boring

Fyrir allnokkru gekk ég til náða. Það gerði ég af því að það er próf á morgun. Ég er ekki sofandi eins og oftast á þessum tíma sólarhringsins heldur er ég andvaka og það er voða gaman. Það hafa nú svakalegri hlutir gerst. Til dæmis var skúringakona étin í næsta húsi nýlega. Alveg ferlegt, eins gott að ég er bara vaktmaður.

Úr því að ég er vakandi þá er ég að hugsa um að læra þangað til ég verð syfjaður og kannski fjölyrða um það á vefinn. Hver veit?

Tweet

Stjórnun að baki

Já nú er prófið í stjórnun að baki. Var bara að koma úr því í þessu. Ekki þýðir það samt að stríðið sé búið, ooo seiseinei. Næst er það þjóðhagfræðin hjá manni sem er háll sem áll, enda heitir hann Axel Hall. Hall er sennilega alþjóðlegt orð fyrir háll. Ætli það sé nokkuð vit í að segja meira, Axel gæti kíkt á dagbókina en það má hann ekki fyrr en eftir prófið.

Tweet

Lesilesilesilesi

Sit heima, les þjóðhagfræði og hlusta á Brahms. Nánar tiltekið er ég að lesa Mankiw og hlusta á ungverska dansa. Ekki er nú sami stíllinn á mér og í gærkveldi þegar ég ásamt Ásdísi og Pétri afa snæddi dýrindis forsetafisk. Nú eru það bara salthnetur, sólblómafræ hörfræ og vatn. Einfalt en næringarríkt og tekur engan tíma frá lestrinum. Kannski maður gefi sér nú samt tíma í alminnilegan kvöldverð á eftir.

Notalegt að sitja inni og blogga meðan Kári lætur móðann mása úti í bleytunni, ahh. Kannski maður bruggi sér bara smá te í múmínbollann sinn, ekki bagalegt og stíllinn kominn á rétt ról.

Tweet

Reikningshaldsverkefni skilað
Í gær kvaddi ég Hrapp og Skell með pompi og prakt. Kveðjustundin var magnþrungin og mikill léttir að vera laus við þá félaga. Þetta var síðasta verkefni annarinnar svo nú er próflestur hafinn.

Tweet

Jólastúss

Hið árlega jólastúss var tekið með trompi í dag. Við fórum í heljarinnar verslunarleiðangur í Kópavoginn, Smárann og Smáralindina nánar tiltekið, og keyptum nokkrar jólagjafir, fengu hugmyndir að enn öðrum gjöfum, keyptum svo jólapappír, borða og hnotur (sem Baldri finnst afskaplega fyndið orð).

Svo fórum við niður í geymslu (yndislegt fyrirbæri) og náðum í jólahjólakassana sem geyma allt jólaskrautsdótið okkar. Rétt í þessu vorum við að klára að setja upp jólaseríuna og þökk sé sogtöppunum sem keyptir voru í fyrra varð ekki um neinn pirring að ræða við að setja upp blessuð ljósin. Því er stofan okkar núna böðuð marglitri birtu og eldhúsið er sem áður rauðglóandi.

Og núna kemur að verðlaununum fyrir að standa okkur svona vel í dag: Jarðarber og bláber með miklum rjóma á meðan við horfum á hina frábæru grínmynd Christmas Vacation með Chevy Chase. Ohh, það verður sko gaman!

Tweet

Einn góður

Dyggasti lesandi dagbókarinnar sendi okkur þennan brandara áðan. Ég má til með að droppa honum á netið.

Nonni litli er í sjötta bekk grunnskóla. Dag einn var samfélagsfræði og þá spurði kennarinn hvað feður þeirra störfuðu.

Börnin svöruðu eins og þeim er lagið: Pabbi minn er lögga, brunaliðsmaður, skrifstofumaður, vinnur í verslun og svo framvegis. En kennarinn tók eftir því að Nonni litli var óvenju hljóður og lét lítið fara fyrir sér.

Hvað gerir svo pabbi þinn, spurði kennarinn Nonna litla.

Hann dansar nakinn fyrir framan karla á öllum aldri á veitingastað á kvöldin og á næturnar. Svo græðir hann fullt á því að fara með þeim áhorfendum sem best bjóða út í portið á bak við veitingastaðinn þar sem hann dansar einkadans fyrir þá í nokkrar mínútur.

Kennarinn varð eðlilega mjög undrandi yfir svari Nonna litla og í miklu fáti skipaði hann hinum krökkunum að fara að lita, en Nonna litla tók hann afsíðis.

Er þetta alveg satt sem þú sagðir um hann pabba þinn ... dansinn og allt það? Nei, nei, sagði Nonni litli feiminn. Pabbi vinnur hjá Kaupþingi-Búnaðarbanka en ég þorði sko alls ekki að segja það fyrir framan hina krakkana.

Tweet

Me like

Áðan hringdi Ásdís í mig og sagðist vera komin heim. Ég var steinhissa því hún hafði ætlað að droppa við hjá mér.

Nú er ég kominn heim og mér líkar vel við jólapúkann Ásdísi.

Tweet

Þjófstartað

Ég er nú meiri púkinn. Ég sagðist ætla að koma við upp í Odda á leið minni heim frá Bókhlöðunni svo við Baldur gætum verið samferða heim. Í staðinn arkaði ég bara beint heim og setti upp litla, míni jólaseríu. Já, ég veit ég ætlaði að bíða þar til á morgun en ég bara gat það ekki!

Ég setti litla, sæta, rauða seríu á eldhúsinnréttinguna og nú rauðglóir eldhúsið í skammdeginu. Mjög kósý. Nú er bara að sjá hvað Baldri finnst, hann veit nefnilega ekki af þessu þjófstarti mínu ennþá. Ætli hann sé tilbúinn að fara í jólaskap eins og ég?

Tweet

Enn að

Enn er unnið að lausn reikningshaldsverkefnisins. Hvernig ætli það sé að vera hugmyndaríkur jarðvöðull? Ég varpa þessari spurningu einfaldlega til að nota þetta sérdeilis svala orð.

Ég er ekki alveg viss um hvað reikningshaldskennarinn minn, hann Bjarni, átti við en ég held hann hafi verið að tala um brautryðjendur.

Tweet

Styttist

Í morgun var ég að renna yfir atriði síðustu vikna í stærðfræðinni. Upprifjun. Nú er nefnilega komið að síðasta hlutaprófi annarinnar í stærðfræði og jafnvel þótt víðar væri leitað.

Það styttist í kennslulok, þar með styttist í lokapróf og á eftir þeim kemur jólafríhíhí!

Tweet

zzz...

Ó mig auma, ég er enn á fótum og sjáið bara hvað klukkan er! Ég er enn upp á skrifstofu á Hótel Sögu og klukkan er að ganga þrjú. Sem þýðir að ég á eftir að labba alein heim í kuldanum og myrkrinu (sniff).

Annars er ég búin með ritgerðina mína fyrir hnattvæðingarkúrsinn sem ég á að skila á morgun og það er frábær staðreynd sem ég fíla :) Það þýðir að ég get strax í fyrramálið hafist handa á seinstu ritgerðinni minni :( - ekki svo skemmtileg tilhugsun. Jæja, ég get huggað mig við það að þegar henni er lokið má ég byrja að jólaskreyta og ef það er ekki huggun harmi gegn þá veit ég ekki hvað.

Úpps, klukkan meira gengin í þrjú, best að haska sér af stað út í þetta hvíta, kalda, mjúka... hvað kallast þetta aftur? Mér hefur verið tjáð að þetta hafi ekki sést á götum eða himni borgarinnar síðan á síðustu öld. Einhverra hluta vegna er ég farin að syngja jólalög. Jæja, og nú heim!

Tweet

Ritgerð, ritgerð og... jú ritgerð

Læt loks í mér heyra. Hef verið ansi upptekin þessa önn enda fyrsta önnin í meistaranámi svo það er vissara að hafa nóg fyrir stafni, annars er eitthvað mis :)

Hef setið sveitt (ja... kannski smá ýkjur) við undanfarna daga að klára ritgerðir eins og þorri annarra háskólanema geri ég ráð fyrir. Kem til með að skila þeirri fyrstu eftir nákvæmlega 27 mínútur og er sátt við hana. Á morgun á svo að skila annarri ritgerð (ekki búin með hana) og á föstudaginn rétt fyrir kl. 11 að morgni verð ég laus allra mála vona ég þegar seinasta ritgerðin rennur úr hlaði.

Jæja, læt þetta duga í bili af námsfréttum - vonandi heyrið þið aftur í mér fyrir jól!

Tweet

Hrappur og Skellur

Þessa dagana er ég að vinna í síðasta skilaverkefni annarinnar. Verkefnið er í reikningshaldi og tryggir manni próftökurétt auk þess að vera ágæt æfing.

Ekki eru viðskiptamennirnir í verkefninu félegir. Fyrirtækin heita t.d. Hrappur, Skellur og Sandkastalinn. Ekki þarf að spyrja að því að Hrappur ehf. skuldar mér. Í Lögbirtingarblaðinu var hann svo listaður upp ásamt öðrum vandræðagemsum og kom þar fram að engar eignir hefðu fundist í búinu að lokinni skiptameðferð. Eru þetta einhverjir Glistrup gæjar? Hrappur, ef þú lest þetta þá skaltu vita að enginn svíkur Baldur í Líf og leik ehf. Enginn!

Þetta var aðeins hættulaust útsýnisflug. Vonandi voru allir með beltin spennt en hafi einhverjar les-endur orðið fyrir óþægindum undanfarnar tvær mínútur eru þær beðnar velvirðingar. Það sem við flugum yfir var hin sandblásna og sýrubaðaða eyðieyja Reikningshald 1. Vonandi nutuð þið ferðarinnar, takk fyrir.

Tweet

Ýmislegt

Allt gott af okkur. Keyptum tölvu í gær, alltaf gaman að fá eitthvað nýtt. Þessa dagana höfum við verið dugleg að fá okkur eitthvað nýtt, fengum okkur líka smá kommóðu í ganginn og nýja mottu. Þannig að síðan ég bloggaði síðast hef ég lítið gert annað en að læra og eyða, djók.

Þetta er fínt allt saman. Er að verða búinn í vinnunni, smá trafík hér í dag, fólk duglegt að vinna. Gott hjá því. Jammajammíjamm og góða nótt bara.

Tweet

Uppgjör virðisauka

Jæja, búinn með megnið af reikningshaldi dagsins. Þá er líklega best að skella sér niður á kaffistofu og smjatta á smá ma-kríli. Að öllum líkindum mun ég svo halda aftur upp stigann og gera upp fleiri vaskreikninga eða eitthvað í þeim dúr. Í dag er nefnilega reikningshaldsdagur :)

Tweet

Alls engin pattstaða

Í morgun ætluðum við að fara að lyfta en hættum við. Ástæðan fyrir því var sú að þegar við stilltum vekjaraklukkurnar í gærkveldi þá gleymdum við að reikna með tíma í að hjóla því við erum ekki enn búin að fara að láta tékka á bílnum. Ekki var nú málið svo alvarlegt að við værum í pattstöðu. Nei, aldeilis ekki! Við tókum bara fram útiskóna og skelltum okkur í hálftíma kraftgöngu.

Vegna forfalla í morgun verður farið að lyfta í fyrramálið, sama hvað.

Tweet

Harkan sex

Jæja, hálfur mánuður eftir af kennslunni. Er uppi í skóla núna eins og ég mun sennilega verða alla næstu daga. Maður verður að sýna smá úthald á endasprettinum. Er það ekki?

Tweet

Hábeinn

Í dag fótbrotnaði ég ekki (so far) og var svo heppinn að fá ekki hjartaáfall í prófi. Þetta segi ég að gefnu tilefni. Ég er svo ári jákvæður gæji.

Í gær var ég heima að læra fyrir prófið og eftir ákveðinn tíma ætlaði ég að skella mér í krossapróf á netinu. Þá ákvað tölvan að fá það sem ég kalla taugaáfall dauðans. Þar sem tölvan virkaði ekki og ég var hættur að virka að mestu leyti spurði ég Ásdísi hvort hún væri ekki til í stuttan labbara.

Hún stakk upp á sundferð og fannst mér það vera snjallræði svo við bara stukkum út í bíl og... ...hann var rafmagnslaus. Á þessu augnabliki áttaði ég mig á því að einhver eða eitthvað hlyti að hafa ansi fastmótaðar hugmyndir um að ég skyldi sitja heima og læra the good old fashion way. Svo ég bara gerði það og hafði gaman af.

