tíma.

Ég minni alla á jólatónleikana sem ég man ekki klukkan hvað eru á sunnudaginn í Hjallakirkju. Þar verða stórsöngvarar í massavís t.d. Baldur, Biggi, Hákon og Diddú svo einhverjir séu nefndir.

Tweet

Engin skiladæmi

Ég vil byrja á því að þakka síðasta ræðumanni fyrir næstnýjustu ræðu sína og taka hraustlega undir það að Veislan hafi verið frábær.

Í dag þarf ég ekki að skila dæmum í línulegri algebru, jibbí! Þannig að það er eins gott að blogga smá. Um helgina kláraði ég lokaskýrsluna í verklegri eðlisfræði, sem er mjög gott. Þá þarf ég ekkert að pæla í eðlisfræðiskýrslum fyrr en eftir áramót.

Til hamingju með gærdaginn Íslendingar!

Í dag hefst formlega (trommuþytur...........drrrrrrrrr...lúðrar.........dadaaaa) prófundirbúningu oooog (meira af lúðraþyt) upprifjun ooog (Monty Python andköf....og smá músíkk úr mynd með Vincent Price....+spangól) smá frumlestur.

Mig langar til að minnast á það strax áður en ég gleymi því að það eru tónleikar hjá mér næsta sunnudag í Hjallakirkju og ég geri fastlega ráð fyrir góðri stemningu.

Tweet

Fyrsti í aðventu

Í dag er fyrsti í aðventu og það hlýtur að þýða að maður sér farinn að venta paa julen. Mér varð það ekki ljóst fyrr en í gærkvöld hvað tíminn hefur flogið hratt og að desembermánuður væri alveg á næsta leiti.

Ég skreið því undir rúm til að ná í jólaboxin góðu en í þau höfðum við troðið öllu jólakyns eftir síðust hátíð. Ég fann þar í jólaföggunum aðventuljós og setti það upp í glugga og tendraði við mikinn hátíðleik. Í morgun hélt ég svo áfram að grúska í þessum kössum og fann þar jólaskraut á ísskápinn og jólakertastjaka. Ég fann þessu viðeigandi stað og lét þar staðar numið.

Ætlunin er að hengja upp smá jólaskraut á hverjum degi en ef ég þekki mig rétt þá mun þetta að öllum líkindum verða skorpuvinna því ég á það til að gleyma þessu og man það síðan þegar komið er fram í miðjan mánuð.

Í dag ætlum við Baldur að taka okkur frí frá skýrslugerð og tölvupikki til að versla inn nokkrar jólagjafir. Við ætlum að kíkja í Kolaportið og ég hlakka mjög til því þangað hef ég ekki komið í háa herrans tíð. Ég ætla líka að draga hann með mér í Blómaval til að kaupa leir, kerti og greni svo ég geti útbúið aðventukrans.

Vá, jólin eru virkilega á leiðinni!

Tweet