Eins og fram hefur komið er ég alheill og sæll. Það eina sem hefur breyst eru aðstæður. Ég er nú almennt svo heppinn að Hábeinn heppni ætti að öfunda mig, t.d. gengur hann um allt buxnalaus og enginn bendir honum á það. Það myndi nú teljast fremur óheppilegt í voru samfélagi.

Tweet

Allt annað líf

Síðast þegar ég bloggaði þá vorum við nett. Nú erum við orðin nettari. Nettengingin hefur að vísu ekkert breyst en vinnuaðstaðan hefur batnað til muna. Undanfarið höfum við haft japanska vinnuaðstöðu, þá á ég við að til þess að hafa skjáinn í skikkanlegri vinnuhæð var gólfið besti kosturinn til setu.

Þessu kipptum við hins vegar í liðinn í gær og keyptum netta einingu sem hentar vel, sérstaklega ef manni finnst betra að sitja í stól. Nú sit ég í stól og blogga og lyklaborðið er ekki á lærunum á mér heldur á borði fyrir framan mig. Allt annað líf!

Ég er orðinn frekar þreyttur á þessari færslu þar sem bloggerinn vill ekki virka rétt. Það var einhver viðbót hér en þið missið bara af henni í bili.

Tweet

Nett

Nú erum við nett. Eins og flestir vita þá lagaði ég tölvuna okkar um helgina og nú erum við nett. Nett hvað? Þetta er nýtt slanguryrði sem ég ætla að innleiða í okkar ástkæra ylhýra mál. En hvað þýðir það?

Kommoon, það er stytting á nettengd, nettengdur og svoleiðis. Nú þegar maður er orðinn nettur má búast við því að maður verði meiri þátttakandi í samfélaginu og kynni sér oftar hvað sé á seyði á t.d. mbl.is.

Tweet

Mikið fjör

Við náðum á fyrirlesturinn hans Attenborough og ekki nóg með það heldur hittum við gaurinn og fengum eiginhandaráritun. Fyrirlesturinn var mjög skemmtilegur og var í raun bara heppni að við skyldum komast inn. Líklega hefði verið eðlilegra að halda þetta í Háskólabíói þar sem margir fóru fýluferð. Fyrirlesturinn endaði á umfjöllun um paradísarfuglinn sem er sennilega eitt svalasta dýr jarðar, þvílíkir töffarar!

Eftir fyrirlestur og áritun hittum við svo Stellu Soffíu og fengum hjá henni tvær myndir og geisladisk. Líklega hefur Stella smitað mig af vírus sem er víst að gera út af við heimsbyggðina. Ég held að ég sé með krónískt tilfelli og ætla ekki að reyna neinar lækningaaðferðir. Mér er sagt að það sé hægt að lifa með þessu ansi lengi.

Tweet

Bara að pæla

Hvað var Paltrow eiginlega að hlusta á? Ég held ég láti það vera í bili.

Tweet

Stjórnleysið algjört

Nú verður tíminn að enda. Ég er svo svangur... Í augnablikinu held ég að maginn á mér sitji við stjórnvölinn. Ég veit þetta hljómar fjarstæðukennt fyrir þá sem þekkja mig vel.

Matur, matur, maaaatur. Einhversstaðar las ég að til að borða fíl þá sé best að taka einn bita í einu. Í augnablikinu vil ég fá einn fíl í einu, takk, með smjöri og kartöflum.

Tweet

Stjórnun

Nú sit ég í stjórnunartíma. Líklega er það ákveðið stjórnleysi að vera að blogga í miðjum tíma en það er nú í lagi. Sem stendur er kennarinn, hún Inga Jóna, að tala um væntingakenningar og umbun.

Næstu dagar munu mjög sennilega fara í að vinna lokaverkefni í stjórnun 1. Ætli maður þurfi ekki að temja sér eitthvað af kenningum um markmiðsbundna stjórnun áður en maður ræðst út í svona hópverkefni? Sennilega væri það ekki verra.

Nú er hún að tala um framlag og afrakstur. Ég er hættur að blogga í bili og fer aftur að glósa. Síjúleiter.

Tweet

Lyftingar og skóli, það er lífið

Var að koma úr Reikningshaldstíma og ákvað að droppa inn smá færslu. Allt er gott af okkur að segja. Lyftingar og skóli ganga samkvæmt áætlun. Í kvöld ætlum við í bíó. Ég veit ekki hvaða mynd við ætlum að sjá.Við fengum boðsmiða svo það er best að skella sér.

Það er kominn vetur og líklega er best að ég fari og kaupi sköfu fyrir bílinn. Ekki ætla ég að fjölyrða meira um hvunndaginn, hann rokkar ágætlega óstuddur og án málalenginga. Ég kýs að ganga út í hann, svangur (það stendur til bóta) en bjartsýnn.

Tweet

Flöbbur

Í gærkvöldi fengum við pizzu hjá Elfari. Við vorum ekki í neinu eldustuði þannig að einhver á einhverjum pizzastað bjó til fyrir okkur pizzur. Í hádeginu í dag fengum við okkur svo afganginn af pizzunum. En nóg um pizzur gærdagsins. Tölum um pizzur dagsins í dag. Líklega haldið þið að ég sé orðinn geðveikur en við ætlum að baka tvær pizzur í kvöld. hahahhhaha! Sagði einhver pizzah? Íííík!

Einhversstaðar heyrði ég pizzur kallaðar flatbökur sem þróaðist út í flöbbur. Það sem eftir lifir af þessari færslu verður talað um flöbbur og nú er hún búin :)

Tweet

Hvað er á seyði?

Í gær var frí í stjórnun og í dag er frí í þjóðhagfræði. Ég ætla sannarlega ekki að láta mér leiðast eða setjast stúrinn og vorkenna sjálfum mér. Nehei! Ég ætla að vaða í námsefnið með penna fyrir lensu og vitsmunahroka sem skjöld.

Spurning hvort ég klæðist hefðbundinni riddarablikkdós, tarzan skýlu eða fjölbragðaglímuaxlabandagalla... Ég held að vitsmunahrokinn sé fremur stökkt efni í skjöld svo ég finn eitthvað annað.

Tweet

Karrý

Síðan síðast hefur ýmislegt gerst. Í beinu framhaldi af síðustu færslu er eðlilegast að segja að rétturinn sem við smökkuðum, kjúklingabaunakarrýréttur, var frábær. Ég hef reyndar fundið fyrir örlitlum ófrómleika í hálsinum en líklega væri hann meiri ef ekki hefði komið karrýið.

Lífið á görðunum gengur ágætlega og virðist partýhald vera á undanhaldi (eða undanhald á partýhaldi?). Líklegt þykir mér að eftir því sem líði á önnina fækki partýum, mesti galsinn renni af hinum villuráfandi sauðum og skyldur hvunndagsins taki við. Hver veit svo nema búfénaður sá sem minnst var á læri til stafs og taki jafnvel jólapróf í ýmsum greinum. Vonandi gengur öllum bara vel.

Tweet

Hverfandi líkur á ófrómleika

Um daginn fór Ásdís í Hagkaup og keypti nýju bókina hennar Sollu, Grænn kostur Hagkaupa. Bókin er prýdd sérdeilis fallegum myndum af mörgum girnilegum réttum. Ljóst er að ómögulegt er að þjást af ófrómleika ef matur af þessu tagi er etinn reglulega. Við ætlum að prufa eina uppskrift í kvöld.

Orðið ófrómleiki var notað í þessari færslu. Líklega tók enginn eftir því þar sem orðið flokkast undir selfölgeligheder. Reikningshalds-kennarinn minn notaði þetta orð í tíma um daginn og fannst mér að þarna væri á ferðinni svalt orð. Ég bara varð að nota það.

Tweet

Á gervihnattaöld

Það er nú meira! Ég bara skil ekki hvers vegna kvörtunum rignir ekki inn. Hmmm... Það er nefnilega þannig að þann tíunda október síðastliðinn átti Smáralind tveggja ára afmæli og ég bara minnist ekki á það fyrr en núna!

Það sem er svona merkilegt við afmæli reðurtáknsins ógurlega er að forráðamenn þess ákváðu að opna það sama dag og við opnuðum dagbókina :)

Tweet

Rocksolid stagfræðingur

Jæja nú er vinnuhelgin að enda. Hef haft það fínt hérna og tekið á móti mörgum og góðum gestum. Af vinnuhelginni tekur svo við ein samsoðin massalestrar og lærdómsvika. Það er því eins gott að halda vel á laufunum og gerast gegnheill í stagfræðinni :)

Tweet

Allir í stuði

Var að koma úr tíma í reikningshaldi. Er nú staddur á Bókhlöðunni, ákvað að skila bók sem ég var með í láni. Eins gott að nýta ferðina í smá blogg. Nenni þó ómögulega að vera með einhverja tölu. Kæru lesendur þið vitið þá í það minnsta að ég er enn á lífi.

Tweet

Stagfræði

Er staddur í bókhlöðunni. Liggja nú fyrir verkefni í hagfræði og stærðfræði. Líklegt er að ég verði hagstærð, hægfræðingur eða stagfræðingur í lok dagsins. Til þess þarf ég líklega að halda betur á spöðunum en góðu hófi gegnir.

Lífið á görðunum gengur ágætlega og er elsku besta rútínan mín alveg að fara að jafna sig á því sjokki sem hún varð fyrir í flutningunum. Ef að líkum lætur verður næsta vika eðlileg. Í það minnsta eins eðlileg og unnt er ;)

Tweet

Staðan betri en menn höfðu vonað

Jammjamm. Nú eru flutningar með öllu afstaðnir og að mestu búið að koma sér fyrir. Þáðum ís og spjölluðum við Eygló og Magga í gærkveldi og lékum okkur við kettlingana. Einn þeirra heitir Jónatan og hann er óskaplega hændur að mér, steinsofnaði hjá mér og allt. Kettlingar eru frábærir.

Auglýstum ísskápinn í Fréttablaðinu í dag og seldum þeim fyrsta sem hringdi. Þannig að ef þú, lesandi góður, varst að pæla í að kaupa hann þá þarftu að tala við einhvern annan en okkur.

Næstu dagar fara í að koma sér aftur á rétt ról í skólanum, hlutirnir fara óneitanlega úr skorðum þegar allt fer á annan endann. Reyndar vill svo fruntalega heppilega til að fyrir flensu og fyrir flutninga var ég þokkalega á undan áætlun svo þetta er nú þó nokkuð fjarri því að vera óvinnandi verk :)

Ef einhver er hissa á fyrirsögninni þá er það ágætt. Ég var ekki viss hvað ég ætti að setja svo ég setti þetta.

Tweet

Umræðutími

Var að koma úr umræðutíma í stjórnun. Gekk geðveikt vel, enda heitir hópurinn okkar Besti hópurinn, rís meira að segja undir nafni (hehe). Það var einmitt frekar fyndið um daginn þegar kennarinn, Vilborg, var að lesa upp hópana. Hvar er besti hópurinn? Ég sá að alla langaði að svara en við vorum besti hópurinn og vorum þau einu sem þorðu að hlýða því kalli.

Tweet

Vantar einhvern ísskáp?

Nú erum við búin að taka upp úr aðalkössunum, búin að flytja lögheimilið, búin að kaupa þau húsgögn sem vantaði mest. Eldhúsborðið, stólana og hillurnar fengum við í Ikea. Við settum líka upp Lundia eininguna okkar en þurftum að kaupa svona krossasystem til að hún geti staðið sjálf, það má nefnilega ekki skrúfa neitt í veggina í þessari ágætu íbúð.

Ég sit nú í vinnunni en Ásdís stendur í eftirmálum flutninga.

Ef einhvern vantar fínan ísskáp þá ætti sá hinn sami að hafa samband við mig eða Ásdísi.

Tweet

Flutt! (story of my life)

Fengum íbúðina afhenta degi fyrir tímann svo gærdagurinn, sem átti að fara í að pakka, fór í það að flytja allt saman yfir á nýja staðinn. Við fengum frábæra hjálp frá góðum ættingjum. Pétur afi ferjaði allt matarbúrið okkar, mamma þreif ísskáp og raðaði í skápa og pabbi og Andri komu á stóra trukknum frá JB og þeir ásamt Balduro mio mössuðu rúminu, sófanum, kommóðunni og öllum þessu stóru hlutum úr Hrauntungunni yfir á Eggertsgötuna. Við fylltum heilan sendibíl af dótinu okkar og þá blöskraði mér alveg, hvernig er hægt að eiga svona mikið drasl/dót?

Við vöknuðum svo í nýju íbúðinni í morgun og það var ágætlega góð tilbreyting að vilja ekki fara fram úr rúminu af því það var svo svalt í herberginu. Það er sem sagt gluggi á svefnherberginu og hann virkar!

Við erum þó langt frá því að vera búin að koma okkur fyrir, allt er enn í kössum og maður var ansi ringlaður í morgun, gramsandi í kössum eftir mat í svangan malla. Ég endaði á því að borða sem minnst (er haldin maníum eins og æ, ég nenni ekki að borða) og dreif mig út í Odda til að komast á netið og sjá hversu ómissandi ég var þennan eina dag sem ég komst ekki á netið.

Í tölvuverinu fékk ég óvæntan morgunverð, jarðarberja ab-mjólk sem ein stelpan, sem sat við hliðina á mér, missti yfir alla höndina á mér. Í staðinn fyrir að sleikja hana upp og fá smá næringu fannst mér réttast að þrífa hana af, ég held að flestir hefðu gert það :)

Í dag setjum við síðan markið á að versla húsgögn. Okkur vantar nebbla eldhúsborð og stóla, bókahillur og aðstöðu fyrir tölvuna. Svo væri skemmtilegra að hafa gardínur í gluggum.

Og svo ætlum við að skipta um lögheimili og póstfang og þannig kveðja Húsavík (hahahahaha).

Tweet

Pamfílar -framhaldið

Hver man ekki eftir hinum dularfulla lista sem nefndur hefur verið hér á heimasíðunni oftar en í tvígang. Við vorum á þessum lista til að fá íbúð á Stúdentagörðum. Hann heyrir nú sögunni til. Ástæðan fyrir því er góð og gild. Í gær var hringt í Ásdísi frá Stúdentagörðum og henni tilkynnt að íbúð hefði losnað sem hentaði okkur.

Við skunduðum til að skoða íbúðina um ellefuleytið, leist vel á og skráðum okkur hana. Við áttum alls ekki von á að þetta myndi ske fyrr en um áramót þar sem við vorum enn í tíunda sæti. Svona er það nú bara hjá pamfílunum.

Við fórum því í 10-11 og fengum fullt af kössum og erum byrjuð að pakka smá. Það eru nú samt blendnar tilfinningar sem fylgja þessu öllu saman því ekki eru nágrannar eins og Eygló og Maggi á hverju strái. Maður vonar bara það besta og smælar framan í heiminn. Því eins og meistari Megas sagði réttilega: Ef þú smælar framan í heiminn þá smælar heimurinn framan í þig.

Tweet

Lukkunar pamfílar

Á laugardagseftirmiðdag vorum við heima að ganga frá í rólegheitunum þegar síminn hringdi. Var það María, frænka Ásdísar, að bjóða okkur í leikhús. Það er nú ekki alveg á hverjum degi sem manni er boðið sisona og ekki þarf að taka fram að við þáðum miðana með þökkum. Í leikhúsinu skemmtum við okkur konunglega, enda ekki annað hægt þegar Erling er annars vegar.

Í gær stóðum við líka í stórræðum. Þannig er nefnilega mál með vexti að foreldrar Sigrúnar hans Andra voru eitthvað að endurnýja sófamálin hjá sér og hafði Sigrún boðið okkur gamla sófasettið í heild sinni. Í gær fórum við sumsé og sóttum allt heila gilimóið og þökkuðum fyrir okkur. Ekki amalegt sófasett þarna á ferðinni, eins og nýtt og úr svakafínu leðri.

Sófasettið fórum við með í geymslu til Péturs afa. Ekki virtist lukkan ætla að taka endi því afi bauð okkur út að borða Á næstu grös. Þar fengum við þennan svaka fína mat og eftir hann röltum við á Súfistann, drukkum súkkulaðikaffi, lásum góðar bækur og kjöftuðum.

Frábær helgi!

Tweet

Af prímötum

Jæja nú er ég búinn í tímum í dag. Já það er kennt á laugardögum. Ég kemst að vísu bara annan hvern út af vinnunni en það er allt í lagi þar sem tvö af þremur fögum eru kennd annan hvern laugardag.

Þessa stundina sit ég á bókhlöðunni og er að lesa þjóðhagfræði. Bókin sem við notum er eftir Mankiw en hann er einmitt ráðgjafi Bush yngri. Ég hef heyrt að Bush eldri kalli stefnu Bush yngri voodoo economics. Það á hann víst að hafa sagt um stefnu Reagans á sínum tíma en sagt hefur verið að prógrammið hjá Bush yngri svipi til hennar. Kannski væri rétt að kalla Bush yngri barasta Bush baby.

Tekið skal fram að allt efni í þessari færslu er birt í fullkomnu ábyrgðarleysi og er eingöngu ætlað til skemmtunar.

Tweet

Vitkinn talar

Ég þraukaði nú allan daginn í gær og er alltaf að hressast. Í morgun mætti ég meira að segja í ræktina! Jahá! Ég bara mætti í ræktina... Það er lítið mál að mæta en það er víst ekki það sama og að gera. Ég fór bara í gufuna á meðan Ásdís púlaði frammi. Það var alveg reglulega fínt.

Ég ætla ekki að hefja æfingar aftur fyrr en í næstu viku, enda djúpvitur eins og fram hefur komið. Eftir veikindin er líka nóg að gera í skólanum svo ég sinni honum bara meira í staðinn.

Tweet

Skítaástand... og þó

Jæja nú er ég klæddur og kominn á ról! Ég held samt að ég sé of snemma í því.

Fyrir þá sem ekki hafa fengið lýsingu í beinni þá er ég búinn að liggja í flensurusli síðan á sunnudagskvöld. Því miður eru allar líkur á að ég geri það sama í dag :( Það er líka betra að vera seif en sorrí :)

Í gær dreymdi Ásdísi einhvern helling og þegar hún var búin að segja mér frá því sagði ég henni að þetta þýddi að nú yrði hún að kíkja á listann fræga. Hún kíkti og viti menn: við erum númer ellefu.

Þetta þýðir hvað? Jú þetta þýðir að Ásdís er berdreyminn og ég djúpvitur. Haha!

Tweet

Góð kenning

Smvmkaæt rsónunkanm eknss hsókláa sipkitr röð sftaa í oðri egnu mlái, það enia sem mlái stkpiir er að fsrtyi og saðítsi sfaitunrn í hjevru oðri eru á rtéutm satð. Aagfgni snaftana er hgæt að vxlía og smat hgæt að lsea txaetnn án eireiðfkla.

Acocdrnig to an elgnsih unviesitry sutdy the oredr of letetrs in a wrod dosen't mttaer, the olny thnig thta's iopmrantt is that the frsit and lsat ltteer of eevry word is in the crcreot ptoision. The rset can be jmbueld and one is stlil able to raed the txet wiohtut dclftfuiiy.

Tweet

Blæbrigðamunur

Mér líður nú svolítið eins og ég sé að leika í myndinni Groundhog Day. Hvers vegna? Þið komist að því þegar þið lesið færsluna.

Í gær eftir skóla fórum við Ásdís á Subway (nýtt) og svo í bíó á bresku kvikmyndadagana (enn og enn og aftur). Við sáum myndina Plots with a View (nýtt). Mæli með henni (gamalt). Fullt af hágæða leikurum sem fara á fullt af kostum.

Eins og sjá má er eilítill blæbrigðamunur á þessari færslu og þeirri sem ég skrifaði í gær. Hann mun þó ekki vera augljós og hefi ég því merkt sérstaklega við nýjungar og gamlungar. Þetta ætti að hjálpa lesendum að glöggva sig á hvað þarf að lesa og hvað ekki.

Að lokum ber að nefna að ef ég nefni hlutinn oftar en einu sinni er allt eins öruggt að hann sé til prófs. Hafið því augun opin.

Tweet

Magdalenur

Í gær eftir skóla fórum við Ásdís í bíó á bresku kvikmyndadagana, enn og aftur. Í þetta sinn var það myndin The Magdalene Sisters sem varð fyrir valinu. Ekkert review frekar en fyrri daginn. Mæli með henni. Ef þið ætlið að sjá einhverja af þessum bresku myndum í bíó þá verður það að vera fyrir 14. september, því þá eru þessir bresku dagar búnir.

Tweet

Islande deux points

Um helgina fórum við í sumarbústað. Þar lærðum við, skipulögðum hina margrómuðu rútínu og lágum smá í leti. Þetta var notaleg helgi. Það varð nú ekkert úr neinum gönguplönum enda ekki hægt að gera allt í einu.

Í gær var skóli og áðurnefnt skipulag prufukeyrt með ágætum árangri. Í gær var líka fyrsti dæmatíminn í reikningshaldi. Í morgun var það gymmið, sneru líkamsmeiðingarnar fyrst og fremst að kassa og baki. Alltaf gaman á þannig æfingum.

Jæja ekkert mas! Fyrir þá sem vita af biðlistamálum okkar þá erum við farin úr hinu þjóðlega sæti 16 og komin í númer 14! Jibbíjíha!

Tweet

Rútína í mótun

Í gærkvöldi heimsótti ég Pétur afa og spjölluðum við í smástund, kíktum á prentarann hans og sendum ímeil. Svo varð ég að þjóta klukkan tíu því ég hef einsett mér að vera kominn í ró klukkan hálfellefu á kvöldin.

Það gekk svona c.a. í gærkvöldi enda vaknaði ég sprækur sem lækur u.þ.b. korter til tíu mínútur í sex og var fljótlega tilbúinn í slaginn eftir lýsi og ab mjólk. Þá var skundað í gymmið þar sem við tókum rækilega á því bæði tvö og nú er ég, samkvæmt áætlun, á bókhlöðunni að læra (reyndar er Ásdís að læra en ég að blogga).

Tweet

Dansi, dansi!

Þetta var nú meira fjörið! Ég mæli með þessu við alla. Við lærðum grunnspor og takta í foxtrot, djæf og vals. Tróðum lítillega á tám hvors annars, þurftum stundum að byrja aftur en gekk alveg ótrúlega vel þess á milli.

Það góða við svona dans er að maður hugsar ekki um neitt annað á meðan. Maður bara dansar og dansar og reynir að ná sporunum. Að vísu var ég svo einbeittur fyrst að ég kramdi höndina á Ásdísi og tók líka allt of stór skref, en svo lagaðist þetta.

Fram, fram, stutt, stutt! Aftur, aftur, stutt, stutt! Rokk, rokk, stutt, stutt! Þarna er smá sýnishorn af foxtrot en ef maður kann hann getur maður víst þóst kunna fullt af öðrum dönsum með eilitlum stílbrögðum. Það kemur áreiðanlega síðar.

Djæf er svolítið erfiðara að útskýra í svona bloggi enda voru þar ýmsir snúningar og hnykkir, Ásdís tók meira að segja svona bíómyndasnúninga fram og aftur. Í lokin til að róa okkur var tekinn kassavals sem er ósköp þægilegur. Að loknum danstíma var svo rúllað beint heim enda verður maður lúmskt lúinn af þessu tjútti.

Tweet

Samkvæmislyftingar og kraftdansar

Undanfarna tvo morgna höfum við Ásdís mætt í gymmið fyrir skóla. Þetta finnst mér gefa góða raun og er að pæla í að halda þessu áfram.

En við erum nú aldeilis ekki bara í gymminu. Það hefur verið nóg að gera í skólanum, sem er hið besta mál, og svo ætlum við að gerast bæði menningarleg og heilsusamleg í kvöld og skella okkur á dansnámskeið.

Það var nefnilega þannig að við höfðum einhvern tíma í fyrndinni talað um að það gæti nú verið gaman að kunna dans en svo var ekkert framkvæmt og ég beið bara eftir því að danssporin kæmu til mín, kannski finn ég galdraskó. Ég held að Ásdís hafi ekki trúað á þannig bull því hún bara skráði okkur á þetta dæmi.

Mér líst alveg frábærlega á þetta og hlakka mikið til. Lyftingar og dans eiga einmitt betur saman en margan grunar. Því ég man ekki betur en að Arnaldur, vinur minn, hafi notað ballett sem hluta af undirbúningi sínum fyrir vaxtarræktarmót :)

Tweet

Vinna meira

Ég er að hugsa um að vinna á hverjum degi. Hér hef ég hvorki meira né minna en 7000 fermetra húsnæði til umráða, sítengingu við netið mér að kostnaðarlausu, sjónvarp, video, síma, laun og svo er best hvað ég er heppinn með mat.

Undanfarna tvo daga hef ég verið að vinna og báða dagana hefur Ásdís ofurgella komið með vægast sagt frábæran mat. Í gær bakaði hún dýrindis pizzu og í dag var það schnilldargóður linsupottréttur. Það væsir nú ekki um mann hér í höllinni.

Tweet

Allt eða ekkert

Eftir matarleiðangur föstudagsins fórum við á Grænan kost þar sem við höfðum mælt okkur mót við Elfar nokkurn. Þangað fórum við í matarpælingum enda held ég að ég hefði breyst í svarthol ef ég hefði ekki tekið í taumana á þeirri geigvænlegu þróun sem þegar var hafin.

Nákvæmlega, ég var að fokking-deyja úr hungri og þannig nennir maður nú ekki að vera til eilífðarnóns. Ef ég hefði breyst í svarthol hefði líklega enginn þurft að kaupa ryksugu framar.

Því var þrennt í stöðunni: að duga eða drepast, að éta eða ekki, hafa allar framtíðartekjur af heiðarlegum ryksugusölumönnum. Giskið á hvað ég valdi. Hárrétt! Ég át, enda ætlaði ég nú ekki að hafa lifibrauð áðurnefndra ryksugumanna af þeim. Ég bara er ekki þannig týpa. Einfaldlega allt of sætur í mér.

Eftir matinn skelltum við okkur í bíó þar sem við horfðum á myndina All or nothing sem er á breskum kvikmyndadögum Háskólabíós. Ég segi ykkur ekkert um hana því ég þoli ekki kvikmyndareview og ætla því ekki að sóa tíma ykkar né mínum í slíkt prump.

Góðar stundir.

Tweet

Hassperur

Jæja, kominn nýr dagur með fullt af verkefnum. Það sem ég átti erfitt með að drattast á lappir í morgun. Eitthvað þreyttur (latur). Í dag er fyrirlestur fyrir hádegi og dæmatími eftir hádegi eins og hefur verið, en ekki á morgun. Þetta er síðasti dagur undirbúningsnámskeiðsins og út-að-versla-dagur. Á mánudag hefst svo kennsla eftir stundatöflu.

Prófið í gær gekk ágætlega, ég sat og leysti verkefni fram á síðustu mínútu. Eins gott að koma höndunum í form fyrir námstíðina, ég held ég fái harðsperrur (hassperur segja sumir) eftir gærdaginn.

Tweet

Hin verndaða rútína stundatöflumannsins

Mér segir svo hugur um að nú sé að hefjast skólarútína. Ég hef undanfarið sótt undirbúningsnámskeið í reikningshaldi tvisvar á dag og þar af leiðandi í upphitunarformi fyrir alvöru lífsins. Á morgun verður skyndipróf úr námsefninu þannig að það er best að rifja upp í dag.

Á föstudaginn verður svo farið yfir prófið og svo byrjar skólinn á mánudaginn. Það er alltaf eitthvað gott við stundatöflur, námsáætlanir og svoleiðis, einhvers konar verndað umhverfi fyrir þá sem líður vel í rútínu.

Tweet

Örlaukur

Á laugardaginn bjó ég til lauksúpu. Ég tel mig nú ekki vera neinn brautryðjanda í súpugerð en ég gerði hana frá a til ö í örbylgjuofninum. Þetta tók mig svona korter og árangurinn var alveg hreint firnafínn. Prófið bara sjálf.

Innihald:
450g laukur
50g smjör
2 msk maísmjöl
1 hnífsoddur cayenne pipar
2 grænmetisteningar
0,85 l af vatni
salt og pipar eftir smekk
rifinn ostur eftir smekk (frekar meiri en minni þó)
steinselja

Setjið smjörið í stóra skál (sem kemst þó í örbann) og bræðið á fullum styrk í eina mínútu. Á meðan skerið þið laukinn í þunnar sneiðar og hrærið við smjörið í skálinni og eldið í 4 mínútur á fullum styrk. Að þessum fjórum mínútum liðnum hellið þið vatninu út í skálina ásamt kryddi og þurrefnum og hendið inn í ofninn og hafið í fimm mínútur við fullan styrk. Stráið svo ostinum yfir, látið hann bráðna og skreytið með smá steinselju.

Tweet

Myndaalbúm

Laugardagurinn leið ljúflega við Enyusöng og afslöppun. Við fórum ekki einu sinni út úr húsi fyrri part dags, við vorum svo löt. Ég bakaði að vísu bananabrauð sem etið var með bestu lyst auk smjörs og osts.

Við vorum þó ekki með öllu aðgerðalaus; Baldur lærði heima fyrir þetta undirbúningsnámskeið í reikningshaldi og ég tók mig til og gróf upp gömul myndaalbúm. Ætlunarverk mitt var að finna pláss fyrir nýju myndirnar sem við vorum að fá úr framköllun.

Þetta voru þrjú albúm sem um var að ræða, eitt frá mér, eitt frá Baldri og eitt sem var alveg tómt. Þar sem ég er dottin úr þjálfun við að raða myndum í albúm tók það mig smá tíma að skipuleggja hvernig best væri að raða myndunum.

Ég komst loksins að eftirfarandi niðurstöðu: Myndirnar af jólunum 2000 fóru í mitt albúm og allar hinar myndirnar af okkur Baldri fóru í Baldurs albúm og svo auðvitað nýja albúmið. Þetta voru myndir af Fríðu Sól og Kisu, ferðinni okkar um Norðurland sumarið 2001 og svo myndir af 17. júní sama ár.

Það var afskaplega gaman að skoða þessar gömlu/nýju myndir og í leiðinni renndi ég yfir myndir sem þegar voru komnar í albúm, myndir af tilhugalífi okkar Baldurs og fyrstu sambúðarvikum.

Síðan þessar myndir hafa verið teknar höfum við ekki tekið fleiri myndir á filmu enda fengum við stafrænu vélina í júní 2001 og bara tekið á hana síðan. Það þarf þó ekki að þýða að við hættum að raða í myndaalbúm, mér finnst það nefnilega gaman og gott að geta gripið í þau þegar gesti ber að garði. Nú þarf bara að fara að velja myndir til útprentunar og bretta upp ermar, raða, líma, raða, líma.

Tweet

Bláber

Já þetta gekk allt saman eftir. Við fórum upp í Munaðarnes í gær og tíndum fullt, fullt, fuuullt af bláberjum, bökuðum vöfflur og átum helling af bláberjum en það hafði ekkert að segja. Við þurfum að halda vel á spöðunum í dag og á morgun og eta bláber.

Ekki hringja, ekki reyna að tala við mig ég verð upptekinn næstu tvo daga. Ég þarf að eta bláber.

Tweet

Berjamó

Okkur fannst svo gaman í berjamó sunnudaginn seinasta að ákveðið hefur verið að fara aftur upp í Munaðarnes seinni part dags í dag og tína ber við Paradísarlaut. Oh, hvor det er dejligt!

Ég ætla bara að tína bláber því ég fíla ekki krækiber. Svo ætlum við að baka vöfflur og fá okkur bláber ofan á og kannski smá hlynsíróp og rjóma. Namm.

Tweet

Sokkar

Ekki voru nú vandræði að finna á mig sokka, ég fékk heil sex pör.

Nú er ég í frímínútum og ákvað að nota tímann í smáblogg. Í gærkvöldi heimsótti ég Pétur afa og Dag. Var margt spjallað og fór ég heim með tvo fulla Hagkaup-size poka af dýrindis grænmeti.

Þar sem ég á nú svo mikið grænmeti fór ég í smá tilraunir. Fyrsta tilraun var grænkáls og brokkólí safi sem ég drakk í morgunmat. Vægast sagt kraftafæði.

Tweet

Sokkar úr fortíðinni

Ég er búin að eyða lungann úr deginum í að lesa gamlar dagbókarfærslur okkar Baldurs og ó, það er svo gaman!

Ein skemmtileg tilviljun, við hjónakorn vorum búin að ákveða að fara í Europris í dag eftir vinnu og birgja okkur (þ.e.a.s. mig) upp af sokkum á tilboði. Baldur heimtar reyndar líka að fá sokka en maðurinn er svo stórfættur að það er ekki hægt að segja að hann sé maur! (einkahúmor) Við ætlum reyndar að nýta ferðina og kaupa tómata í leiðinni því í verslunarferðinni í Bónus í gær voru ekki til tómatar, appelsínur og gulrætur. Hneisa.

Hvað um það, tilviljunin er þessi: Áðan í nostalgíukastinu las ég þessa færslu um ferð okkar í fyrrnefnda verslun þar sem svipaður varningur rataði ofan í kerruna og mér líst hreint ekki á blikuna. Ættum við að hætta okkur á þessar slóðir aftur eða eigum við að gera það sem brennt barn gerir ávallt, þ.e. að forðast Europris?

P.s. Mig langar ógurlega mikið í nýja sokka svo allt bendir til þess að við brennum okkur, æ.

Tweet

Sumarbústaðarblíða

Á föstudaginn eftir vinnu fórum við beinustu leið upp í Munaðarnes ásamt Elfari, í samfloti voru Andri og Sigrún. Strax og þangað var komið var kveikt í kolum og byrjað að elda. Útkoman var vægast sagt frábær: salat, smjörsteiktur silungur, grillaðar bakaðar kartöflur og frábær smjör og rjómasósa. Lítið man ég hvað gerðist meira það kvöld sökum matarvímu.

Á laugardeginum var sofið út og farið í smá gönguferð + sundferð (ég synti 1000 m), svo var slappað af eins og lög gera ráð fyrir. Eftir slökun gerðum við svo það sem allt fólk í sveitasæluslökunarsumarbústaðarferðum gerir, við fórum niður í bæ og fylgdumst með menningarnótt Reykjavíkurborgar.

Vingsuðumst í gegnum bæinn, droppuðum í Fóu feykirófu og héldum svo á afmælistónleika Rásar 2 þar sem við sáum Sálina hans Jóns míns og Stuðmenn. Hljómsveitir sem klikka ekki. Eftir flugeldasýninguna fórum við aftur í sveitasæluna.

Sunnudagurinn lofaði góðu strax um morguninn með glampandi sól og dúnalogni. Ekki dugði að hanga inni á slíkum degi. Við ókum c.a. 9 mínútna frá Munaðarnesi þar til við komum að skilti sem á stóð Glanni Paradís. Þar beygði ég og við skoðuðum fossinn Glanna, lögðumst í bláberjaát og reyndum að finna Paradísarlaut. Það mistókst, að ég held. Að lokinni göngunni var svo byrjað að undirbúa enn aðra veislu og var hún ekki síðri en sú fyrri.

Ég gleymi aðalatriðinu! Agh! Það var ekki eitt heldur allt með því að við dveldum þarna. Það var nefnilega hægt að hækka og lækka alla eldhúsinnréttinguna (komplett með skápum og allegræ) með rafmagnsstýringarjúniti, ég legg ekki meira á þig lagsmaður.

Tweet

Af bein- og sjálfskiptingum

Þessar þrjár vikur sem Nolli var á verkstæði voru Kalli afi og Ólöf amma svo góð að lána okkur Suzuki jeppann sinn.Venjuleg lét ég Baldur um að keyra hann þar sem hann er frekar þungur í stýri en ég gat þó ekki alltaf verið slík prinsessa og stundum keyrði ég jeppann sjálf.

Þetta er beinskiptur bíll sem mér finnst gaman að keyra og eftir þrjár vikur af slíkrum akstri var maður orðinn ansi vanur því að notast við beinskiptingu.

Fyrir viku síðan þegar við náðum í Nolla brá mér hins vegar ansimikið í brún. Ekki nóg með að stýrið væri eins og úr baðmull heldur vantaði alveg kúplingu og gírana! Ég byrjaði á því að þreyfa fyrir mér með vinstri fæti í leit að kúplingunni en þá rann upp fyrir mér þessi staðreynd.

Fólk segir yfirleitt við mann að passa sig að hætta ekki að keyra beinskipta bíla því það sé svo erfitt að venja sig aftur á gírana. Í mínu tilviki er því hinsvegar öfugt farið, ég á ekki í neinum vandræðum með það en hins vegar finnst mér ansi erfitt að venja mig af gírunum. Ég hef t.d. lentí því að ætla að kúpla en í staðinn þrusað á bremsuna! Og þá man ég alltaf: Ó, ég er á sjálfskiptum.

Tweet

Yatze anyone?

Um daginn keyptum við Baldur yatze spilið í Bónus og hugsuðum okkur gott til glóðarinnar, sáum fram á margar góðar kvöldstundir þar sem við spiluðum af lífi og sál.

Einn galli er þó á gjöf Njarðar sem við sáum ekki fyrir, hvorugt okkar man leikreglurnar svo illt er í efni. Ég hef reynt að leita að þeim á netinu en enn ekki orðið ágengt.

Svo ef þú lesandi góður (sem ert væntanlega líka ættingi eða vinur) manst þessar reglur eða veist hvar er hægt að nálgast þær þá væri mjög vel þegið að fá smá emil um það. Oft var nebbla þörf en nú er nauðsyn, við ætlum sko í bústað á morgun.

Tweet

Af stífstraujuðum sængurfötum og miðnæturbakstri

Gærdagurinn gekk vonum framar og komum við öllu í verk sem á tékklistanum var og gott betur. Með gott betur á ég við að í straujárnsleiðangrinum mundum við eftir öðru apparati sem við höfum lengi ætlað að festa kaupa á, það er eggjasuðutæki.

Við keyptum sem sagt straujárn frá Philips í Heimilistækjum ásamt eggjasuðutæki frá Melissa. Þá keyptum við hvít/græn röndótt straubretti í Rúmfatalagernum og fórum með filmurnar í framköllun í Bónus. Skólataskan mín fór í viðgerð hjá skóara í Smáralind og ætlaði sá að skipta um sleðann á rennilásnum. Svo má ekki gleyma yfirdýnunni sem við sóttum í hreinsun.

Þegar heim var komið drifum við okkur í að rífa allt upp úr pakkningum sínum eins og óðir krakkar á jólum. Forgangsverk var að koma yfirdýnunni á rúmið og þegar það var búið og gert fannst okkur tilvalið að setja hreint á rúmið. Þá fannst okkur enn tilvaldara að prufukeyra straujárnið og straubrettið svo við gerðum okkur lítið fyrir og straujuðum hreinu sængurfötin. Þegar við vorum síðan búin að búa um rúmið var það svo girnilegt að mann langaði strax upp í rúm að kúra.

En dagur var ekki að kveldi kominn enn þrátt fyrir þessa ofangreindu iðjusemi. Við skutumst nebbla í sund með pater meus þar sem við syntum tilskylda 500 m. Ég fór þrjár ferðir flug og var ansi ánægð með framfarirnar á því sviði. Ég er alltaf að ná betri tökum á þessum stíl sem Baldur er alltaf að tala um :)

Við buðum síðan pabba í tebolla eftir sund til að plana helgina og þá fékk ég þá brjálæðislegu hugmynd að baka möffins. Sem ég og gerði og man ég ekki eftir að hafa bakað um miðnætti áður. Muffurnar smökkuðust mjög vel.

Á tékklista dagsins í dag er m.a. að kaupa batterí í úrin okkar beggja. Mitt hefur verið batteríslaust í nokkra mánuði en Baldurs í nokkur ár! Þá ætlum við að kíkja til Péturs afa en svo vill til að hann á afmæli í dag. Heppilegt að ég skuli hafa bakað í gær.

Tweet

Gott form

Í blíðviðri gærdagsins átti sér stað mikill íþróttaviðburður. Hann tók u.þ.b. 90 mínútur og ég var alveg búinn á eftir. Við drifum okkur í Breiðholtslaugina og tókum skemmtilega sundæfingu. Æfingin samanstóð af 90 mínútna frjálsri upphitun í letipottinum þar sem ég náði meira að segja að dotta. Eftir þessa miklu æfingu nenntum við ekki að teygja en það kom ekki að sök ég finn ekki neinar harðsperrur, líklega af því að ég er svo vanur sundmaður.

Tweet

Tékklistinn og frestunarárátta

Við Baldur höfum átta vanda til að fresta hlutunum fram í hið óendanlega. Var svo komið að okkur ofbauð framtaksleysi okkar og tókum við á það ráð að skipuleggja betur hvern dag. Á hverju kvöldi áður en gengið er til náða eyðum við því nokkrum mínútum í að gera lista yfir það sem við viljum koma í verk daginn eftir og númerum atriðin eftir mikilvægi, mikilvægasta er nr. 1 o.s.frv. Þetta er hinn svokallaði tékklisti.

Með þessari aðferð höfum við nú þegar komið ýmsu í verk sem hefur verið í biðstöðu ansi lengi. Um daginn fórum við t.d. með yfirdýnuna á rúminu okkar í hreinsun en sú dýna hefur mátt dúsa upp á skáp í rúmt ár núna eða frá því við fluttum í Hrauntunguna.

Við vorum til að byrja með svo bjartsýn að við töldum okkur trú um að hún kæmist í litlu smáþvottavélina okkar. Það var hins vegar borin von svo í staðinn reyndum við bara að gleyma henni upp á skáp. Yfirdýnan á því tékklistanum hreinsun að launa.

Með þessu skipulagi tókst mér líka að kaupa afmælisgjöf fyrir mömmu í tæka tíð en ég hef verið svolítið gjörn á að draga slíkt alveg fram á síðustu stundu og jafnvel gefa afmælisgjafirnar eftir afmælisdaginn sjálfan. En ekki lengur. Ég er meira að segja búin að kaupa afmælisgjöf fyrir brósa og hann á ekki afmæli fyrr en í lok september!

Dagurinn í dag er ekkert öðruvísi en undanfarnir dagar að því leyti að nóg er af atriðum á tékklistanum. Þessu ætlum við að koma í verk:

1. Fara í Bóksölu stúdenta og kaupa þar dagbók og pennaveski.
2. Fara með skólatöskuna mína (faktískt séð á Baldur hana) í viðgerð, láta laga rennilásinn.
3. Ná í yfirdýnu úr hreinsun.
4. Fara með þrjár filmur í framköllun sem beðið hafa þess síðan í maí 2001!
5. Senda myndir til Frónfjarlægra ættingja gegnum svokallaðan tölvupóst eða emil.
6. Kaupa straujárn á útsölu og straubretti.

Mikið verður gaman að koma öllu þessu í verk. Mest hlakka ég til að skoða straujárn (hef aldrei farið í svoleiðis leiðangur áður) og auðvitað að fá myndirnar úr framköllun. Af hverju vorum við eiginlega að taka myndir? Það kemur í ljós.

Tweet

Váááhh

Ég er á Bókhlöðunni eins og stendur í vinnutengdu erindi. Ég gat þó ekki staðist freistinguna og varð að prófa nýju tölvurnar hérna í Bókhlöðunni. Þeir sem til þekkja vita hvað þarft var orðið að skipta um græjur og það hefur nú verið gert með stæl. Lítil borðtölva, flatur skjár, mús með geisla og skrolltakka og stíft og gott, nýtt lyklaborð. Uhh, hvad jeg er lykkelig:)

Tweet

Óprúttnir náungar

Þegar við komum heim úr útlandaferðinni um daginn þurftum við að fara með bílinn okkar Nolla í viðgerð til að skipta um einhvern skynjara. Sú viðgerð tók lengri tíma en við var búist þar sem panta þurfti varahlut frá Bandaríkjunum og það tók sinn tíma.

Nú, nú hvað um það, við biðum sem sagt í þrjár vikur eftir bílnum okkar og á föstudaginn kom loksins þessi blessaði skynjari til landsins. Þeir í Ræsi hræddu okkur síðan með einhverju tali um að þeir kæmust ekki að til að setja skynjarann í fyrr en eftir helgi svo við urðum ósköp súr. Þeir hringdu hins vegar seinna um daginn með þær gleðifréttir að bílinn væri kominn í lag og biði nú eftir foreldrum sínum. Þannig að þegar við sóttum hann var það langþráð stund enda ekki sést í þrjár vikur.

Nolli var hins vegar ekki alveg eins og hann á að sér að vera, eitthvað vantaði... Ah, nýja, rauða skoðunarmiðann fyrir 2004, hann var horfinn! Einhverjir óprúttnir náungar höfðu séð sér leik á borði og ákveðið að skrapa af honum alla skoðunarmiða undanfarinna ára eða alveg niður í einn ljótan, grænan endurskoðunarmiða. Og við sem vissu ekki einu sinni að Nolli hefði einhvern tímann þurft að fara í endurskoðun fyrir okkar tíma.

Auðvitað var skoðunarstöðin svo lokuð þegar við komum þar askvaðandi á Nolla þennan föstudagseftirmiðdag svo alla helgina við urðum að keyra Nolla um allan bæ með þessu græna ferlíki, Nolla til háborinnar skammar og hneisu.

Í gær fórum við hins vegar og fengum eldrauðan og splunkunýjan 04 miða svo Nolli getur varpað öndinni léttar. Hjúkket!

Tweet

Frábær helgi

Helgin leið ansi hratt enda höfðum við margt fyrir stafni. Á laugardaginn fórum við að sjálfsögðu í Gay Pride skrúðgönguna sem var með litríkasta móti.

Þar sem það rigndi eins og hellt væri úr fötu áður en gangan hófst tókum við Baldur með okkur regnhlífar (eða parachute eins og Baldur kallaði það í London!). Til að vera í stíl við daginn voru regnhlífarnar okkar bleikar og bláar. Þar að auki lánaði Pétur afi Baldri regngallann sinn svo hann var varinn í hólf og gólf ef svo má að orði komast.

Þegar við komum að Laugaveginum var gangan hafin og eftir að hafa fylgst með vögnunum líða hjá gengum við til liðs við hana. Þrátt fyrir að varla væri þverfótandi fyrir barnavögnum og regnhlífum var þetta svaka gaman og mikil stemmning. Göngunni lauk síðan á Lækjagötu frammi fyrir sviði sem sett hafði verið upp beint fyrir neðan MR.

Margir söfnuðust í brekkuna við MR til að sjá betur á sviðið en við létum okkur nægja að dúsa á miðri umferðargötunni. Þarna var bæði fjölmennt og góðmennt (fer ekki alltaf saman) og ég verð svei mér þá að segja að ég vissi ekki að Íslendingar ættu allar þessar regnhlífar til. Skemmtiatriðin voru síðan alveg frábær og ögraði mannskapurinn rigningunni með því að taka lagið og syngja: Mér finnst rigningin góð, trallallallalla, oho!

Eftir Gay Pride kíktum við síðan til mömmu því hún átti 45 ára afmæli. Það var alveg æðislega gaman og sátum við og kjöftuðum langt fram á nótt og hræddum hvort annað með skuggalegum sögum. Til hamingju með daginn um daginn elsku mamma!

Gærdagurinn var síðan allur með rólegra sniði. Tókum því rólega fram eftir degi og fórum síðan Á næstu grös með afa, Degi og Stellu. Síðan fórum við unga fólkið í keilu sem ég hef ekki gert í mörg herrans ár. Mér gekk samt sæmilega, allavega vann ég hin þrjú!

Tweet

Páfagaukur rak þjófa á flótta

Þessa skemmtilegu frétt fann ég á mbl.is:

"Páfagaukurinn Matilda, sem býr nálægt Middlesbrough á Englandi, reyndist betri en enginn þegar hún stökkti innbrotsþjófum á flótta. Jacki Burnett, eigandi Mathildu, sem fékk fuglinn í afmælisgjöf fyrir fjórum árum, hefur hefur kennt gauksa að spyrja gesti spjörunum úr. Þegar Mathilda varð innbrotsþjófanna var spurði hún: Halló, hver ert þú? Þegar ekkert svar barst spurði fuglinn og byrsti sig: Halló, þú þarna. Komdu hingað strax! Þetta dugði til að þjófarnir lögðu á flótta."

Mér líst mjög vel á þetta pakkatilboð, gæludýr og þjófavörn í senn. Einnig hefur verið hægt að gera slík reyfarakaup með hunda en svo ég segi eins og er þá er ég ekki svo mikið fyrir hunda og líst mun betur á að fá mér varðkött eða páfagauk. Hamstra er aftur á móti ekki hægt að fá á slíkum kjarakaupum, þeir eru ekkert sérlega ógnvekjandi.

Ef ég fengi mér páfagauk myndi ég sko pottþétt kalla hann Kíkí.

Tweet

Ég mæli með...

... að horfa á norsku myndina Elling. Hún er alveg þrælfyndin og yndisleg.

... að fara í Breiðholtslaug á góðviðrisdegi eins og í dag, synda nokkur hundruð metra og leggjast svo á einn fjölmargra sólbekkja á sundlaugarbakkanum og slappa af.

... að fara á Grænan kost í dag því réttur dagsins er hnetusteik með hrísgrjónum og sveppasósu. Namm :)

... að fara í Alvöru Álfheimabúðina (Erluís) og fá sér ítalskan sorbet ís, helst með sítrónubragði.

Að lokum mæli ég eindregið með dönsku þáttunum Nikolaj og Julie, hágæðaafþreying (orðalag Baldurs) á miðvikudagskvöldum. Hej, hej!

Tweet

Höfuðpaur allra innipúka

Til mótvægis við allar útihátíðir er haldin hátíð í Reykjavík sem heitir Innipúkinn. Ég er hins vegar sannfærður um að enginn af þessum innipúkamönnum sé jafn mikill innipúki og ég um þessa helgi. Ef einhver þeirra rambar inn á síðuna þá getur sá hinn sami gert samanburð hér með.

Prógramm hins sanna innipúka:
Laugardagur: Vakna um 6:45, et þjóðlegan morgunverð, er svo úti í korter og svo inni í 14 tíma.
Sunnudagur: Vakna um 6:45, et fjölþjóðlegan morgunverð, er svo úti í korter og svo inni í 14 tíma.
Mánudagur: Vakna um 6:45, et einhvern slatta, er svo úti í korter og svo inni í 9 tíma af því að verslunarmannahelgin er að verða búin og maður aðeins byrjaður að linast.

Ég vona að þetta bloggerí mitt teljist til samráðs við aðra innipúka (sem vissulega myndi ýta undir slaka samkeppni) og bið Samkeppnisráð að halda að sér höndum í a.m.k. tíu ár en þá skal ég setja símanúmerið mitt á heimasíðuna.

Tweet

Horft á jarðlíf

Mikið er veðrið hér í Reykjavík dýrðlegt. Nú er ég fegin að hafa ekki átt annað val en að vera í bænum yfir helgina. Reyndar á Baldur ekki eins gott og ég, hann þarf nebbla að hanga inni í Mogga í allan dag.

Ég ætla að vera honum til samlætis svona í morgunskimunni en ef veðrið heldur áfram á þessari braut get ég engan veginn verið svo kurteis til lengdar.

En núna ætlum við að snúa okkur að David Attenborough og horfa á þáttinn Life on Earth. Hann er frá 1979 svo hann ætti að renna ljúft áfram eins og allt frá því ári.

Tweet

Af bíói og bæjarferð

Myndin í gær var alveg frábær og við grenjuðum úr hlátri. Svona er að vera Woody Allen aðdáandi, það er ljúft.

Í dag höfum við hins vegar snúið okkur að öðrum og alvarlegri málefnum. Smá útréttingar í bankanum og allt þetta hefðbundna sem klára þarf þann 1. hvers mánaðar. Að því loknu töltum við niður í miðbæ til að kíkja á bókasafnið en festumst í köngurlóarvef á leið þangað, nefnilega geggjuðu ljósmyndasýningunni á Austurvelli.

Við vorum þegar búin að skoða slatta af myndum í einu horni Austurvallar og fórum því núna í annað horn þar sem við sáum m.a. sláturhús í Indlandi, litunarker í Marokkó, baðmullarsnepla lagða til þerris í Indlandi og íbúðarblokk í fátækrahverfi í Brasilíu.

Mettuð af fegurð náttúru og mannkyns losuðum við okkur úr vefnum og komumst loks á bókasafnið. Tilgangur ferðar okkar þangað var að birgja sig upp af góðum og velvöldum kvikmyndum fyrir helgina.

Við ætlum nefnilega ekki út úr bænum heldur ætlum við ósmeik að nýta okkur myndbandstæki saklausra ættingja og sjónvarpstæki þeirra til að geta glápt á Italiensk for begyndere, The Cider House Rules og Malena. Núna erum við á leiðinni upp í Gerðuberg og Foldasafn til að ná í Elling og, auðvitað, eina frábæra Woody Allen mynd - Manhattan Murder Mystery.

Góða helgi góðir hálsar :)

Tweet

Bíó

Bjartsýnin borgar sig. Það er nefnilega enn verið að sýna Hollywood Ending svo við ætlum að skella okkur í bíó núna. Góðar stundir.

Tweet

Morgunkúr

Og meira af morgunbrölti okkar kópanna. Vorum harðákveðin í gærkvöldi að vakna á sama tíma og í fyrramorgun, þ.e. 06:30, til að fara í kraftgöngu.

Ég er þó hrædd um að eitthvað hafi skolast til þegar sú ákvörðun var vistuð því þegar við vöknuðum fyrst í morgun vorum við svo hryllilega þreytt að halda mætti að einhver hefði lætt svefnlyfi í drykkjarvatnið (t.d. flóaðri mjólk með hunangi og bananabita!).

Við sváfum sem sagt yfir okkur og áttum fullt í fangi með að mæta á réttum tíma í vinnuna. Í staðinn erum við enn ákveðnari en ella að vakna snemma í fyrramálið og kraftganga meðfram sjónum. Við skulum!

Tweet

Morgunhringurinn

Hreyfing dagsins í dag fólst í kraftgöngu í morgunsárið. Við gengum meðfram sjávarsíðunni á Kársnesinu og áðum síðan á stað sem kjörinn er til að pústa því þar er bekkur og aðstaða til upphífinga. Nenni maður hins vegar engu slíku er hægt að dunda sér við að lesa á skilti með fróðleik um fuglalífið sem þarna er að finna.

Við nenntum hins vegar alveg og gerðum magabeygjur áður en við kraftgengum heim á leið. Þetta er alveg frábær líkamsrækt sem ég mæli með við alla.

Núna er ég hins vegar mætt í vinnuna og ætti með réttu að vera að vinna en mér finnst þó alltaf best að byrja vinnudaginn á því að fara "morgunhringinn" á netinu, þ.e. athuga allan póst og fréttir og slúður ættingja og vina.

Ég álpaðist reyndar inn á vefinn kvikmyndir.is og sá þá mér til mikillar ánægju að sýningar á Woody Allen myndinni Hollywood Ending væru hafnar. Við nánari athugun sá ég líka að seinasta sýningin var í gær :(
Soddan bömmer.

Ég ætla nú samt að hringja og athuga til öryggis hvort svo sé því tilhugsunin um að þurfa að bíða eftir að hún komi út á spólu setur daginn alveg úr skorðum. Og dramaverðlaun ársins hlýtur...

Tweet

Skrælinginn snýr aftur!!!(24)

Já nú er maður kominn heim frá útlöndum. Undanfarnir dagar hafa farið í að skræla mig eins og appelsínu og er það sérdeilis sniðugt sport, í það minnsta hentar það vel sem hliðaráhugamál ef manni finnst gaman að snorkla við franskar strendur í hitabylgjum.

Það er nú alveg þrælgaman að snorkla þarna úti og hefi ég ákveðið að leggja drög að bókinni Synt með sardínum og má búast við að hún veiti bókinni Dansar við úlfa harða samkeppni í njólabókaflóðinu sem er væntanlegt seinna.

En þó svo að það sé gaman á erlendri grund með folöldum, sardínum, úlföldum, hekkmorðingjum, uppstoppuðum hundum, Geirmundi Heljarskinni og öllu því ágæta sem þarna er að finna þá finnst mér alltaf yndislegt að komast aftur í kexverksmiðjuna.

Tweet

Tilraun

Strax eftir að ég postaði seinustu færslu fór ég að sjálf að prófa að laga heimasíðuna enda þaulvön þeirri hugsun að neyðin kenni nöktum að spinna. Mér virðist hafa tekist að koma íslenskum stöfum aftur inn á heimasíðuna og þar var í sjálfu sér mjög einfalt.

Hins vegar tekst mér ómögulega að fá nafnið mitt til að birtast með íslenskum stöfum, mér til mikillar gremju svo ekki verði meira sagt (svona klassískur úrdráttur eins og í Íslendingasögunum, haha). Nú hefur SOS kallið sem sagt breyst og aðlagast að nýjum aðstæðum og hljóðar nú svona: Ef einhver kann að breyta nafni meðlima um hverja blogger síðu má sá hinn sami senda mér línu, takk.

Annars er það að frétta af mér að ég sit hér í Odda og hef ekkert annað að gera en flakka um netið. Mig langar hins vegar heil ósköp að komast í vinnunna en það er aftur á móti ómögulegt.

Svo er mál með vexti að þegar ég fór utan lét ég Önju (sem er aðstoðarmaður eins og ég) fá lykilinn minn að skrifstofunni á meðan ég væri í burtu. Í gær sendi ég henni síðan póst og sagðst mæta til vinnu í dag og bað um lykilinn en enn hef ég ekkert svar fengið.

Ég næ ekki einu sinni í Unni, vinnuveitandann, til að komast inn á skrifstofuna svo nú er illt í ári. Örugglega eitthvert samsæmir huxa ég bitur. Já, samsæri um að gefa mér færi á að slappa af og vinna upp næstum þriggja vikna netleysi :)

Tweet

Fregnir

Erum komin heim eftir thriggja vikna sumarfri. Vorum fimm naetur i London og sidan tvaer vikur a Bretagne skaga. Lentum i hitabylju sem endadi med thvi ad sla oll hitamet tharna a Skaganum. Hefur vist ekki ordid eins heitt i einhver 45 ar. Erum nuna solbrunin og hofum bratt hamskipti :)

Vid skiljum hvorki upp ne nidur hvad gengur a hja blogger med thessi blessudu ???? Ef einhver hefur hugmynd um hvernig ber ad laga thetta thaetti okkur vaent um ad fa leidbeiningar. Thangad til efast eg um ad mikid verdi bloggad a thessum bae.

Nanari og betri lysing a ferdinni verdur gefin sidar asamt thvi sem servaldar myndir verda birtar. Annars man eg eftir ad hafa sagt thad sama um Graenlandsferdina og enn er ekkert komid um hana. Spark i rassinn. Laet thetta duga i bili.

Tweet

Mannfræðingurinn sem eldar ítalska grænmetissúpu

Ég hef látið hjá líða að skrifa um atburði liðinna daga sem er synd því hver dagur hefur verið öðrum skemmtilegri.

Á föstudaginn förum við Baldur til að mynda til pabba eins og við höfum gert undanfarna svona hundrað föstudaga til að gæða okkur á pizzu. Nema í þessu tilviki var slíkt ekki á döfinni enda ég búin að ákveða að elda ofan í mannskapinn ítalska grænmetissúpu sem er algjört lostæti (uppskriftina má finna í matreiðslubókinni okkar hér á netinu).

Andri var eins og venjulega búinn að loka sig af inn í herbergi á fullu að lesa undir þessi inntökupróf í læknisfræðinni. Við þá tilhugsun sætti ég mig fullkomlega við minn hlut og undi mér vel í eldhúsinu við að saxa niður grænmetið sem þarf í súpuna. Á meðan skutust pabbi og Baldur niðrí vinnu pabba, Baldur þurfti nebbla að staðfesta bókun á gistingu í London (jei!).

Þrátt fyrir að brósi hafi látið sig vanta tókst mér að plata Sigrúnu kærustu hans til að smakka og allir virtust ægilega ánægðir með súpuna. Pabbi sagðist einfaldlega ekki geta hætt að borða og það rifjaði upp fyrir mér eitthvað sem Óli afi sagði víst oft í denn: Ég vildi að ég væri búinn að borða, farinn að sofa, vaknaður og aftur byrjaður að borða!

Jæja, nóg um þessa súpu því ég iða í skinninu eftir að lýsa laugardeginum, útskriftardeginum góða. Nú, nú við Balduro mio fórum í sund til að slaka smá á fyrir athöfnina og telja í okkur kjark til að mæta. Þegar til kastanna kom var þetta þó hvergi nándar nærri eins slæmt og mér hafði verið tjáð né það sem mbl.is gaf í skyn.

Athöfnin var tæplega tveir og hálfur tími, sem þýðir að hún var á undan áætlun og mér leiddist satt að segja ekki neitt fyrr en undir lokin þegar rektor virtist aldrei ætla að ljúka máli sínu. Ég verð að viðurkenna að ég varð pínu taugastrekkt að standa uppi á sviði frammi fyrir mörg hundruð manns til að fá skírteinið afhent en það tók svo fljótt af að fiðrildið í maganum komst aldrei á flug.

Ég var nú ekki ein um að vera útskrifst þennan dag (779 stykki munið!), Heiddi vinur Baldurs kláraði BS í eðlisfræði og Tinna hans Óla Þórs frænda kláraði jarðeðlisfræði. Ég hins vegar kláraði BA í mannfræði og er því orðin að mannfræðingi. Og gerið það fyrir mig að rugla því ekki saman við sálfræði og segja sposk á svip: Nú, mannfræðingur, ætlarðu þá að sálgreina mig?

Að athöfninni lokinni fórum við Baldur með mömmu og Sigga út að borða á veitingastaðinn Á næstu grösum. Um kvöldið kíktum við tvö síðan í bíó á myndina En la puta vida sem mér þótti ansi góð, þó helst fyrir það að fjalla um hliðar hnattvæðingarinnar sem ég hef nokkurn áhuga á.

Á leiðinni heim úr bíóinu sáum við svo dýrðlegt sólarlag að við gátum ekki fengið okkur til að fara heim strax. Við mundum þá að það voru sumarsólstöður svo við brunuðum út á Gróttu til að upplifa herlegheitin. Við vorum greinilega ekki ein um þessa hugdettu því þarna voru heilu fjölskyldurnar í hjólatúr með hunda sína auk fjölda kærustupara. Einstaklega viðeigandi endir á góðum degi.

P.s. Frá atburðum sunnudagsins greini ég frá síðar.

Tweet

Brautskráning

Nú styttist í að ég brautskráist frá HÍ þar sem ég lauk BA náminu nú í vor. Ég hef fengið að heyra alls kyns hryllingssögur af þessari athöfn, m.a. að hún geti tekið allt að fimm tímum, að þetta sé óbærilega leiðinlegt og að það sé svo heitt að ekki sé líft þarna inni nema á nærbuxunum. Ég ætla ekki að útskrifast á nærbuxunum svo ég býst fastlega við að kafna. Þá hefur mér verið ráðlagt að mæta með bók, ef ekki bara bækur.

En svo ég tali í alvöru þá leiddi ég þetta að mestu hjá mér og lagði lítinn trúnað í slíkar ýkur. Nú hins vegar er ég orðin verulega kvíðin því ég las þetta á mbl.is:

Stærsta brautskráning HÍ
Alls munu 779 kandídatar útskrifast frá Háskóla Íslands næstkomandi laugardag. Þetta er stærsti hópur sem brautskráðst hefur frá skólanum. Athöfnin fer fram í Laugardalshöll. Flestir útskrifast úr félagsvísindadeild, eða 210, en 113 útskrifast úr verkfræðideild. Hvorug deildanna hefur áður brautskráð svo marga að vori. Úr heimspekideild útskrifast 113, 141 úr heilbrigðisgreinum, 91 úr viðskipta- og hagfræðideild og 87 úr raungreinadeild. Konur eru í miklum meirihluta þeirra sem útskrifast. Þær eru 497, eða tæplega 64%, en karlar einungis 282, eða rúmlega 36%. Aldrei fyrr hefur munurinn verið jafnmikill. Karlar eru þó mun fleiri í útskriftarhópi verkfræðideildar, eða 87. Konurnar eru 26.

Munurinn á kynjunum er langmestur í hjúkrunarfræðideild. Þar útskrifast 77 konur en enginn karl. Úr heimspekideild verða 72 konur brautskráðar en 28 karlar og frá félagsvísindadeild útskrifast 150 konur og 60 karlar.

Vegna mikillar fjölgunar brautskráninga í júní-útskrift Háskóla Íslands hefur umræða skapast um það hvort leita þurfi að stærra húsnæði en Laugardalshöll til þess að hýsa athöfnina. Búast má við að húsfyllir verði á laugardag. Á síðustu árum hefur nokkuð verið kvartað yfir þrengslum og hita og eru þess dæmi að fólk hafi fallið í yfirlið.

Ó, mig auma :(

Tweet

Þúsund eikur

Í vinnunni þarf ég mikið að vinna með forritið EndNote sem geymir helstu upplýsingar um bækur og greinar sem maður er að vinna með. Þetta forrit auðveldar manni alveg svakalega vinnuna þegar kemur að greinaskrifum þar sem maður þarf aldrei sjálfur að skrifa aftur og aftur tilvitnanir eins og t.d. (Bowser, 1995).

Eina sem maður þarf að gera er að fara inn í þetta forrit og velja þá bók, grein, kafla eða hvaða heimild sem vitnað er í og þá kemur sjálfkrafa tilvísun. Rúsínan í pylsuendanum er að maður þarf síðan ekkert að vesenast við að búa til heimildaskrá sjálfur því EndNote sér um það fyrir mann þegar maður hefur lagt lokahönd á greinina sína.

Unnur Dís (sem ég vinn hjá) á alveg fullt af bókum og það hefur komið í minn hlut, sem aðstoðarmaður hennar, að taka hverja og eina bók og skrá hana nákvæmlega inní EndNote forritið. Þar koma fram upplýsingar eins og t.d. höfundur, titill, ritstjóri, útgáfuár, blaðsíðutal, útgáfufyrirtæki og síðast en ekki síst borg útgáfufyrirtækisins.

Og þá er ég komin að því sem mig langaði virkilega að tala um, þ.e. eina ákveðna borg. Flest þau útgáfufyrirtæki sem ég hef rekið augun í hafa útibú sín víðs vegar um heiminn og London er ansi vinsæl. Sú borg sem ég hef þó nokkru sinnum rekist á er borgin Thousand Oaks, sem útlagst gæti sem borg hinna þúsund eika.

Ef það er eitthvað sem heillar mig þá er það nafnið á þessari borg og er ég staðráðin í að heimsækja hana í framtíðinni.

Tweet

Nota bene

Ég vil bara vekja athygli á einu hér ef ske kynni að einhver hafi misskilið færsluna hér að neðan. Sumarfríið verður ekki á netinu ef einhverjum skyldi hafa dottið það í hug og vísa ég þar í orð mín "fyrir sumarfríið okkar á netinu." Við einfaldlega keyptum flugmiðana í gegnum netið. Ha, maður getur verið svo skemmtilega ruglaður.

Tweet

Sumarfríið skipulagt

Í gærkvöldi keyptum við flugmiðana fyrir sumarfríið okkar á netinu. Það tók okkur lengri tíma en við bjuggumst við að kaupa miðana þar sem við erum svo rosalega vandvirka og samviskusöm að við vorum alltaf að tvítékka og sjá hvort allt væri ekki í ordnung.

Svo þurfti ég auðvitað að lesa öll plögg um hin ýmsu skilyrði og reglur flugfélaganna svo vel að Baldur sagði að ég ætti að gerast lögfræðingur. Mér líst reyndar ekkert svo illa á þá hugmynd :)

Þetta gerðum við tvisvar því við þurftum að kaupa flugmiða á tveimur stöðum, frá Keflavík til London með Iceland Express og síðan frá London til Dinard í Frakklandi með Ryanair.

Þetta verður ansi gott og langt frí; við ætlum að vera fimm nætur í London og síðan einhverjar tvær vikur á Bretagne skaganum. Ég er ansi hrædd um að þetta verði hið ljúfa líf.

Tweet

Fáliðuð kröfuganga gæsa á hraðferð

Fyrir skömmu var borinn í hús bæklingur frá ÍSÍ um hreyfingu fyrir almenning. Eftir að hafa skoðað bæklinginn ákváðum við Ásdís að skella okkur í kraftgöngu sem við gerðum strax klukkan sjö í morgun.

Göngutúrinn tók okkur um hálftíma og var þessi hálftími drulluerfiður en þrælskemmtilegur enda líktumst við líklega fáliðaðri kröfugöngu gæsa á hraðferð. Ég mæli eindregið með þessu kraftgangelsi fyrir þá sem eru að pæla í að koma sér í form á ódýran hátt án þess þó að skaða hnén.

Tweet

Hjólatúr í blíðviðri

Úr varð á sunnudaginn að við fórum í hjólatúr enda veðrið dásamlegt og ekki hægt að eyða drjúgum hluta dagsins inn í bíl að keyra Hvalfjörðinni, sama hversu fallegur hann getur verið í sól og sumari. Við pökkuðum léttu nesti, fórum í okkar sumarlegustu föt sem voru annars vegar pils og hins vegar stuttbuxur. Þið megið giska hvort okkar var í hverju :)

Við þurftum reyndar að byrja á því að fara með hjólið mitt á bensínstöðina og pumpa í dekkin og smyrja keðjuna og bremsurnar. Ég varð að sætta mig við að hjólið mitt sem ég keypti í Flórída eftir fermingu er ekki lengur eins splunkunýtt og ég hef fram að þessu haldið fram. Það er t.d. óhemjuþungt svo það er engin furða að ég hef verið rög við að stíga á það.

Ég fór nokkra prufuhringi á hjólinu áður en ferðin hófst þar sem ég hef ekki brúkað hjólið núna í tæp tvö ár. Það gekk fremur brösulega þar sem bremsan festist alltaf eða þá að hjólið gíraði sig upp og niður af sjálfu sér. Baldur, sá herramaður sem hann er, tók ekki annað í mál en að ég fengi hans hjól og hann færi á mitt. Og ég, eins tækifærissinnuð og ég er, sagði bara já takk og hjólaði ánægð á brott.

Ferðinni var fyrst heitið til Nauthólsvíkur þar sem við lágum og flatmöguðum á ströndinni í stutta stund. Okkur leiddist hins vegar ógurlega svo við tókum bara hjólin og fórum upp í Öskjuhlíð þar sem við fundum fullt af sætum lundum og skoðuðum Strók.

Ferðin lá síðan að Fossvogskirkjugarði þar sem við fórum að leiðum ættingja okkar. Eftir það héldum við að Fossvogsdal og hjóluðum hann endilangan og enduðum við Elliðaárnar þar sem við pikknikkuðum við Ullarfoss og Þvottaklöpp ef ég man þessi staðarheiti rétt.

Þegar þar var komið sögu var hjólatúrinn búinn að standa í tæpa fimm tíma svo við brunuðum heim af krafti sem ég vissi ekki að við ættum eftir. Allra skemmtilegast var að bruna niður Digranesheiði. Ferðinni lauk síðan í garðinum okkar í Hrauntungunni. Sem sagt frábær dagur.

Tweet

Útivist og engiferöl

Helgin fram að þessu hefur verið alveg frábær og mér hefur svo sannarlega tekist að vinda ofan af mér margra mánaða þreytu og stressi. Veðrið í gær, skúr og skýjað, fór afskaplega vel í mig, svo vel að ég kom heilmiklu í verk.

Ég lagði til að mynda í að fara niður í Kringlu og þar fann ég mér föt til útskriftarinnar (sem ég er annars farin að kvíða nokkuð þar sem ég hef heyrt hryllingssögur á borð við að athöfnin geti tekið allt að fimm tímum!).

Þegar við komum heim í Kópavoginn okkar röltum við niður á hlaupabraut og hlupum/skokkuðum/gengum dágóðan spotta. Eftir það var haldið í sund og farið eina 500 m. Ég var óskaplega stolt af mér því ég fór 75 m. flugsund þrátt fyrir að vera uppgefin. Það þarf nefnilega soddan sprengikraft til að synda flugsund eða fiðrildasund eins og enskumælandi menn kalla það. Verðlaunin fyrir þessa hreyfingu og útivist voru heldur ekki af verri endanum, engiferöl og karamellusnakk :)

Þegar við vöknuðum í morgun var þessi líka veðurblíðan. Við vorum með tvenn plön í gangi fyrir daginn í dag, 1. ef rigning: bíltúr upp á Akranes og sund þar eða 2. ef sól: hjólatúr niður á Seltjarnarnes og síðan í Nauthólsvík og pikknikk þar.

Við virðumst hins vegar hafa fengið smá mix af hvoru tveggja svo ég veit ekki alveg hvernig við snúum okkur í þessu. Kannski maður blandi þessu aðeins, keyri niður í Nauthólsvík og taki sundsprett þar (burrr, líst ekki vel á það), keyri upp á Akranes og pikknikki á ströndinni þar eða hjóli upp á Akranes og fari í sund þar. Mér líst verst á síðasta liðinn.

Tweet

Búin á því

Þetta verður stutt og laggóð færsla. Ég var að skila BA ritgerðinni minni rétt í þessu. Það þýðir að ég get aftur farið að lifa lífinu, látið sjá mig á götum úti og hætt að hugsa um fólksflutninga og innflytjendur!

Jeremías hvað ég er fegin að þessu er lokið. Nú verð ég glöð og sæl til æviloka :)

Tweet

Vorprófum lokið

Já nú eru þau búin vorprófin og er það vissulega léttir. Það dugar þó ekki að slá slöku við því þannig verða menn aumingjar.

Þar sem ég get ómögulega hugsað mér að tilheyra áðurnefndum hópi er ég byrjaður að lesa fyrir sumarprófin, enda ekki seinna vænna ef maður ætlar að leggja Bretagne undir fót í sumar.

Tweet

Seinasta próf BA námsins

Þá er seinasta prófinu mínu í BA náminu lokið og ég er því frjáls eins og fuglinn minn.

Þetta var próf í námskeiðinu Þjóðernishyggja og þjóðernisátök innan stjórnmálafræðinnar þar sem við lærðum um kenningar um þjóðernishyggju og átakakenningar ásamt því að lesa um átökin í N-Írlandi, fyrrum Júgóslavíu og Tétsníu. Það var ansi fróðlegt að átta sig loksins á því hvað er að gerast á þessum vígstöðum.

Ég kveið reyndar prófinu lítillega því ég hef ekki tekið próf í stjórnmálafræði áður en þetta gekk ljómandi vel. Ég er þó ekki alveg komin í sumarfrí enn því ég á eftir að leggja lokahönd á BA ritgerðina sjálfa.

Tweet

Afmæli

Í gær var haldið afmæliskaffi heima og var mikill viðbúnaður lögreglu af því tilefni og kallast dagurinn víst lögregludagurinn. Það kom þó ekki til óeirða og fór veislan öll fram á hinn virðulegasta máta og ber húsfreyjan allan heiður af því.

Eins og allir vita fylgir hverju afmæli aukinn aldur afmælisbarns og ég hef meira að segja heyrt að sumir fái þroska í kaupbæti. Það er sosum gott og blessað en mér líst nú ekki á blikuna þegar fólk er farið að stinga upp á ruggustól sem næstu afmælisgjöf. Eru það skilaboð um aukinn þroska eða hvað? Ég veit ekki, það er erfitt að segja... En dagurinn í gær var frábær, takk fyrir mig!

Tweet

Gleðilegt sumar!

Ég (ef mig skyldi kalla) vil fylgja eftir svokallaðri fyrirsögn og óska öllum um heima og geima gleðilegs sumars og þakka fyrir veturinn (ef vetur skyldi kalla). Ég ákvað að eyða þessum fyrsta degi sumars í vinnunni og nýta tímann í lærdóm. Það er þó eins og oft áður erfitt að gera tvennt í einu og lærdómur víkur fyrir vinnu og almennu amstri.

Tweet

Stutt yfirlit

Núna er ég í tíma en ákvað að skreppa aðeins til að kíkja á póstinn og svoleiðis.

Á laugardaginn var ég að vinna, í gær skutlaði ég mömmu upp á flugvöll og söng svo í tveimur fermingum, í dag er ég búinn. Fyrir utan það sem ég hefi talið upp nú þegar þá reyni ég að læra við öll tækifæri. Jæja þá er það komið, ég er farinn aftur í tíma.

Tweet

Mættarmót

Í dag fór ég í bíltúr með Pétri afa. Við keyrðum sem leið lá út á Keflavíkurflugvöll, svona eins og maður gerir, og náðum í mömmu. Mikið ferlega var gaman að hitta mömmu, nú þarf maður bara líka að fá pabbaskammtinn sinn. Við fórum svo og heimsóttum Stellu ömmu og vorum hjá henni dágóða stund.

Svo úr því að allir voru í svona góðum fíling þá ákvað afi að slá upp mini-ættarmóti (mættarmóti) á á á Á næstu grösum og svoleiðis ættarmót getur ekki orðið annað en ljúffengt.

Tweet

Skammturinn kominn

Eftir rúmlega hálftíma tímasóun á þessum stað þá er ég kominn með endorfínbyrgðir fyrir krúttulega dæmið sem bíður mín í ofvæni.

Tweet

Endorfínfráhvörf

Nú verð ég að gera eitthvað annað en að reikna í smá stund. Ekki það að ég hafi reiknað svona mikið, þvert á móti reyndar. Málið er að dæmin sem ég ákvað að glíma við í dag eru í þyngri kantinum og ganga fremur hægt fyrir sig. Það þýðir einfaldlega að endorfínfíkillinn í mér fær færri verðlaun en ella.

Þegar ég tala um verðlaun þá á ég við losun endorfíns út í líkamann sem gefur manni þessa sælutilfinningu sem fylgir því að sigra stærðfræðiþrautir og reyndar líka líkamlegri áreynslu. Á eðlilegu mannamáli þá var ég barastabara orðinn svo pirraður á ákveðnu dæmi að ég ákvað að gera bara eitthvað allt annað í smá stund.

Tweet

Veðurfréttir á bókasafninu

Í gær þegar við komum heim úr föstudagspizzu, sundi og rabbi tókum við eftir því hve kalt það var í íbúðinni. Við komumst fljótt að því að allir ofnarnir í íbúðinni voru ískaldir sem veitti ekki á gott því framundan var vetrarnótt.

Jæja, klukkan var reyndar langt gengin í tvö þessa nóttina en við létum okkur samt hafa það að tappa af nokkrum ofnum. Við vorum dauðþreytt og mér var orðið ansi kalt svo vonbrigðin voru ekki lítil þegar ofnarnir héldu sínu striki og kældu íbúðina.

Við brutum heilann nokkra stund og veltum fyrir okkur hvernig stæði á því að loft kæmi af ofnunum en samt hitnuðu þeir ekkert eftir aðgerðirnar. Við fengum síðan ljósaperu (!) og tékkuðum á heitavatninu. Það var við manninn mælt, ekki deigur dropi sem kom þegar skrúfað var frá krananum.

Við ypptum þá öxlum, skriðum upp í rúm og bættum á okkur flísteppi til vonar og vara. Undir morgun rumskuðum við síðan við læti í pípunum sem var kærkomin vísbending um að heita vatnið væri á leiðinni. Þetta var samt sko allt í lagi að gista svona í óupphitaðri íbúð eina nótt, sko.

Að lokum, er það bara ég eða finnst öðrum súrrealískt að heyra tilkynnt í kallkerfi Bókhlöðunnar að nú sé korter til lokunnar og fá jafnframt beint í æð nýjustu veðurspána? Ég held að starfsmenn safnsins séu að flippa því lesin var upp veðurspá sunnudagsins og síðan rétt í þessu var tilkynnt að samkvæmt veðurspánni sem var lesin upp hér áðan væri okkur óhætt að fara út í veðrið! Ég sé ekki betur en það sé sól og blíða, ja allavega enginn stormur. Hvað er eiginlega í gangi?

Tweet

Ert'að grínast?

Stundum held ég að grínfréttavefir á borð við baggalút séu óþarfir því svo virðist vera að raunveruleikinn sé oft á tíðum mun klikkaðri og hafi ríkara hugmyndaflug til að skapa furðufréttir. Eða hvað finnst ykkur um að stinga af með son og átta ljón sirkusstjóra?

Tæplega fimmtug kona, sem starfað hefur sem ljónatemjari hjá svissneska farandsirkusnum Hinum fljúgandi sveppum, hefur hlaupist á brott með tvítugum syni sirkusstjórans, átta ljónum og tveimur tígrisdýrum. Konan var að þjálfa sirkusstjórasoninn í þeirri list að temja villidýr. Talsmaður þýska bæjarins Melle, þar sem sirkusinn var við sýningar, segir að þau tvö hafi orðið nánir vinir og ákveðið að hlaupast á brott.

Sirkusinn býður þeim, sem endurheimtir dýrin, jafnvirði nærri 13 milljóna króna í fundarlaun.

Nú þegar stúdentar sjá fram á frekar óspennandi sumarstörf sökum skorts á störfum væri ekki vitlaust að íhuga sumarstarf hjá Hinum fljúgandi sveppum. Ég hef heyrt að þar sé verið að leita að ljónatemjara og tíu vitleysingum sem tilbúnir eru að leika ljón eða tígrisdýr.

Tweet

Fiðraður gestur

Þessa stórskemmtilegu frétt fann ég á netsíðu Moggans:

Það kemur fyrir að furðufuglar reki inn nefið á lögregluvarðstöðum landsmanna. Þeim, jafnt og öðrum gestum, er vel tekið og veitt úrlausn í samræmi við erindi sín. Um kvöldmatarleytið í gær lagði páfagaukur, á ferð um Ólafsvík, leið sína inn á lögregluvarðstofuna. Lögreglumönnum fannst hann vera illa til reika og nokkuð kaldur. Var honum því boðin vist á öxlum þeirra á meðan hann safnaði kröftum og fékk yl í kroppinn. Þegar komið var fram yfir útivistartíma hafði ung stúlka samband við lögreglu og kvaðst sakna páfagauks. Stúlkunni létti að vonum þegar hún frétti að páfagaukurinn væri í höndum lögreglu.

Þegar gengið var til náða í Ólafsvík í gær var páfagaukurinn því kominn í öruggt skjól hjá ungu stúlkunni.

Tweet

Að hlaupa apríl

Í dag er 1. apríl og því alþjóðlegur plat- og gabbdagur. Sjálfri hefur mér bara einu sinni tekist að plata einhvern og það allverulega. Það var þegar ég var svona 6-7 ára og bjó í Miðtúni. Pabbi lá í makindum upp í sófa að glápa á fréttir þegar ég kem inn í stofu og segi að það sé einhver maður úti sem vilji hafa tal af honum. Hann neyddist því til að standa á fætur og fara fram á gang en viti menn, þar var ekki hræða. Ég man mér fannst þetta það allra fyndnasta og skemmilegasta og mér finnst það eiginlega ennþá því pabbi man svo vel eftir þessu prakkarastriki. Haha :)

Ég fann smá fróðleik um þennan merkadag á netinu, á vísindavefnum. Þar segir:

Fyrsti apríl er haldinn ?hátíðlegur“ um allan heim með tilheyrandi glettum og hrekkjum. Upprunann má að öllum líkindum rekja til miðalda en þá tíðkaðist í Evrópu að halda upp á nýtt ár á vorjafndægri 25. mars. Fyrsti apríl var áttundi og síðasti dagurinn í nýárshátíðinni, en samkvæmt fornri hefð Rómverja og Gyðinga skyldu merkilegar hátíðir standa í átta daga. Karl mikli (Karlamagnús) innleiddi þennan nýárssið á 8. öld en Gregoríus páfi 13. færði nýárið aftur til 1. janúar seint á 16. öld. Víða hélst þó áfram hefð miðalda, til dæmis var haldið upp á nýtt ár um vorjafndægur á Englandi allt til ársins 1752.

Ærsl voru mikil þennan dag á miðöldum og fólk vildi halda í þau þótt ekki væri lengur um nýárshátíð að ræða. Öllu kristilegri bragur var kominn á 1. janúar sem áttunda dag jóla og því tilvalið að halda áfram gleðinni fyrsta apríl. Hér á landi staðfesta heimildir að gabbleikir hafi farið fram þennan dag á síðari hluta 19. aldar en Íslendingar þekktu siðinn áður og skrifuðu gabbbréf, svokölluð „aprílbréf“ á 17. öld. Ekki ómerkari menn en Árni Magnússon geta þessarar venju og Jón Þorláksson á Bægisá samdi gamankvæði, „Fyrsti aprílis“, þar sem beinlínis er talað um að hlaupa apríl.

Fjölmiðlar hafa lengi tekið að sér að gabba almenning fyrsta apríl. Lundúnablaðið Evening Standard plataði lesendur sína á mikla asnasýningu árið 1846, ljóst er hverjir voru hafðir til sýnis þar. Fyrsta aprílgabbið sem vitað er um í íslenskum fjölmiðli, er frá árinu 1957. Þá létu fréttamenn Ríkisútvarpsins sem að fljótaskip sigldi á Ölfusá á leið til Selfoss og sögðu frá í beinni útsendingu. Nú til dags er samkeppni meðal íslenskra fjölmiðla um hver á besta aprílgabbið, þekktar eru til dæmis fréttir um miklar verðlækkanir á ýmsum vörum, kjöti, bílum eða tölvum, sem ekki hafa átt sér neina stoð í raunveruleikanum. Best er því að hafa varann á í dag (1. apríl 2003) og taka ekki allt trúanlegt!

Tweet